د طالبانو له خوا د افغان حکومت د سولې د طرحې نه د يوه فرصت په توګه د استفادې په اړه د ناټو د عمومي سرمنشي له تازه څرګندونو او د ملګرو ملتونو د امنیت شورا له هرکلي وروسته د ولسي جرګې اداري پلاوی وايي، دا شان څرګندونې د حکومت د سولې د وړاندیز نه د نړیوالې ټولنې د ملاتړ ښودنه کوي.
د ولسي جرګې دوهم منشي عرفان الله عرفان د جمعې په ورځ ازادي راډيو ته وویل چې طالبان دې د افغان حکومت او نړیوالې ټولنې دا غوښتنې په جدي ډول تر غور او ارزونې لاندې ونیسي.
ښاغلی عرفان زیاتوي:
"دا چې نړیواله ټولنه د دغه طرحې پر منلو ټینګار کوي دا په دې مانا ده چې نړیواله ټولنه هم د دې طرحې ترشا ولاړه ده او د دغې طرحې نه ملاتړ کوي، خو د دې طرحې د نه منلو په صورت کې د افغان حکومت او نړیوالې ټولنې لهخوا باید د طالبانو په وړاندې يو لړ اقدامات وشي."
ښاغلی عرفان وايي، که څه هم د افغان حکومت لهخوا پهدغه طرحه کې د طالبانو لپاره ډېر ښه موارد ځای پرځای شوي، خو لا هم دغې ډلې په دې تړاو شین څراغ نهدی ښودلی.
دا په داسې حال کې ده چې د ناټو عمومي منشي ینس سټولټنبرګ د افغان حکومت د سولې طرحه د وسلهوالو طالبانو لپاره يو فرصت بللی او دغه ډلې يې غوښتي چې له دغه فرصته په ګټې اخېستنې د سولې خبرو اترو حاضر شي.
ناټو: یو شمېر طالب مشران ښايي د سولې د خبرو لپاره تیاری ولري
نوموړي دا څرګندونې پرون پنجشنبې په بروکسل کې د ناټو په مقر کې د ناټو د ۲۰۱۷ میلادي کال د فعالیتونو د راپور د وړاندې کولو پر مهال وکړې او ويې ویل چې ښايي يو شمېر طالبان خبرو ته امادهګي ولري.
د امریکا دفاع وزیر جېمز مټېس هم له دې مخکې ویلي و چې د طالبانو یو شمېر مشرانو له افغان حکومت سره د سولې خبرو ته لېوالتیا ښودلې.
بل خوا د ملګرو ملتونو د امنیت شورا هم د يوې خبرپاڼې په خپرولو سره طالبانو ته د افغان حکومت د سولې د وړاندیز هرکلی کړی او له دغې ډلې یې غوښتي چې بې د کوم قید و شرط، تهدید او تاوتریخوالي نه دې د سولې دغه وړاندیز ته چې په افغانستان کې تل پاتې سولې ته زمینه برابروي غاړه کېږدي.
«م.م»: طالبان دې د افغان حکومت پیشنهاد پرته له قید او شرطه ومني
افغان ولسمشر اشرف غني درې اوونۍ مخکې د کابل د پروسې په دوهمه غونډه کې د سولې لپاره یوه نوې طرح وړاندې کړه او یو ځل بیا یې وسلهوالو طالبانو ته بې قید او شرطه بلنه ورکړه چې له افغان حکومت سره د سولې خبرو ته کېني.
ښاغلي غني وویل، طالبان به د یوه سیاسي ګوند په توګه په رسمیت وپېژندل شي، د کابل په ګډون په هرځای کې چې وغواړي، د خبرو د پیل لپاره به ورته دفتر پرانېستل شي او زندانیان به یې هم خوشې شي.
په ورته وخت کې يو شمېر افغان کارپوهان د ناټو د عمومي منشي له تازه څرګندونو هرکلی کوي او وايي چې د ناټو او امریکا اوس دې نتیجې ته رسېدلې چې د افغانستان ستونزه نظامي حللاره نهلري او باید له سیاسي لارې حل شي.
د دغو کارپوهانو له ډلې داوود مایار وايي:
"له نیکهمرغه ناټو، امریکا او نور هېوادونه چې ځواکونه يې په افغانستان کې حضور لري، دې مسئلې ته متوجه شوي چې د افغانستان موضوع د جنګ له لارې نه هوارېږي او باید د سولې او خبرو اترو له لارې ورته د پای ټکی کېښودل شي."
ښاغلی مایار وايي، اوس د نړیوالې ټولنې افکار په افغانستان کې د عمومي افکار سره موازي دي چې دا ډېره مهمه مسئله ده.
نوموړی وړاندیز کوي چې مسایل باید داسې مطرح شي چې د دواړو لوریو شرایط پهکې په نظر کې ونیول شي او روانې هڅې يوې نتیجې ته ورسېږي.
راپور: واصل وصال
