فلسطیني چارواکي وايي، د امریکا ولسمشر ډونالد ټرمپ د سې شنبې په ورځ «۱۳۹۶ کال د لیندۍ ۱۴» د فلسطیني ادارې مشر محمود عباس سره په ټیلیفون خبرې کړي او هغه تهیې ویلي چې غواړي د امریکا سفارت له تلابیب څخه بیتالمقدس ته انتقال کړي.
د فلسطیني ادارې یو ویاند نبیل ابو رودینه وايي، ډونالد ټرمپ د فلسطیني ادارې مشر محمود عباس ته ویلي چې غواړي د اسرائیلو لپاره د امریکا سفارت له تلابیب څخه بیتالمقدس ته انتقال کړي.
دا به په دې معنی وي چې امریکا بیتالمقدس د اسرائیلو د پایتخت په توګه مني.
دا په داسې حال کې ده چې په منځني ختیځ کې د دې اقدام په اړه په زیاتېدونکې توګه خبرداری ورکړل شوی دی.
د محمود عباس ویاند نبیل ابو رودینه د سې شنبې په ورځ «۱۳۹۶ کال د لیندۍ ۱۴» وویل، د فلسطیني ادارې مشر ښاغلي عباس ولسمشر ټرمپ ته د دې پرېکړې د خطرناکو عواقبو په اړه خبرداری ورکړی چې په سیمه او نړۍ کې بهیې سولې، امنیت او ثبات ته پېښ کړي.
دې فلسطیني ویاند دا نهدي ویلي چې ایا د امریکا د ولسمشر ټرمپ او د فلسطینې ادارې د مشر عباس ترمنځ دې ټیلیفوني خبرو کې له تلابیب نه بیتالمقدس ته د امریکا د سفارت د انتقال لپاره کومه مشخصه نېټه یاده شوې که نه؟
خو ابو رودینه ویلي، محمود عباس ولسمشر ټرمپ ته ویلي چې د بیتالمقدس ختیځ به د راتلونکي فلسطیني دولت پایتخت وي او دا به بیتالمقدس ته د امریکا د سفارت د انتقال د مخنیوي لپاره د نړۍ مشرانو سره خپلو تماسونو ته دوام ورکړي.
که امریکا بیتالمقدس د اسرائیلو د پایتخت په توګه په رسمیت وپېژني، ترکیه به له اسرائیلو سره ډیپلوماتیکې اړیکې پرې کړي.
سپینې ماڼۍ د ولسمشر ټرمپ او محمود عباس ترمنځ ټیلیفوني خبرې تائید کړي، خو په دې اړهیې ډېر جزئیات نهدي ورکړي.
ولسمشر ټرمپ او محمود عباس په داسې حال کې خپلو کې ټیلیفوني خبرې کوي چې سپینې ماڼۍ تر دې مخکې ویلي، ولسمشر ټرمپ به په څو ورځو کې د بیتالمقدس په اړه او دغلته د امریکا د سفارت د انتقال په اړه خپله پرېکړه اعلان کړي.
د جرمني «ډي، پي، ای» خبري اژانس په دې اړه په یو راپور کې وايي، بیتالمقدس چې اسرائیل او فلسطینیان دواړهیې خپل پایتخت بولي، که امریکا ورته له تلابیب نه خپل سفارت انتقال کړي، نو دا به د دې سپېڅلي ښار په اړه د امریکا د سیاست ټاکونکی وي.
عرب مشرانو خبرداری ورکړی چې د امریکا د ولسمشر دا ګام به په سیمه کې تاوتریخوالی او بېثباتي زیاته کړي.
د ترکیې ولسمشر رجب طیب اردوغان خبرداری ورکړی چې که د امریکا متحده ایالات بیتالمقدس د اسرائیلو د پایتخت په توګه په رسمیت وپېژني، ترکیه به له اسرائیلو سره ډیپلوماتیکې اړیکې قطعه کړي.
د بیتالمقدس ښار پر یهوادنو سربېره د نړۍ د مسلمانانو او عیسویانو لپاره هم ځانګړی دیني ارزښت لري.
همدارنګه فلسطینیان ختیځ بیتالمقدس د خپل راتلونکي دولت پایتخت بولي.
