ولسمشر محمد اشرف غني وايي، د افغانستان هېڅ امنیتي مسئول ددغه هېواد د هېڅ وګړي د وژلو حق نه لري.
ښاغلي غني په کابل کې د جنرال عبدالرازق د ملي پولیسو اکاډمۍ د یوولسمې دورې فارغانو ته په وینا کې وویل، په تېره بیا پولیس باید په تدبیر ګام واخلي او د قانون د تطبیق ممثلین واوسي.
نوموړي په ټینګار سره وویل چې د افغانستان خلک نه غواړي چې پولیس د وژنو مسئول وي، "حتی یو غل هم باید ونه وژني. د اعدام حکم یوازې د محکمې صلاحیت دی."
ولسمشر د پولیسو تازه فارغو شویو افسرانو ته په خطاب کې وویل: "یونیفورم تاسو د اقتدار او درناوي وړ ګرځوي. یونیفورم ته درناوی هغه وخت کېږي چې خلک وویني ستاسو عمل عادلانه، دقیق او سنجول شوی دی. د خلکو اعتماد تاسو په ښو اخلاقو، اغېزناک مدیریت او سم تشخیص ترلاسه کولی شئ چې وشئ کولی سیمه خوندي او امن کړئ. د وسلې د استعمال حق لرئ، خو پولیس باید د قوت د استعمال اندازه ډېر وسنجوي."
که څه هم ښاغلي غني په دې برخه کې کومه مشخصه پېښه یاده نه کړه، خو په دې وروستیو کې د امنیتي ځواکونو په چاپو کې د ځینو کسانو وژل کېدو د خلکو غبرګونونه راپارولي دي.
وروستۍ پېښه یې په کابل کې د یوه پخواني قومندان عبدالستار غوربندي پرضد عملیات و چې د کابل په خیرخانې کې له خپل زوی او درېیو نورو کسانو سره ووژل شو.
ولسمشر همداراز وویل، قاتل، قاچاقبر او غله به وروسته له دې ونه شي کولای د افغانستان پولیس وځوروي او یا یې هم په مرګ وګواښي.
د هغه په خبره، پولیس د ټولنې سخته دنده پرمخ وړي، حقوقو ته یې باید رسیدګی وشي او حکومتي دستګاه ژمنه ده چې له دوی څخه په کلکه ملاتړ وکړي.
نوموړي وویل هغه بیروني کړۍ چې د کورنیو چارو وزارت کې د پولیسو په چارو کې لاسوهنه کوي ،هم باید مداخلې یې بندې شي.
"پولیس د قانون د حاکمیت یو ممثل دی. پولیسو په تېرو اتلسو کلونو کې جګړه کوله اوس باید خپلې اصلي دندې ته راوګرځي. د افغانستان ټول امنیتي بنسټونه په جګړه کې ښکېل کېدای نشي، د پولیسو اساسي دنده د قانون طبیق دی او باید لومړیتوب پیدا کړي. هغه ټولې دندې چې د ملي پولیسو په غاړه دي، باید له سره کتنه پر وشي. په کورنیو چارو وزارت کې باید بیروني مداخلې نورې صفر ته راښکته شي."
ښاغلي غني د پولیسو اصلي دندو ته د راګرځیدو تر څنګ وویل، د افغانستان خلک غواړي چې ملي پولیس بې پرې او سپيڅلي پاتې شي او په خبره یې د پولیسو اړوندې ادارې باید په دې برخه کې خپل ځان ثابت کړي.
په ورته وخت کې د افغانستان د کورنیو چارو سر پرست وزیر مسعود انداربي وویل، نوي فارغ شوي پولیس به د کابل ښار د امنیت لپاره وګمارل شي.
اندرابي زیاته کړه: "زموږ د امنیتي پلان له مخې دغه فارغ شوي پولیس به د کابل ولایت په دوو حوزو او یوه ولسوالۍ کې پر دنده وګمارل شي. ددې ترڅنګ تازه د کاري طرزالعملونو او د حوزو د فعالیت کاري لایحه ترتیب شوې ده او همداراز موږ د کابل د ښه امنیت لپاره ۱۲۰۰ کسان د خپل امنیتي پلان د پلې کېدو لپاره د کابل په ښار کې تازه په دندو ګمارلي دي."
د جنرال عبدالرازق د پولیسو ملي اکاډمۍ په خپلې یوولسمې دورې کې په جنايي، محبس، ترافیک او اوپراتیفي برخو کې ۴۵۵ کسه فارغان ورکړل.
په همدې حال کې د افغانستان د کومانډو له عالي تعلیماتي ښوونځي څخه هم د دوشنبې په ورځ په بیلابیلو برخو کې ۱۰۰۰ کومانډویان فارغ شول.
