د ولسي جرګې ځینو غړو د نا امنیو له امله د بېځایه شویو کورنیو پر ستونزو اندېښنه وښوده.
د دې جرګې ځیني غړي د ناامنیو له امله د بېځایه شویو کورنیو د ستونزو په هوارولو کې د کډوالو چارو د وزارت هڅې کمزورې ګڼي او وايي چې په روان کال کې د ناامنیو له امله زرګونه کورنۍ له خپلو اصلي سیمو بېځایه شوي چې بېړنۍ مرستو ته اړتیا لري، خو د کډوالو چارو وزارت ورته هېڅ ډول تدابیر نهدي نیولي.
دوی وویل، همدا اوس ځینو لویو ښارونو ته څېرمه زرګونه کورنۍ، ځیني په خیمو او ځیني له خیمو پرته، د خوراکي موادو، اوبو، روغتیایي خدمتونو، سرپناه او داسې نورو ضروري وسایلو د نشتوالي له امله، په سختو شرایطو کې شپې سبا کوي.
دوی دا هم وویل، په دې برخه کې کندز او د هلمند اوسېدونکي تر نورو زیات زیانمن شوي دي.
د ولسي جرګې دوهم مرستیال محمد نذیر احمدزي په دې اړه د جرګې د غړو د اندېښنو او بحثونو وروسته وویل:
"اړوند کمېسیون ته دنده سپارل کېږي چې یوازې د کندز د بېځایه شویو کورنیو ستونزه نه بلکې، په ټولو ولایتونو کې د بېځایه شویو د ستونزو د هوارۍ په اړه، د کډوالو چارو وزیر کمېسیون ته راوغواړي، موضوع ورسره شریکه او د حللارې یې د جرګې عمومي غونډې ته وړاندې کړي."
یوازې د کندز ولایت نهدی چې خلکیې د جنګونو له امله له خپلو کورونو بېځایه شوي بلکې د ننګرهار ولایت د شینوارو د اکثرو ولسوالیو، د کندهار، فراه، هلمند او ځینو شمالي ولایتونو زرګونه کورنۍ، د خپلو سیمو پرېښودلو ته اړې شوي چې اوسمهال، له ډول-ډول ستونزو سره مخې دي.
د کډوالو چارو وزارت چارواکي وايي، د بېځایه شویو کورنیو د شمېر زیاتوالی له امینتي وضعیت سره تړلی دی، په دې معنی چې په کومو سیمو کې چې ناامني زیاته ده، بېځایه شوي پهکې هم زیات دي.
دوی وايي، په ځینو سیمو کې چې امنیتیې مخ په ښه کېدو دی، ډېری کورنۍ بېرته ورګرځېدلي دي.
د دغه وزارت مطبوعاتي سلاکار او ویاند حفیظ احمد میاخېل ازادي راډیو ته وویل، د روان میلادي کال له پیل راهیسې ۴۱۴۹۶ کورنۍ چې د غړو شمېر یې ۲۴۸۹۷۶ کېږي، له خپلو کورونو بېځایه شوي چې په نوبت سره ورته مرستې رسېږي.
حفیظ احمد میاخيل وايي، بېځایه شویو کورنیو ته د مرستو رسولو لړۍ اوس هم روانه ده:
"کمېټه جوړه شوې، کومې کورنۍ چې مستحقې وې، له هغوی سره مرستې کېږي، تر اوسه د سږ کال او تېرو کلونو له شااوخوا دوه نیم لکو بېځایه شویو کسانو سره مرسته شوې او دا لړۍ روانه ده."
د چارو پوه میر سردار ځدراڼ په دې نظر دی چې امنیتي ځواکونه باید د امنیت راوستلو ته تدابیر پراخ او جدي کړي او سربېره پر دې دولت ته پهکار ده چې د بېځایه شویو د اړتیا د پوره کولو لپاره، د نړیوالو مرستندویه ټولنو او مؤسسو مرستې جلب کړي.
راپور: خان محمد سیند
