فرانسې له مصر او اردن سره په همغږۍ امنیت شورا ته یو داسې پرېکړه لیک وړاندیز کړی چې د اسراییل او فلسطین ترمنځ د اوربند غوښتنه په کې شوې.
د فرانسې ولسمشرۍ ماڼۍ پرون سې شنبه (د غويي ۲۸مه) ناوخته یوه بیان کې ویلي چې د دوی ولسمشر ایمانویل مکرون، مصري سیال یې عبدالفتاح السیسي او د اردن پاچا ملک عبدالله پرهمداسې یوه پرېکړه لیک هوکړه کړې ده.
درې واړو هېوادونو په درېیو مسئلو هوکړه وکړه، لومړی د جګړې درېدل، دویم اوربند او درېیم هم دا چې د ملګرو ملتونو امنیت شورا باید دا موضوع جدي تعقیب کړي.
مصر د اسراییل او فلسطین ترمنځ د غزې جګړې ته د پای ورکولو په هدف د نړیوالو هڅو مشري کوي.
د ملګروملتونو امنیت شورا تراوسه نه ده توانېدلې چې د اسراییلو او فلسطینیانو د تازه جګړې په اړه یو پرېکړه لیک صادر کړي.
د اسراییلو کلیدي متحد امریکا بیا له دې وړاندې په دې اړه د چین، ناروې او تونس له خوا وړاندیز شوې طرحې رد کړي دي.
په ملګرو ملتونو کې د چین سفیر ژنګ جون خبریالانو ته ویلي، هېواد یې د اوربند د غوښتنې په برخه کې د فرانسې د وړاندیز ملاتړ کوي.
دا هڅې داسې مهال کېږي چې پرون هم د اسراییل او فلسطین ترمنځ د جګړې ډګر تود و، اسراییل پر غزې درنې بمبارۍ وکړې او حماس پر اسراییل توغندي وتوغول.
فلسطیني چارواکو ویلي، د اسراییل په هوایي بریدونو کې تراوسه د ۶۳ ماشومانو په ګډون ۲۱۷ تنه وژل شوي دي.
د حماس تر کنټرول لاندې سیمه کې اسراییلي بریدونو څه باندې ۱۴۰۰ تنه ټپیان کړي هم دي.
د اسراییل لوري ته د وژل شوېو کسانو شمېر ۱۲ ته لوړ شوی دی.
د اسراییل او فلسطینیانو ترمنځ تازه جګړه وروسته تردې ونښته چې د مې په لسمه اقصا جومات ته نژدې د مظاهره کوونکو او اسراییلي پولیسو له نښتې وروسته حماس پر اسراییل توغندیز برید وکړ.
د دوی تازه جګړه د دواړو هېوادونو ترمنځ له ۲۰۱۴ میلادي کال راهیسې خونړۍ بلل شوې ده.
