کابل چاپ ورځپاڼو په خپلو نننیو ګڼو کې د ګڼو نورو مطالبو تر څنګ د ولسي جرګې او ولسوالیو د شوراګانو د انتخاباتو په اړه هم لیکلي دي.
- دنیا
دنیا خپلواکې ورځپاڼې پهدې اړه په خپله سرمقاله کې لیکلي، په افغانستان کې د انتخاباتو شفافیت په خورا جدي اندېښنې بدل شوی دی.
د سرمقاله لیکونکي په باور د تېرو څو دورو په ځانګړي ډول د ۲۰۱۴ میلادي کال ولسمشریزو انتخاباتو، په یاده پروسه کې د شفافیت پر شتون خلک بې باوره کړي دي.
ورځپانه لیکي:
دمګړۍ ولس په انتخاباتو او د انتخاباتو په شفافیت هېڅ باور نهلري او له همدې امله ټینګار پردې دی چې راتلونکي انتخابات باید د پخوانیو په شان نهوي، بلکې د شفافیت لپاره یې جدي کار وشي.
په سرمقاله کې راغلي، دا هم د ولس غوښتنه ده، هم د ګوندونو او هم د انتخاباتو د ملاتړو بنسټونو او سازمانونو.
- ملي ارمان
ملي ارمان خپلواکې ورځپاڼې بیا په خپل یو مطلب کې لیکلي، د سیاسي ګوندونو او جریانونو یو شمېر مشران د ولسي جرګې د انتخاباتو لپاره د نوملېکنې بهیر ناقص او فساد زېږونکی بولي وايي، دا به ناورین رامنځته کړي، نو ځکه باید باطل اعلان شي.
په مطلب کې راغلي، دغو سیاسي مشرانو د سې شنبې په ورځ په کابل کې تر یوې غونډې وروسته ګډه مطبوعاتي اعلامیه لاسلیک کړه او د نوملېکنې د بهیر باطل کېدل یې وغوښتل.
په مطلب کې راغلي چې پهدغه غونډه کې صلاح الدین رباني، حاجي محمد محقق، ګلبدین حکمتیار، باتور دوستم، انوارالحق احدي، یونس قانوني او یو شمېر نورو سیاسي مشرانو ګډون کړی وو.
- ویسا
ویسا خپلواکې ورځپاڼې بیا په خپل یو مطلب کې د افغانستان د انتخاباتو د خپلواک کمېسیون په حواله لیکلي چې د معترضینو لهخوا د سیمهییزو دفترونو تړل کېدو اندېښمن کړي یو او له حکومته غوښتنه کوو چې ژر تر ژره د تړل شوېو دفترونو په اړه اړین اقدامات وکړي.
په مطلب کې راغلي چې د یاد کمېسیون د معلوماتو له مخې په جوزجان، تخار، فاریاب، سمنګان او سرپل ولایتونو کې د کمېسیون د دفترونو تر تړلو وروسته اعتراض کوونکو تېره ورځ په بلخ کې هم د دغه کمېسیون دروازه وتړله او د کمېسیون مامورینو ته یې د کار اجازه ورنهکړه.
په مطلب کې راغلي چې د افغانستان په شمال کې یاد دفترونه د حکومت لهخوا د فاریاب ولایت د قېصار ولسوالۍ د امنیه قوماندانۍ د سرپرست او جنرال دوستم ته د یو نېږدې کس نظام الدین قیصاري د نیول کېدو په غبرګون د ځايي اعتراض کوونکو لهخوا تړل شوي دي.