د افغان حکومت مسؤلین د امریکا له نوې ستراتېژۍ هرکلي ته دوام ورکوي، خو اخوا پاکستاني چارواکي غوسه دي او د امریکا متحده ایالاتو د وروستي دریځ په وړاندې تُند غبرګونونه ښيي.
په ملګرو ملتونو کې د افغانستان سفیر وايي، د امریکا د نوې ستراتېژي په اعلان سره افغانستان غواړي له متحده ایالاتو سره یوځای د ترورېزم په وړاندې مبارزه وکړي.
د افغانستان سفیر محمود صیقل ویلي، ترورېزم ټوله سیمه او نړۍ ګواښي او اړتیا یې لیدل کېږي چې نړیواله ټولنه په ځانګړې توګه امریکا د ترورېزم په وړاندې په مبارزه کې خپل مسؤلیت ادا کړي.
ښاغلي صیقل د چین له نړیوال ټلوېزیون سره په خبرو کې ویلي چې د افغانستان لپاره د امریکا د تازه ستراتېژۍ د تطبیق لپاره باید رغنده خبرې وشي.
دی وايي:
"افغانستان د منځنۍ او جنوبي اسیا او لیرې ختیځ او منځني ختیځ ترمنځ پروت دی. موږ شپږ ګاونډیان لرو. نو مهمه ده چې د امریکا د پالېسیو د تطبیق په وخت لکه څنګه چې مې یاده کړه، له دغو [ګاونډيانو] سره مؤثرې خبرې ولرو."
افغان چارواکو تر اوسه د امریکا د نوې ستراتېژۍ په اړه مثبت نظرونه ورکړي دي، خو ځیني سیاستوال له هغې ډلې پخواني ولسمشر حامد کرزي د دې ستراتېژۍ په یوه لویه برخه انتقاد کړی دی.
د امریکا متحده ایالاتو ولسمشر ډونالد ټرمپ د افغانستان او جنوبي اسیا لپاره د ستراتېژۍ د اعلان پر مهال وویل چې دا ستراتېژي د سرتېرو د شمېر او د هغوی د ایستلو د مهالوېش پر اساس نه بلکې شرایطو ته په کتو ترتیب او مخته وړل کېږي.
د امریکا متحده ایالاتو ولسمشر ډونالد ټرمپ
د امریکا متحده ایالاتو ولسمشر د پاکستان په اړه تُندې خبرې وکړې او ویېویل چې امریکا به د پاکستان لهخوا ترهګرو ته د پټنځایونو د ورکولو په اړه نوره غلې پاتې نهشي.
د پاکستان حکومت بیا تُند غبرګون ښودلی او ویلي يې دي چې دغه هېواد له ترهګرۍ سره د مبارزې په لاره کې قربانۍ ورکړې دي.
د چهارشنبې په ورځ د امریکا سفیر ډېوېډ هیل د پاکستان د پوځ له لوی درستیز قمر جاوید باجوه سره کتلي دي.
د پاکستان د پوځ د بیان له مخې باجوه په دې لیدنه کې ویلي چې هېواد یې د امریکا پوځي مرستو ته تمه نهکوي، خو یوازې د دواړو هېوادونو ترمنځ د اعتماد فضا او دوه اړخیز پوهاوی غواړي.
په بیان کې دا هم راغلي چې پاکستان د افغانستان امنیت د خپل هېواد په ګټه بولي.
دا هغه ټکی دی چې افغان ولسمشر محمد اشرف غني د چهارشنبې په ورځ په کابل کې د وینا پر مهال یاد کړ.
ښاغلي غني ټینګار وکړ چې پاکستان باید له منځته راغلي فُرصت نه ګټه پورته کړي.
ولسمشر غني
ولسمشر غني وايي:
"دا چې نن یوه اجماع جوړه شوې، پاکستان باید د خپلو تېرو دريځونو او چلندونو په اړه بیا کتنه وکړي. یو ښه فُرصت دی. دا باید واضح شي چې نننی افغانستان، تېر افغانستان نهدی. ډېر اقتصادي بدیلونه هم لرو او په نړۍ کې د همکارۍ لارې هم راته پرانیستې دي او ډېرې لارې شته."
ډېرو افغان او نړیوالو کارپوهانو د افغانستان او جنوبي اسیا لپاره د امریکا له نوې ستراتېژۍ هرکلی کړی دی او هغهیې د کابل لپاره یو نوی چانس بللی دی.
ځیني سیاستوال او کارپوهان بیا د پاکستان لپاره د امریکا د ولسمشر ډونالد ټرمپ پیغام ډېر جدي بولي.
په افغانستان او عراق کې د امریکا متحده ایالاتو پخواني سفیر زلمي خلیلزاد نیویارک ټایمز ورځپاڼې ته په خپله تازه مقاله کې ولسمشر ډونالد ټرمپ ته د هغه د نوې ستراتېژۍ د تطبیق لپاره درې وړاندیزونه کړي دي.
په افغانستان او عراق کې د امریکا متحده ایالاتو پخوانی سفیر زلمی خلیلزاد
- لومړی وړاندیز
د پوځیانو زیاتېدل باید له سیاسي هڅو سره همغږي واوسي.
- دویم وړاندیز
د پاکستان د مقاومت په وړاندې د امریکا متحده ایالاتو ولسمشر ډونالد ټرمپ باید چمتووالی ولري ځکه چې ښايي په افغانستان کې د امریکا ګټې ډېرې تر برید لاندې راشي او د پاکستان امنیتي ارګانونه په یو ډول وښيي چې د پاکستان له همکارۍ پرته امریکا نهشي بریالۍ کېدای.
- درېیم او وروستی وړاندیز
ولسمشر ټرمپ دې افغان چارواکي له امریکا سره د نېږدې کار لپاره وهڅوي او حکومتي ادارې په خاصه توګه امنیتي بنسټونه دې پیاوړي کړي څو د دغو هڅو په نتیجه کې امریکا په افغانستان کې خپل مأموریت په بریالیتوب سر ته ورسوي.
راپور: صفيالله ستانکزی