د امریکا متحدو ایالاتونو په اوکراین کې د خپل سفارت د کارکوونکو د کورنیو غړو ته له کیف د وتلو امر وکړ.

امریکا ویلي د روسیې د پوځي اقدام د خطر له کبله دې ټول امریکايي اتباع له اوکراینه پر وتلو غور وکړي.

د امریکا د بهرنیو چارو وزارت په یوه اعلامیه کې وویل، د سفارت غیر ضروري کارکوونکي کولای شي په خپله خوښه د حکومت په لګښت له اوکراینه ووځي.

یوه چارواکي ویلي، دا احتیاطي ګامونه دي چې د هغه په خبره له اوکراینه د امریکا د ملاتړ پر تعهد کوم اغیز نه کوي.

دغه چارواکي چې نوم یې نه دی اخیستل شوی، دا ونه ویل چې دا مهال په اوکراین کې د امریکايي وګړو شمېر څو ته رسېږي.

وروسته له هغې چې روسیې د اوکراین پولې ته څېرمه خپل زرګونه پوځیان ځای پر ځای کړل، غربي چارواکو د اوکراین په وړاندې د روسیې د پوځي اقدام د احتمال خبرداری ورکړ.

د امریکا د بهرنیو چارو وزارت په یوه اعلامیه کې وویل، امنیتي وضعیت په ځانګړي ډول د اوکراین په ختیځ کې د روسیې له خوا په اشغال شویو سیمو کې د اټکل وړ نه دی او د خرابۍ خوا ته روان دی

ایراني چارواکو اعلان وکړ چې د بندر عباس په سیمه کې اورلګیدنه کنټرول شوې ده.

د بندرعباس په شهید رجايي کې د اپرېل په ۲۶مه تر زوروروې چاودنې وروسته پراخ اور ولګېد چې مړه کولو یې څو ورځې وخت ونیوه. په هغه پېښه کې لږ تر لږه ۷۰ کسان وژل شوي او تر زرو نور ډېر خلک ټپیان دي.

د ایران ټلویزیون د سې شنبې په ورځ ژوندي انځورونه خپاره کړل چې ښيي له کانټینرونو څخه لا هم لوګي پورته کېږي.

په ورته وخت کې، د ایرنا خبري اژانس راپور ورکړی چې د ایران ګمرک اعلان کړی د بندر عملیات بیرته عادي حالت ته ستانه شوي دي.

ایراني چارواکو تر اوسه د پېښې دقیق لامل نه دی اعلان کړی.

ولسمشر ټرمپ دا ورځ د خپلو ملاتړو سره ولمانځله او له دې فرصت په استفادې یې یو ځل بیا د ډیموکرات ګوند پر غړو نیوکه وکړه.

هغه د کډوالۍ په اړه د خپلو سختو پالیسیو له تکراره خبره وکړه، او زیاته یې کړه چې په تیرو ۱۰۰ ورځو کې یې د غیرقانوني کډوالو ګڼ شمېر ایستلي دي.
ولسمشر ټرمپ میشګین ایالت کې د یوې ۹۰ دقیقه اي وینا پرمهال وویل: «نن شپه دلته د خپل هېواد په زړه کې یو څو د خپل هېواد د تاریخ د یوه حکومت تر ټولو بریالۍ ورځې ولمانځو.»

ډونالډ ټرمپ د تېر کال جمهوري ریاست انتخابات وګټل او د دوهم ځل لپاره د متحده ایالتونو ولسمشر شو.

هغه د جنوري په ۲۰مه د وفادارۍ لوړه وکړه.

په تیرو ۱۰۰ ورځو کې، ډونالډ ټرمپ د اجرایوي فرمانونو په صادرولو سره جنجالي پریکړې کړې دي.

له هغې ډلې د نړۍ له نږدې هر هېواد څخه واردو شويو توکو باندې د درنو تعرفو لګول، چې د ډیری دغو هیوادونو له سختو غبرګونونو سره مخ شوي دي.

په چیمپینز لیګ کې، پاري سن ژرمن لوبډلې خپل کوربه ارسنال ته یو پر صفر ماته ورکړه.

دا لوبه بېګا شپه د اروپا د اتلانو جام د نیمه پای لوبې په لومړۍ مرحله کې ترسره شوه.

د دې دواړو لوبډلو ترمنځ د بیرته راتګ لوبه به راتلونکې اوونۍ په پاریس کې وشي.

دوهمه نیمه پای لوبه به د چهارشنبې په شپه د هسپانوي ټیمونو بارسلونا او ایټالیا انټر میلان ترمنځ ترسره شي.

ملګرو ملتونو ویلي یواځې اپرېل میاشت کې څه باندې دوه نیم لکه افغانان له ګاونډیو هېوادونو خپل هېواد ته ستانه کړای شوي دي.

د ملګرو ملتونو د جنوا دفتر په خپله اعلامیه کې چې سه شنبه ناوخته یې خپره کړې چې لږ تر لږه ۹۶زره دا افغان کډوال له پاکستان او ایرانه په زور ایستل شوي دي.

دغه سازمان خبرداری ورکړی چې د کډوالو په دومره لوی شمېر راستنېدنه د افغانستان بشري ناورین لا پسې زیاتوي.

ملګرو ملتونو له پاکستان او ایران غوښتي چې د کډوال ستنول باید داوطلبانه، خوندي او عزتمنده و اوسي.

راستنېدونکي افغان کډوال شکایت لري چې په پاکستان او ایران کې بد چلند ورسره شوی او خپل وطن کې هم د ژوند لومړنۍ اسانتیاوې نه لري او له ډېرو ستونزو سره مخ دي.

ننګرهار کې د طالبانو د یوې پوستې اشپز د پوستې په ساتونکو ډزې کړي چې لږ تر لږه درې تنه یې وژلي او دوه نور یې ټپيان کړي دي.

د ننګرهار یوې امنیتي سرچینې د نوم نه ښودو په شرط ازادي راډیو ته وویل چې پیښه نن سهار ( سه شنبه د ثور نهمه) په شیرزاد ولسوالۍ کې شوې ده.

بل لورته د ننګرهار د امنیې قومندانۍ ویاند سید طیب حماد رسنیو ته په استول شوې خبرپاڼه کې پیښه تایید کړې او ویلې یې دي چې اشپز چې له ډزو وروسته یې د تیښتې هڅه کوله، نیول شوی دی.

د پیښې د لامل او انګیزې په اړه څه نه دي ویل شوي او د ننګرهار امنیه قومندانۍ ویلي چې په دې اړه پلټنه کوي.

د اوکراین او روسیې ترمنځ د بریدونو په تبادله کې نن سهار یوه ۱۲ کلنه نجلۍ د اوکراین په دنیپروپتروسک سیمه او دوه تنه نور د روسیې په سرحدي سیمه بلګوردو کې ووژل شول.

د اوکراین هوایي ځواک ویلي چې روسیې یوازې تېرو ۲۴ ساعتونو کې پر اوکراین سل بې پيلوټه الوتکې توغولي دي.

د دغو بریدونو پایله کې اوکراین ته مالي زیان اوښتی او درې تنه په کې ټپيان شوي هم دي.

بل لورته روسي چارواکو ویلي، بلګورود کې پر یوه موټر د اوکرایني ځواکونو برید کې دوه تنه وژل شوي او درې نور ټپیان شوي دي.

دا په داسې حال کې ده چې د روسیې ولسمشر له اوکراین سره درې ورځنی اوربند اعلان کړی.

دغه اوربند به د مې میاشتې له اتمې تر لسمې پورې نافذ وي چې د نازي جرمنانو په وړاندې د شوروي اتحاد د بریا له اتیایمې کلیزې سره برابرې شپې ورځې دي.

د اوکراین ولسمشر د پوتین دغه اعلان نمایشي بللی دی.

د طالبانو د صنعت او سوداګرۍ وزارت وایي چې تېر ۱۴۰۳ لمریز کال کې یې له هند سره د سوداګرۍ کچه ۸۹۰ میلیونه ډالره وه.

د دغه وزارت ویاند عبدالسلام جواد نن سه شنبه رسنیو ته ویلي چې د سوداګرۍ په دې کچه کې ۶۲۷ میلیونه ډالرو په ارزښت صادرات او ۲۶۳ میلیونو په ارزښت واردات شامل دي.

که څه هم معلومه نه ده چې افغانستان له هنده کوم توکي وارد کړي، خو جواد ویلي چې دوی هند ته انځر، اینجه، زعفران، ممیز، شنه زیره او بادام صادر کړي دي.

افغانستان د چابهار او واګې بندرونو او یوه هوایي‌ دهلیز له لارې له هند سره سوداګریزه راکړه ورکړه کوي او افغان سوداګرو پخوا ویلي، پاکستان له هند سره ترانزیت کې ورسره لازمه همکاري نه کوي.

د روسیې ولسمشر ولادیمیر پوتین په دوهمه نړیواله جګړه کې د نازي جرمني د ماتې د کلیزې په مناسبت له اوکراین سره د روسیې په جګړه کې درې ورځنی اوربند اعلان کړ.

د اوکراین د بهرنیو چارو وزیر د کرملین هغه اقدام چې د اپریل په ۲۸مه اعلان شو، صادقانه ونه باله او د سمدستي اوربند غوښتنه یې وکړه.

دا په دې میاشت کې دوهم ځل دی چې کرملین د جګړې د بندولو غوښتنه کړې ده.

د ایسټر د رخصتۍ په جریان کې د اوربند لپاره مخکینی وړاندیز په لویه کچه له پامه غورځول شوی و، ځکه چې روسیې او اوکراین بریدونو ته دوام ورکړ.

په دې بریدونو کې د مسکو لخوا په ټوله اوکراین کې د پراخو هوايي بریدونو لړۍ شامله وه.

د ایران د دولتي رسنۍ په وینا په بندرعباس کې د چاودنې د قربانیانو شمیر اویاو ته ورسید او د ټپيانو شمیر یې تر دولس سوو اوښتی دی.

چارواکو پرون ناوخته وویل چې د اته څلویښت ساعتونو له تیریدو وروسته لاهم دا اور چې د شهید رجایي په بندر کې لګیدلی و نه دی مړ شوی، خو تر کنټرول لاندې راغلی دی.

چارواکو تر اوسه د شهید رجایي په بندر کې د اپریل د شپږ ویشتمې نیټې د چاودنې علت سم نه دی روښانه کړی، خو خپلواکو متخصصینو ویلي دي چې دا چاودنه په ناسمه توګه د سوډیم پرکلورایډ د زیرمې له امله رامنځته شوې ده. سوډیم پرکلورایډ د توغندیو د سون په موادو کې کارول کیږي.

په افغانستان کې د ملګرو ملتونو د خوړو نړیوال پروګرام اعلان وکړ چې د سویډن د نړیوالې پراختیایي همکارۍ ادارې د افغان میندو او ماشومانو د تغذیې د ملاتړ لپاره دوه میلیونه او دوه لکه امریکایي ډالر مرسته کړې ده.

په دې مرسته به یولک او پنځه ویشت زره میندو او ماشومانو ته د دریو میاشتو په مخه مغذي خواړه چمتو شي.

د خوړو نړیوال پروګرام دوشنبه( د اپریل اته ویشتمه) په یوه بیان کې وویل چې له افغانستان سره به د سویډن نوې مرسته د لسګونو زرو میندو او ماشومانو د خوارځواکۍ مخه ونیسي.

په افغانستان کې د خوړو د نړیوال پروګرام استازې موتینتا چیموکا وایي چې سږکال په افغانستان کې دولس لکه میندې په خوارځواکۍ اخته دي او داسې اټکل کیږی چې درې نیم میلیونه ماشومان به په دې ناروغۍ اخته شي.

سویډن له دوه زره یو ویشتم کاله تر دوه زره څلرویشتم کال پورې په افغانستان کې د خوړو له نړیوال پروګرام سره تر دیرش میلیونه ډالرو ډیره مرسته کړې ده.