د افغانستان کرکټ بورډ د پاکستان کرکټ ملي لوبډلې دوه پخواني لوبغاړي عمران فرحت او رانا نویدالحسن د لوړو کارکردګیو مرکز د توپ وهنې او توپ اچونې د روزونکو په توګه ګومارلي دي.

کرکټ بورډ ادارې پر خپلې فېسبوک پاڼې لیکلي چې له دې وروسته به نوموړي روزونکي په یاد مرکز کې د افغان لوبغاړو پر وړتیاوو کار کوي.

دغه اداره لیکلي: "د افغانستان کرکټ بورډ د لوړو کارکردګیو مرکز په دې وروستیو کې د ادارې د مشرتابه په سپارښتنه رامنځته شوی چې په کې به د افغان لوبغاړو پر غوره توپ اچونه، توپ وهنه، فزیکي تکړښت او پیاوړتیا او نورو اړوند برخو کار کېږي."

څلوېښت کلن عمران فرحت د پاکستان په ملي لوبډله کې پيلیز کیڼ لاسی توپ وهونکی و چې په ۲۰۰۱ کال کې یې نړیوال کرکټ پیل کړی و او په وروستي ځل په ۲۰۱۳ زېږدیز کال کې د پاکستان لپاره ولوبېده.

فرحت د ۴۰ ټېسټ، ۵۸ یو ورځنیو او ۷ نړیوالو شل اوریزو سیالیو د لوبولو تجربه لري چې په ټېسټ سیالیو کې یې ۳ او په یو ورځنیو سیالیو کې یې یوه سلیزه وهلې ده.

هغه په ۲۳۰ فرسټ کلاس او ۲۲۲ لېست ای کې تر ۲۲ زرو زیاتې منډې لري او ۵۳ سلیزې یې وهلي دي.

افغان کرکټ بورډ وايي چې نوموړي د کرکټ له نړیوالې شورا د درېیمې درجې روزنې سند ترلاسه کړی او له تېرو شپږو کلونو راهیسې یې په پاکستان کې له بېلابېلو لوبډلو سره د روزونکي دنده ترسره کړې ده.

دغه راز رانا نوید الحسن د خپل وخت چټک توپ اچونکی و هغه په لومړي ځل په ۲۰۰۳ کال کې نړیوال کرکټ پیل کړ او د وروستي ځل لپاره په ۲۰۱۰ کال کې ولوبېد.

نوموړي په ۹ ټېسټ، ۷۴ یو ورځنیو او ۴ شل اوریزو سیالیو کې د پاکستان استازولي کړې ده.

همدارنګه هغه په ۱۵۶ فرسټ کلاس، ۱۹۷ لېست ای او ۱۲۶ سوداګریزو او کورنیو شل اوریزو سیالیو کې ۱۰۹۵ ویکټې اخیستې ده.

نویدالحسن د دوه کلونو لپاره د عربي متحده اماراتو لوبډلې د مشر روزونکي په توګه هم دنده ترسره کړې ده.

افغان کرکټ بورډ غه راز وايي چې د لوړو وړتیاوو او درملنې مرکزونو لپاره ځينې نور مشهور مسلکي کسان هم ګوماري.

د ویلو ده چې افغان کرکټ بورډ میاشت وړاندې د دې ادارې دننه د لوړو وړتیاوو او درملنې د مرکزونو د عصري جوړونې خبر ورکړ او ويلي وو چې تر دې بعد به د ملي لوبغاړو په ټولو فزیکي او لوبیزو وړتیاوو په همدې مرکزونو کې کار کېږي.

د تخار په ورسج ولسوالي کې د سیلونو له امله درې کسانو خپل ژوند له لاسه ورکړی دی.

په تخار کې د طالبانو د فواید عامه ریاست ویاند روح اله اکبري باختر اژانس ته ویلي دي چې د پنجشنبې د ورځې د ورښتونو له امله اووه تنه نور ټپيان شوې دي.

په تخار کې طالب چارواکو له مرستندویه موسسو او بنسټونو غوښتې دي چې په ورسج ولسوالي کې له سیل ځپلیو سره هرڅومره چې ژر کیږي، مرستې وکړي.

یو افغان چې د امریکا د ولسمشرۍ د ټاکنو په ورځ د برید د پلان په تور نیول شوی، پرون (د جمعې په ورځ) په خپل جرم اعتراف وکړ.

۲۷ کلن نصیر احمد توحیدي د اسلامي دولت یا داعش ډلې د ملاتړ او د تروریستي عمل لپاره د وسلو د ترلاسه کولو په دوو تورونو تورن دی.

توحیدي که مجرم وپیژندل شي، تر ۳۵ کلونو پورې په بند محکوم کیدی شي.

د محکمې د اسنادو له مخې، د اوکلاهوما اوسیدونکی نصیر احمد توحیدي تیر کال د ټاکنو په ورځ د برید لپاره دوه کلاشینکوف ټوپکونه او ۵۰۰ مرمۍ ترلاسه کړې وې.

د FBI مشر کیش پټیل په یوه بیان کې وویل: "متهم اعتراف وکړ چې د ۲۰۲۴ کال د ټاکنو په ورځ یې د مرګوني برید پلان جوړ کړی و - یو برید چې د FBI او زموږ د شریکانو د ښه کار له امله کشف او شنډ کړای شو."

د متحده ایالاتو چارواکو ویلي چې توحیدي د برید پلان لپاره د میاشتو راهیسې د خپلې میرمنې د ورور عبدالله حاجي زاده په ګډون له څو نورو سره په تماس کې و.

حاجی زاده، چې هغه وخت ۱۷ کلن و، په اپریل کې په خپل جرم اعتراف وکړ. هغه د ۱۵ کلونو بند سره مخ دی.

نصیر احمد توحیدي، د طالبانو له واک ته رسیدو وروسته د ۲۰۲۱ کال په سپتمبر کې د کډوالۍ په ځانګړې ویزې متحده ایالاتو ته تللی.

د طالبانو د حکومت د ترانسپورت او هوايي چلند وزارت د هوا پېژندنې ریاست د جمعې او شنبې په ورځو کې د افغانستان په ۲۰ ولایتونو کې د درنو بارانونو او سیلابونو د احتمال خبرداری ورکړی دی.

دهوا پیژندنې ریاست د پنجشنبې په ورځ په یوه مطبوعاتي اعلامیه کې وویل چې بدخشان، تخار، نورستان، لغمان، ننګرهار، کابل، لوګر، پکتیا، کاپیسا، پنجشیر، پروان، بغلان، سمنګان، بلخ، سرپل، بامیان، غزني، غور، دایکندي او میدان وردګ ولایتونوکې به ، د سالنګونو په شمول باران وشي.

د ورښت کچه له ۱۵ څخه تر ۴۰ ملي مترو پورې اټکل شوې.

دهوا پیژندنې اداره زیاتوي چې د سالنګ په ګډون په ختیځ، سویلي، لویدیځ او مرکزي ولایتونو کې د ګړندیو بادونو او دوړو احتمال هم شته، چې سرعت به یې په مختلفو ځایونو کې له ۵۰ څخه تر ۹۰ کیلومتره په ساعت کې وي.

دا خبرداری په داسې حال کې ورکول کېږي چې په بدخشان کې د طالبانو سیمه ییزو چارواکو ویلي چې د تېرې چهارشنبې د ورځې سیلابونو خلکو ته درانه مالي زیانونه اړولي دي.

تر اوسه د احتمالي تلفاتو راپور نه دی ورکړل شوی.

د طالبانو د حکومت د ټرافیکو ریاست وايي چې د لوی اختر په رخصتیو کې یې په ټول افغانستان کې له ۱۱۷ څخه زیاتې ترافیکي پیښې ثبت کړې دي.

دغې ادارې د پنجشنبې د ورځې اعلامیه کې وویل چې په دې پیښو کې ۴۳ کسه مړه او ۱۵۸ نور ټپیان شوي دي.

اعلامیه زیاتوي چې په مړو کې ۳۱ نارینه، دوه ښځې او لس ماشومان شامل دي.

د پیښو په ټپیانو کې ۱۲۳ نارینه، ۱۱ ښځې او ۲۴ ماشومان شامل دي.

دترافیکو ریاست دا پیښې د موټر چلولو پرمهال د خلکو بې احتیاطي ته منسوب کړې.

د سړکونو خراب حالت، د ترافیکي قوانینو نه مراعات کول او د موټر چلوونکو بې احتیاطي په افغانستان کې د ترافیکي پیښو اصلي عوامل ګڼل کیږي.

بدخشان کې پرونیو سیلابونو درانه مالي زیانونه اړولي دي خودځاني تلفاتو رپوټ نه دی ورکړل سوی.

مولوي محمد اکرم اکبري بدخشان کې دطبیعي حوادثو په وړاندې دمبارزې رئیس خبریالانو ته وویل چې د تیشکان ، خاش او تګاب ولسوالیو کې کورونو ، سلګونه جریبه کرنیزو ځمکو ، او عام المنفعه ځایونو ته زیان اوښتی دی او لسګونه څاروي مړه سوي دي.

مولوی اکبري زیاتوي چې ابتدایي رپوټونه یې ترلاسه کړي کیدای شي زیانونه تردې هم پراخ وي او د زیانونو د دقیقې اندازې دمعلومولو لپاره د سروې دوه ټیمونه سیمې استول شوي دي.

د طالبانو حکومت د تاشکند د څلورم نړیوال کنفراس په څنډه کې له ازبکستان سره سوداګریزه هوکړه لاسلیک کړې ده.

د طالبانو په واک باختر خبري اژانس وايي، دا هوکړه د صنعت او سوداګرۍ سرپرست وزیر نورالدین عزیزي او د ازبکستان د پانګونې، صنعت او سوداګرۍ وزیر لعزیز قدرتوف ترمنځ لاسلیک شوې ده.

دغې اژانس د هوکړه موخه د ازبکستان او افغانستان ترمنځ د سوداګرۍ په برخه کې اسانتیاوې، د تعرفو راکمیدل او په دواړو هېوادونو کې بازارنونو ته اسانه لاسرسی یاد کړی دی.

د پانګونې نړیوال کنفراس چې هرکال په تاشکند کې جوړیږي، د شاوخواو سلو هېوادونو ولسمشران، وزیران او نورو لوړپورې چارواکي په کې ګډون کوي.

که څه هم ازبکستان د سوداګرۍ او پانګونې په برخه کې له طالبانو سره نژدې اړیکې لري خو د دوی حکومت يې په رسیمت پیژندلی نه دی.

د داعش د له منځه وړلو نړیوال ایتلاف یوځل بیا د اسلامي دولت ډلې یا داعش په له منځه وړلو ټینګار کړی دی.

د دغه ایتلاف په غونډه کې ویل شوي چې اروپا او متحده ایالتونو ته د داعش د ګواښونو له غځېدو مخکې باید د دغې ترهګریزې ډلې عملیاتي وړتیاوې، مالي سرچینې او د جلب او جذب هڅې وځپل شي.

د امریکا بهرنیو چارو وزارت په یوه خبرپاڼه کې ویلي چې دا یو ورځنۍ غونډه پرون سه شنبه ( د غبرګولې ۲۰) د اسپانیې په کوربه توب په مادرید کې جوړه شوې وه.

غونډه کې د بشارلاسد د رژیم له ړنګېدو وروسته په سوریه کې د داعش په ګواښونو تمرکز شوی دی.

د داعش ګواښونه په افغانستان او پاکستان کې هم موجود دي، خو په دې اړه د امریکا د بهرنیو چارو وزارت په خبرپاڼه کې کومه ځانګړې یادونه نه ده شوې.

له سعودي‌ څخه د افغان حاجیانو د بیرته ستنېدو بهیر پيل شو.

د طالبانو د حج او اوقافو وزارت نن چهارشنبه دغه خبر پر خپله ایکس پاڼه خپور کړی دی.

لومړني پراوز کې ۳۶۰ حاجیان نن سهار کابل ته رسیدلي دي.

سږ کال شاوخوا دیرش زره افغانان د حج مراسمو لپاره سعودي عربستان ته تللي دي.

په ایران کې د یوې افغان کډوالې کبرا رضایي وژنې ته د غبرګونونو په لړ کې د ازادۍ فانوس په نوم یوه خوځښت د دې پیښې د بیړنۍ، رڼې او بې پلوه څيړنې غوښتنه کړې ده.

دغه خوځښت نن چهارشنبه ( د غبرګولي ۲۱) یوه خبرپاڼه کې ویلي چې د قتل عاملان باید وپیژندل شي او له کوم مصونیت پرته باید اعدام شي.

په خبرپاڼه کې دغه وژنه جنایت او د بشري حقونو ښکاره نقض بلل شوی دی.

د هنګاو په نوم د ایران د بشري حقونو د ملاتړ یوه بنسټ تازه راپور ورکړ چې د کبرا رضایي ټوټه شوی جسد د غبرګولي په ۱۳مه د تهران په پیشوا سیمه کې په کثافاتو کې موندل شوی دی.

د هنګاو په خبره دغه نجلۍ د جسد تر موندل کېدو یې پنځوس ورځې مخکې کار ته د تلو پر مهال اختطاف او تري تم شوې وه.

تراوسه چا یا کومې ډلې د هغې د وژنې مسولیت نه دی منلی.

ایران کې میشتو افغان کډوالو هم دا وژنه له دوی سره د سیستماتیکې بې عدالتۍ یوه بیلګه یاده کړې ده.

د افغانستان د فوټبال ملي ټيم له سوریه څخه صفر د یو پر وړاندې ماتې وخوړه.

دا لوبه چې پرون د افغانستان په وخت شاوخوا لس بجې په سعودي عربستان کې وشوه، د سوریې ټیم واتونیده چې د افغان ملي لوبډلې ته ماتې ورکړي.

دا لوبه د اسیايي جام د غوراوي د مقدماتي لوبو په ترڅ کې ترسره شوه.

له دې وړاندې افغانستان له میانمار څخه یو د دوه پر وړاندې ماتې خوړلې وه.

د افغانستان د فوټبال د ملي لوبډلې بله لوبه به له پاکستان سره د میزان میاشتې په ۱۷مه نیټه ترسره شي.