جمهور رئیس غني وايي، د ښځو حقونو پلي کېدو او د دوی پر وړاندې د تبعیض او تاوتریخوالي ختمېدو لپاره په راتلونکو انتخاباتو کې د مېرمنو ونډه مهمه ده.
ښاغلي غني چې د چهارشنبې په ورځ یې د مارچ اتمې یا د ښځو پیوستون د نړیوالې ورځې په مناسبت جوړې شوې غونډې ته وینا کوله هیله وښوده چې راتلونکو انتخاباتو کې د پخوا په پرتله ډېرې کاندیدې او رأیه ورکوونکي ښځې وې.
نوموړي زیاته کړه:
"له ښځو سره د زور او ظلم د ختمولو لپاره یو مهم ګام دا دی چې ښځې انتخاباتو کې برخه واخلي، مشهوره جمله ده چې حق ورکول کيږي نه، بلکې حق اخيستل کيږي، نو د حقونو د اخېستلو لپاره یو ضروري شرط په انتخاباتو کې ګډون دی چې راتلونکي کال کې ښځې په عمومي انتخاباتو کې د کاندیدانو او هم د رأيې ورکوونکو په حیث له پخوا ډېر ګډون وکړي."
جمهور رئیس وايي، د دولت او ملت جوړونې پروسې د ښځو د ونډې او حیاتي رول پرته امکان نهلري.
هغه وویل، د ښځو یوه مهمه لاسته راوړنه دا ده چې نن افغان ښځې خپل استازیتوب په خپله کوي او سلاکار ته اړتیا نهلري.
دا په داسې حال کې ده چې د ښځو چارو وزارت وايي، دا مهال ۳۰ فیصده ښځې له کوره دباندې په کار بوختې دي چې ۹ فیصده یې بیا د رهبرۍ ترکچې په پریکړو کې شریکې دي.
جمهور رئیس غني وايي چې د ملي وحدت حکومت د ښځو له حقونو دفاع کړې او د هغوی پر وړاندې د شته بې عدالتیو او تاوتریخوالي مخنیوي ته ژمن دی.
په ورته وخت کې د حکومت اجرائیه رئیس عبدالله عبدالله وايي چې ښځو تېرو څو کلونو کې ډېر پرمختګ کړی خو دا لار لا بشپړه شوې نهده.
ښاغلي عبدالله دې غونډې ته وویل چې راتلونکي کال کې به د رهبرۍ په کچه د مېرمنو ونډه ډېره شي.
نوموړي وویل:
"تاسې به په راتلونکي کال کې انشاالله د تصمیم نیونې برخه کې د ښځو د ونډې د ډېرېدو شاهد وې، په داسې حال کې چې افغان مېرمنو د تحصیل برخه کې خپلې وړتیاوې ثابتې کړئ او د مقام او دندې وړ دي ورته د هېواد په اداري نظام کې زمینه برابرول یو مهم کار دی او دا چې دوی په کاري محیط کې ونه ځورول شي."
ښاغلي عبدالله هم یو ځل بیا د ښځو د پیاوړتیا او د هغوی لپاره د یوې ښې فضا د رامنځته کېدو ژمنه تازه کړه او ویې ویل، د ملي وحدت حکومت دې ته ژمن دی.
دا په داسې حال کې ده چې افغان مېرمنو تل په حکومت کې د خپلې کمې ونډې څخه شکایت کړی او ویلي یې دي چې حکومت باید دې مسئلې ته رسیدګی وکړي.
یوسف خان ځدراڼ