د امریکا د متحده ایالاتو ولسمشر ډونالد ټرمپ پرون په سپینه ماڼۍ کې په یوه نادره غونډه کې چې د هغه د ملي امنیت د ټيم ټول غړي حاضر وو، د افغانستان پر موضوع خبرې وکړې.
د واشنګټن پوسټ ورځپاڼې د راپور له مخې په دې غونډه کې په افغانستان کې د امریکا د جګړې د راتلونکو هڅو په اړه خبرې وشوې او اساسي پوښتنه پر دې څرخېده چې ولسمشر په څه ډول دغې جګړې ته چې د امریکا تر ټولو اوږده او ګرانه جګړه ده، ژمن دی؟
ټرمپ چې په جنوري کې د ولسمشر په توګه د کار له پیلېدو راهیسې یې د دغې جګړې په اړه ډېر څه نهدي ويلي، خو په دې اړه چې دغه هېواد په څه ډول امن کېدای شي او د وسلهوالو طالبانو د تحرکاتو مخه نیول کېدای شي په دې وروستیو اوونیو کې د دفاع وزارت یا پنټاګون، د بهرنیو چارو وزارت او د سپنې ماڼۍ چارواکو وېشلې خبرې درلودې.
یو شمېر اوسنیو او پخوانيو امریکایي چارواکو چې نومونهیې نهدي ښودل شوي، واشنګټن پوسټ ته ویلي چې د چهارشنبې د ورځې دغه غونډه د دې لپاره جوړه شوې وه چې ولسمشر د افغانستان لپاره د نوې پالېسۍ په اړه نهایي پرېکړه وکړي.
ولسمشر ټرمپ څه باندې یوه میاشت مخکې د دفاع وزیر جېمز مټېس ته صلاحیت ورکړی و چې شااوخوا ۳۹۰۰ نور امریکایي سرتېري افغانستان ته واستوي، خو مټېس تر اوسه په دې اړه پرېکړه نهده کړې.
امریکایي چارواکو واشنګټن پوسټ ته ویلي چې مټېس تر هغو چې د افغانستان په اړه ستراتېژي نهایي شوې نهوي، نهغواړي افغانستان ته نور سرتېري ولېږي.
یوه امریکایي چارواکي چې په دې اړه د ټرمپ د ادارې په داخلي بحث کې ګډون کړی ویلي، مټېس له احتیاطه کار اخلي او تر اوسه نهدی متقاعد چې ایا له ستراتېژیک پلوه به دا منطقي وي چې هلته نور ځواکونه واستول شي او په دې هم نهدی ډاډه شوی چې د سرتېرو د استولو نهایي پرېکړه به دی کوي که ولسمشر؟
دغو امریکایي چارواکو دغهراز ویلي چې د سپینې ماڼۍ په غونډه کې ډېر پر دې تمرکز نهو شوی چې په افغانستان کې دې د امریکایي ځواکونو شمېر څومره وي بلکې پر سیمهییزه ستراتېژي په تېره د پاکستان په اړه چې طالبانو تهیې امن ځایونه ورکړي په ستراتېژۍ بحث وشو.
په اوس وخت کې شااوخوا اته نیم زره امریکایي ځواکونه په افغانستان کې دېره دي.
