د امریکا د استازو د مجلس رئیس وايي، د یو پخواني روسي جاسوس د مسمومېدو په عکسالعمل کې د واشنګټن لهخوا د لسګونو روسي ډیپلوماتانو ایستل یو پر ځای اقدام دی.
پال رایان د ولسمشر ټرمپ هغه پرېکړه پر ځای بللې ده چې په بریتانیا کې د یو پخواني روسي جاسوس د مسمومېدو په عکسالعملیې له واشنګټنه د لسګونه روسي ډیپلوماتانو د ایستلو په اړه کړې.
پال رایان د دوشنبې په ورځ په پراګ کې ازادي راډیو ته په یوې ځانګړې مرکه کې وویل:
"زه په دې باور یم چې په بریتانیا کې زموږ د متحدانو سره د یووالي په خاطر دا یو پر ځای اقدام دی. زه فکر کوم چې د چک جمهوریت په شمول نورو اروپايي هېوادونو هم په ورته توګه فوقالعاده اقدام کړی دی. زما په باور دا کاملاً مناسب او ښه اقدام دی."
ښاغلي رایان پهدې اړه چې په لندن کې لا هم د روسي جاسوس سکریپال او د هغه د لور د مسمومېدو په اړه څېړنې دوام لري، ایا دا تر وخت مخکې اقدام نهدی؟
وویل:
"د دې مشخصې قضیې په اړه دلایل څرګند دي. بریتانویانو قضیه روښانه کړې. روسیې مخکې هم داسې کړي او موږ باور لرو چې د مسمومیت پهدې قضیه کې روسیه ښکېله ده او دا د منلو یو څه نهدي، داسې یو عمل نهدی چې متمدن هېوادونهیې ترسره کړي."
پال رایان چې د چک جمهوریت ته په دوه ورځني سفر تللی او ټاکل شوې چې پهدې موده کې به د دې هېواد له چارواکو سره وګوري، دا څرګندونې یې وروسته له هغې وکړې چې سیپنې ماڼۍ د ۶۰ روسانو د ایستلو اعلان وکړ.
دوی دا روسان د استخباراتو مأمورین بللي او زیاته کړې یې ده چې په سیاتل کې به د روسیې قونسلګري هم وتړل شي.
تقریباً په ورته وخت کې د اروپايي ټولنې غړو هېوادونو، اوکراین او کاناډا هم په بریتانیا کې د سرګي سکریپال او د هغه د لور د مسمومېدو د قضیې په تړاو له خپلو هېوادونو څخه د لسګونه روسي ډیپلوماتانو د ایستلو اعلان کړی دی.
کرملېن ویلي چې ځوابي اقدامات به وکړي.
د ګڼو لوېدیځو هېوادونو څخه د لسګونه روسي ډیپلوماتانو ایستل د هغه څه په وړاندې چې د روسیې لهخوا په بریتانیا کې د خپل یو پخواني جاسوس پر ضد له کیمیاوي وسلې کار اخیستل بلل کېږي، د یوې نړیوالې جبهې څرګندونه کوي.
سرګي سکریپال او لور یې یولیا د روانې میاشتې په لومړیو کې د بریتانیا په سالزبري ښار کې پر یوه څوکۍ د بېهوښۍ په حال کې وموندل شول او تر اوسه په روغتون کې په ناوړه روغتیايي وضعیت کې دي.
کرملېن چې پهدې پېښه کې لاس لرل رد کړي او په مقابل کې یې په ورته توګه ۲۳ بریتانوي ډیپلوماتان له روسيې ایستلي دي، د روسیې پر ضد د دوشنبې د ورځې اقدامات یوه تېروتنه بللې ده.
د روسیې د ولسمشر ویاند دمیتري پسکوف ویلي، موږ له دې هېوادونو څخه د روسي ډیپلوماتانو په ایستلو سخت خوابدي یوو.
نوموړي ویلي چې د روسیې ولسمشر ولادیمیر پوتین به د روسیې د عکسالعمل په اړه نهايي تصمیم نیسي.
