کابل چاپ ورځپاڼو په خپلو نننیو ګڼو کې پر کونړ ولایت د پاکستان وروستي توپخانهاي برید ته په پام سره د هغه هېواد د دوه مخي سیاست په اړه یو شمېر لیکنې او سر لیکنې چاپ کړې دي.
- هېواد
هېواد دولتي ورځپاڼې د خپل لومړي مخ په یو مطلب کې په دې اړه لیکلي، د کونړ په دانګام او سرکاڼو ولسوالیو کې د پاکستان پوځ یو وار بیا ۱۸۵ د توپونو ګولۍ راویشتي چې څلور ملکیان پهکې ټپیان شوي دي.
په مطلب کې د سیمې د اوسېدونکو په حواله راغلي چې دغه برید وړمه شپه ۱۰ بجې شوی چې خلکو ته پهکې درانه مالي زیانونه هم اوښتي دي.
- دنیا
دنیا خپلواکې ورځپاڼې په دې تړاو په خپله سرمقاله کې لیکلي، دا کابل ته د پاکستاني چارواکو تر سفر یوازې یوه ورځ وروسته کېږي.
په سرمقاله کې راغلي چې کابل ته د پاکستاني پلاوي په درشل کې افغان چارواکو د دواړو لورو ترمنځ د مهمو هوکړو خبره وکړه، دا یې وښوده چې پاکستان خپلو ټولو پخوانیو کړنو ته شا کړې او تر دې وروسته به د ترهګرۍ سره د مبارزې او د افغانستان د سولې په برخه کې رښتینې همکاري کوي.
سرمقاله لیکونکی لیکي:
امکان نهلري چې د ملي وحدت حکومت مشران دې نتیجې ته نهوي رسېدلي چې اسلاماباد کله هم د اعتماد وړ نهدی، خو په خبرهیې دغو چارواکو وروستي هیله بخښونکې خبرې د عوامو د غولونې او پر دوی د فشارونو له امله کړې دي.
په سرمقاله کې د حکومت له مشرانو غوښتل شوي چې نور په دا شان کړنو او خبرو سره د ملت له برخلیک سره لوبې ونهکړي.
- ملي ارمان
ملي ارمان خپلواکې ورځپاڼې هم د موضوع په تړاو لیکلي دي.
ورځپاڼه په خپله سرمقاله کې لیکي، د پاکستان د توغندیز او توپخانهاي بریدونو په تړاو تر اوسه د افغانستان لهخوا لازم اقدامات نهدي شوي او پاکستانیانو ته دې وضعیت لا جرأت ورکړی چې حملې شدیدې کړي.
سرمقاله لیکونکی سپارښتنه کوي چې افغان حکومت په دې برخه کې له دوو لارو اقدام کولای شي، باالمثل ځواب او د ملګرو ملتونو امنیت شورا ته له دغه هېواد نه شکایت.
په سرمقاله کې راغلي، په داسې مواردو کې خلک امریکا ته هم د انتقاد ګوته نیسي وايي، که هغه هېواد غبرګون نهښيي، نو د دواړو هېوادونو ترمنځ د امنیتي تړونونو لاسلیک او موجودیت څه معنی ورکوي؟
ورځپاڼه د پاکستان سیاست دوه مخی ګڼي وايي، هغه هېواد یو لاس مذاکرې ته را اوږد کړی او په بل کې یې توره ده، په موږ حمله کوي چې په وړاندې یې باید له فعال سیاست او مناسبو اجرأتو نه کار واخیستل شي.