په کونړ او ننګرهار د وروستۍ زلزلو یو شمېر قربانیان ادعا کوي چې په د دې ولایتونو کې روغتونونه د ښځینه ډاکټرانو له کمښت سره مخ دي. دوی وایي زیانمنې شوې میرمنې روغتونونو ته لېږدول شوي خو د ښځینه ډاکټرانو د نشتوالي او د درملو د کمښت له امله یې سمه درملنه نه ده شوې.
په داسې حال کې چې د افغانستان په ختیځو ولایتونو په ځانګړي ډول کونړ کې د وروستۍ زلزلې د زیانمنو د ژغورنې عملیات لا هم روان دي د طالبانو حکومت وايي د دې زلزلې له امله یوازې د کونړ، په اسعد اباد، وټه پور، څوکۍ ، چپه دره او نور ګل ولسوالیو کې ۱۴۱۱ کسان مړه شوي او لږترلږه ۳۱۴۲ نور ټپیان شوي دي.
د طالبانو د حکومت ویاند ذبیح الله مجاهد نن سه شنبه وویل چې کونړ ولایت کې د وړمې شپې زلزلې د قربانیانو شمېر ۱۴۱۱ ته ورسېد.
د افغانستان سرې میاشتې په کونړ او ننګرهار کې د زلزلې د قربانیانو نوې شمیرې له رسنیو سره شریکې کړې دي او اندیښنه یې څرګنده کړې ده چې دا شمیرې په زیاتیدو دي. په ورته وخت کې له زلزله ځپلیو سره ځینو هیوادونو د مرستو ژمنې کړې دي.
ننګرهار کې خلک د اوبو له کمښت سره مخ دي. د مرکز جلال اباد او بېلابیلو ولسوالیو اوسېدونکي وايي، ان د څښاک پاکو اوبو ته لاس رسی نه لري.
په خوست کې دځايي خلکو او ځوانو فعالانو د کونړ، ننګرهار، لغمان او پنجشیر ولایتونو زلزله ځپلو ته د نغدي مرستو د راټولو بهیر پیل کړی دی. دوی په ډله ییز ډول ښار کې ګرځي او له خلکو همدارنګه دکاندارانو او سوداګرو مرستې راټولوي.
د کونړ ولایت په زلزله ځپلو سیمو کې یو شمېر رضاکاران وايي، عاجلو مرستو ته سخته اړتیا ده، خو د لارو خرابوالي زیانمنو ته د مرستو رسولو بهیر له خنډ سره مخ کړی دی.
د طالبانو د حکومت ویاند ذبیح الله مجاهد وویل چې د تیرې شپې زلزلې په کونړ، ننګرهار، نورستان، لغمان او پنجشیر ولایتونو کې مرګ ژوبله اړولې او خلکو ته یې مالي زیانونه پيښ کړي دي. د مرګ ژوبلې اعلان شوې شمیرې لا هم وروستۍ نه دي او خپلواکو سرچینو تراوسه په دې اړه څه نه دي ویلي.
د طالب چارواکو په وینا په کونړ او ننګرهار کې د تېرې شپې خونړۍ زلزلې له ۶۰۰ ډېر کسان وژلي او ۱۳۰۰ کسان یې ټپیان کړي دي.
نور راوښيه
