د طالبانو د حکومت د بهرنیو چارو وزارت پرون (چهارشنبې) وویل، ایران د افغانستان د پخواني حکومت هغه وسلې او وسایط، چې د تېر کال په اګست کې ایران ته وړل شوې وې، دوی ته وسپارلې.
د طالبانو د بهرنیو چارو وزارت ویندوی عبدالقهار بلخي په یوې خبرپاڼه کې ویلي دا وسلې د دوو هېوادونو ترمنځ له تماسونو وروسته افغانستان ته سپارل شوي دي.
په هغو وسلو کې چې ایران د طالبانو حکومت ته سپارلي هاموې ټانکونه، زغرګاډي، پوځي وسایط، او نورې وسلې او نقلیه وسایط شامل دي.
د طالبانو د بهرنیو چا رو وزارت د ایران دا اقدام د دوو هېوادونو ترمنځ د اړیکو د لا پیاوړتیا لور ته یو ګام بللی دی.
د طالبانو تر کنټرول لاندې باختر خبري اژانس ویلي چې ایران دا وسلې د سې شنبې په ماخوستن په اسلام کلا بندر کې طالبانو ته وسپارلې.
ایران تراوسه پورې په دې اړه څه نه دي ویلي.
د ۲۰۲۱ کال په اګست کې پر نیمروز او فراه ولایتونو د طالبانو د بریدونو په مهال د افغانستان د پخواني حکومت یو شمېر امنیتي ځواکونه له وسلو او زغرګاډو سره ایران ته واوښتل.
د دغو زغرګاډو او پوځي لاریو تصویرونه په ټولنیزو رسنیو کې په پراخه پیمانه خپاره شول چې د افغانستان له پولې د ایران خوا ته انتقالېږي.
د افغانستان د جمهوري نظام د نسکورېدو په مهال د افغانستان د هوايي ځواک پېلوټانو لسګونه هیلي کوپتر او نورې الوتکې ازبکستان او تاجکستان ته یووړې چې لا هم طالبانو ته نهدي سپارل شوي.
تاجکستان ویلي چې دا الوتکې د طالبانو حکومت ته نه سپاري.
ازبکستان هم ویلي چې دا الوتکې د امریکا دي ځکه یې طالبانو ته نه سپاري.
اکثره پیلوټان متحده عربي اماراتو ته لېږدول شوي دي.
خو ایران لومړنی هېواد دی چې طالبانو ته د افغانستان د پخواني حکومت وسلې سپاري.
راپورونه وايي چې د امریکا متحدو ایالتونو په افغانستان کې د ۷ میلیارد ډالرو په ارزښت وسلې پرې ایښي چې د طالبانو لاس ته روغې په لاس ورغلې دي.
امریکايي ځواکونو له افغانستانه د وتلو په مهال یو شمېر هیلي کوپترې ویجاړې کړې خو طالبان وايي چې اکثره الوتکي او څرخکې یې ترمیم کړي دي.
پرون، چهارشنبې هم طالبانو د دوو روسي الوتکو د ترمیم او بیافعالېدو خبر ورکړ.
