یو شمېر کابل ښاریان امنیتي ځواکونه د برښنا د ستنو د ساتلو په برخه کې ناتوانه بولي.
هغه ادعا چې د کورنیو چارو وزارتیې ردوي او د ساتلو لپارهیې د هڅو خبره کوي.
دوی ازادي رادیو ته وویل، هره میاشت د جنګونو او ماین چاودنو له امله د برښنا یوه یا دوه ستنې ویجاړېږي چې ورسره د ځینو ولایتونو برښنا پرې کېږي.
پر قرنطین، وزګارتیا او نورو اقتصادي ستونزو سربېره، دا او د برښنا کموالی بله ستونزه ده چې کابل ښاریانیې اندېښمن کړي دي.
دوی وايي، امنیتي ځواکونه ولې نهشي کولای هغه سیمې چې د برښنا ستنې پهکې ولاړې دي، امنیتیې وساتي؟
د کابل یوه اوسېدونکې راضیه وايي: "ښاغلي مسؤلین باید په دې برخه کې ځواب ویونکي وي چې په کابل او ځینو ولایتونو کې، هره میاشت یا دوو میاشتو کې یو ځل د برښنا ستنې ویجاړېږي چې له املهیې خلک په تیاره کې اوسېږي. ایا مسؤلین بېپروايي کوي او که د برښنا د ستنو د ساتلو توان نهلري."
د کابل بل او سېدونکی فرهاد د برښنا د ستنو د امنیت د ساتلو ترڅنګ د ازبکستان د وارداتي برېښنا د مزو پرې کولو ته اشاره کوي وايي: "د برښنا پرې کېدل د کابل ښاریانو یوازنۍ ستونزه ده چې تل د جګړو له امله پرې کېږي او حکومت وايي طالبانو پرې کړې دي. باید دې برخې ته پام وشي. د دې ترڅنګ د ازبکستان د وارداتي برښنا پرې کېدل دي. د برښنا شرکت ستونزه له زورواکو سره ده چې حکومت ورسره باید جدي چلند وکړي څو د برښنا لګښت ورکړي."
فرهاد وايي حکومت باید د وارداتي برښنا د ستنو خوندیتوب ته تدابیر جدي کړي.
دغه شکایتونه په داسې حال کې مطرح کېږي چې د یکشنبې په شپه د ازبکستان د وارداتي ۲۲۰ کیلو ولټو برښنا یوه ستنه د میربچه کوټ په ولسوالۍ کې د چاودنې له امله ویجاړه شوه چې ورسره په کابل، لغمان، ننګرهار، میدان وردک، غزني، زابل، لوګر، پکتیا او خوست ولایتونو کې برښنا پرې شوه.
مخکې له دې هم د بغلان ولایت د دوشي په ولسوالۍ کې د جګړو له امله د ازبکستان وارداتي برښنا پرې شوې وه.
د افغانستان برښنا شرکت وايي، برښنا له سیاست سره هېڅ تړاو نهلري او د دولت مخالفین باید خلک د برښنا د نشتوالي له ستونزې سره مخ نهکړي.
د دغه شرکت ویاند وحیدالله توحیدي د دوشنبې په ورځ «۱۳۹۹ کال د غويي ۰۸» ازادي رادیو ته وویل: "د شپې ۹:۳۰ دقیقې وې چې د میربچه کوټ په ولسوالۍ کې د وارداتي برښنا یوه ستنه په ماین ویجاړه شوه. د برښنا شرکت کارکوونکو په دوو شفتونو کې کار پیل کړ، هیله ده دغه برښنا ډېر ژر ترمیم شي."
د کورنیو چارو وزارت ویاند طارق ارین بیا د خلکو د دغو اندېښنو په اړه وایي: "په کومو سیمو کې چې امنیتي ځواکونه موجود دي، د برښنا ستنې په کې خوندي دي، خو څرنګه چې طالبان ترورېستي حملې کوي او بیا بیا د برښنا ستنې ویجاړوي. زموږ هڅه دا ده چې د دغو ستنو امنیت وساتو."
د طالبانو ویاند ذبیحالله مجاهد ازادي رادیو ته په استول شوي پیام کې دغه مسئله رد کړې چې د برښنا ستنې دې د دوی لهخوا ویجاړې شوې وې.
