په افغانستان کې د امریکا پر مرستو د څار ادارې یا سیګار یوځل بیا ویلي، داسې وېره شته چې له افغانانو سره د متحده ایالتونو مرستې دې سختدریځو ته رسېدلي وي.
رویټرز بېګا ناوخته د سیګار د نوي راپور په حواله ویلي چې طالبانو د امریکا د مرستو د ترلاسه کولو لپاره د بشري ادارو د جوړولو په ګډون ګڼ تاکتیکونه کارولي دي.
د سیګار په راپور کې راغلي، د امریکا د بهرنیو چارو وزارت دوه څانګې تراوسه نه دي توانېدلي چې افغانستان ته د ورکړل شوې ۲۹۳ میلیونه ډالره مرستې په تړاو له اصولو سره سمه ارزونه وکړي.
د راپور له مخې، د وزارت درې نورو څانګو افغانستان سره خپلې مرستې ارزولي، خو بیا یې هم سیګار ته د قناعت وړ اسناد نه دي وړاندې کړي.
د امریکا د بهرنیو چارو وزارت تراوسه د سیګار پر نوي خپاره شوي راپور تبصره نه ده کړې.
واک ته د طالبانو له بیا واکمنۍ راهیسې، متحده ایالتونه له افغانو سره د بشري مرستو ستر تمویلونکی هېواد دی.
سیګار وايي، دې موده کې امریکا افغانستان سره یوازې بشري برخه کې نژدې درې میلیارده ډالره مرسته کړې ده.