د افغانستان د کورنیو چارو وزارت وایي، لومړني تحقیقات ښیي چې په کابل کې پر انټرکانټیننټال هوټل برید کوونکي له وړاندې له دې هوټل سره بلد وو.
د کورنیو چارو وزیر ویس احمد برمک وایي، تر خپله وسه کار کوي چې د کابل پر انټرکانټیننټال هوټل د وسلهوال برید په اړه تحقیقات ډېر ژر بشپړ شي.
ښاغلی برمک زیاتوي:
"د دې ډلې په اړه چې دلتهیې عملیات وکړل، تحقیقات ښیي چې هغوی له مخکې هلته بلد وو، حتماً هلته ورغلي وو. د هوټل له فضا سره، دا چې هلته څوک دي او څوک نهدي، داسې ښکاري چې معلوماتیې درلودل، خو بیا هم دا معلومات او راپور لا تر وخت دمخه دی چې سل په سله حکم وکړو چې قضیه ښایي همداسې وي."
د افغانستان د کورنیو چارو وزیر دغهراز زیاته کړه، د هغو راپورونو له مخې چې د دوشنبې تر ماسپښینه پورې ورته رسېدلي، پهدې پېښه کې ۲۲ تنه وژل شوي چې ۱۴یې بهرني وګړي دي.
برمک: پر انټرکانټیننټال هوټل د برید د قربانیانو شمېر ۲۲ تنو ته رسېدلی
یوه بله پوښتنه چې د کابل د انټرکانټیننټال هوټل د امنیت په اړه مطرح شوې دا ده چې ولې د دغه مهم ځای امنیت د کابل-بلخ په نوم خصوصي امنیتي کمپنۍ ته ورسپارل شوی وو؟
د کورنیو چارو وزیر ویس احمد برمک د ازادي راډیو دې پوښتنې ته داسې ځواب ورکړ:
"څه باندې ۹۰ تنه د پولیسو پرسونل چې د کانټیننټال د امنیت ټینګولو مسؤلیتیې درلود او هغه وسایل او امکانات چې د کورنیو چارو وزارت لهخوا هلته نصب شوي وو، بالاخره له تشکیلاتو اضافه شول او مسؤلیت همدې امنیتي کمپنۍ ته تسلیم شو، خو اوس موږ خپلې ارزونې کوو."
تر دې وړاندې د انټرکانټیننټال هوټل یوه مسؤل محمد جواد ازادي راډیو ته ویلي و چې د دغه هوټل د امنیت مسؤلیت د دې کانټیننټال د مدیره پلاوي په وړاندیز او د ملي امنیت شورا په توافق کابل-بلخ خصوصي شرکت ته ورکړل شوی وو.
اوس د افغانستان د کورنیو چارو وزارت وایي، تحقیقات کوي چې له وسلهوالو سره د دغه شرکت د غړو د همکارۍ احتمال روښانه شي.
ویس احمد برمک په عین حال کې پهدې پېښه کې د لاس لرلو په تړاو د دوو کسانو د نیول کېدو خبره هم کوي، خو پهدې اړهیې ډېر جزئیات ورنهکړل.
وسلهوالو طالبانو پر دې هوټل د برید مسؤلیت منلی دی.
د افغانستان حکومت، په کابل کې د امریکا سفارت او یوناما دغه برید غندلی او د پېښې د قربانیانو له کورنیو سرهیې خواخوږي ښودلې ده.
د "م.م" امنیت شورا پر انټرکانټیننټال هوټل برید غندلی
دا په تېرو اوو کلونو کې پر انټرکانټیننټال هوټل دوهم وسلهوال برید دی.
تر دې وړاندې د کابل سرینا، صافي لنډ مارک او په کابل کې ځیني نور مېلمستونونه د وسلهوالو برید کوونکو لهخوا په نښه شوي دي.
په دې ډول خونړیو بریدونو کې په پرلهپسې ډول پر حکومت انتقادونه کېږي چې تر تحقیقاتو وروسته حقایق پټوي.
خو د افغانستان د کورنیو چارو وزیر ویس احمد برمک دا ځل ډاډ ورکړ چې تر دوو اوونیو پورې به د دې وروستۍ حملې د تحقیقاتو نتایج له خلکو سره شریک شي.
