د امريکا ولسمشر جوبايډن او د روسيې ولسمشر ولاديمير پوتين پرون (شنبه، د فبرورۍ ۱۲مه) وروسته له هغه ټیلیفوني خبرې وکړې چې واشنګټن او متحدینو یې خبرداری ورکړی چې ممکنه ده روسي ځواکونه هره شېبه چې وغواړي په اوکراین برید وکړي.
د سپینې ماڼۍ یوه چارواکي وویل، د کړکېچ د مخنیوي لپاره د وروستیو هڅو په لړ کې، ولسمشر بایډن خپل روسي سیال ولادیمیر پوتین ته شنبه مازیګر مهال ټیلیفون وکړ.
د سپینې ماڼۍ د یوې اعلامیې له مخې ولسمشر بایډن خپل روسي سیال ولادیمیر پوتین ته ویلي چې پر اوکراین د برید په صورت کې به متحده ایالات او متحدین یې روسیې ته چټک ځواب ورکړي چې ډېر به ورته ګران پریوځي.
د بایډن په خبره برید به د پراخ بشري ناورین لامل شي او د روسیې ځای به کمزوری کړي.
په همدې حال کې د فرانسې ولسمشر ایمانویل مکرون هم پرون د دوهم ځل لپاره له ولادیمیر پوتین سره ټیلیفوني خبرې وکړې.
د امریکا او فرانسې مشرانو د روسیې له ولسمشر سره د اوکراین پر پوله د کړکېچ پر کمولو تمرکز درلود.
فرانسه وايي، ولسمشر مکرون پوتین ته ویلي چې د اوکراین په اړه صادقانه خبرې د کړکېچ له زیاتېدو سره سمون نه لري.
په همدې حال کې د امریکا د بهرنیو چارو وزارت په اوکراین کې د خپل سفارت ډېرو کار کوونکو ته امر کړی چې له دغه هېواده ووځي. نورو امریکايي اتباعو ته هم ویل شوي چې په ۴۸ ساعتونو کې له اوکراینه ووځي.
پنټاګون د امریکا دفاع وزارت هم اعلان کړی چې له اوکراینه د شااوخوا ۱۵۰ پوځي روزونکو د ایستلو په هڅه کې دی.
د جرمني د بهرنیو چارو وزیرې انالینا بیرباک پرون د مصر پلازمېنه قاهره کې یوې خبري غونډې ته وویل، د جرمني د بهرنیو چارو وزارت اوکراین ته د سفر خبرداری ورکړی او له جرمني اتباعو یې غوښتي چې له اوکراینه ووځي.
د اوکراین پولې ته نږدې د روسیې پوځي تحرکاتو او او د شااوخوا یو لک عسکرو ځای پرځای کولو پر اوکراین د روسیې د برید په اړه اندېښنې راپورته کړې دي.
خو روسیې پر اوکراین د برید پلان رد کړی دی.
