د کندز د خاناباد ولسوالۍ د دوکان ادم خان پر امنیتي پوستې وسلهوالو طالبانو ډلهییز برید کړی چې په پایله کې یې ۱۳ پولیس وژلي دي.
د کندز د خاناباد ولسوالۍ سیمهییزو چارواکو نن یکشنبه ازادي راډیو ته وویل چې تېره شپه ۳ بجې وسلهوالو مخالفینو د نوموړې ولسوالۍ د دوکان ادم خان پر امنیتي پوستې ډلهییز برید کړی وو چې په پایله کې ۱۳ تنه پولیسیې وژلي او یو عراده هاموې ټانګ او نور پوځي تجهیزاتیې له ځان سره وړي دي.
د خاناباد ولسوال حیاتالله امیري د دغې پېښې په اړه وايي:
"تېره شپه درې بجې وسلهوالو مخالفینو د خاناباد ولسوالۍ اړوند سیمو کې یې د دولتي ځواکونو پر امنیتي پوستو برېدونه پیل کړل چې په پایله کې نن سهار ۵ بجې د دوکان ادم خان د سیمې په پوسته کې ۱۳ تنه پولیس وژل شوي او یوازې یو تن پولیس له سیمې ژوندی وتلی دی."
ښاغلي امیري زیاته کړه چې اوسمهال د دوکان ادم خان سیمه د افغان ځواکونو په کنټرول کې ده او د دغې پېښې د څرنګوالي په اړه اړوندو ارګانونو خپلې پلټنې پیل کړې دي.
اوسمهال د دوکان ادم خان سیمه د افغان ځواکونو په کنټرول کې ده.
بلخوا ذبیحالله مجاهد چې ځان د وسلهوالو مخالفینو ویاند معرفي کوي وايي چې د دوکان ادم خان په پوسته کې وسلهوالو طالبانو ۱۷ تنه ملي پولیس وژلي او لا هم په سیمه کې جګړه دوام لري او د کندز-خاناباد لویه لاره هم د ټرافیکو پر مخ تړلې ده.
خو بیا د خاناباد ولسوال وايي چې د کندز-خاناباد لویه لاره د تېر په څېر د ټرافیکو پر مخ خلاصه ده او د دغې لارې په اوږدو کې دمګړۍ کومه ستونزه نهشته.
د کندز-خاناباد پر لویه لاره دغه پېښه په داسې حال کې رامنځته کېږي چې له دې وړاندې هم خلکو شکایت کاوه چې د دغې لويې لارې په اوږدو کې وخت نا وخت وسلهوال مخالفان سړک ته راوځي موټرونه تلاشي کوي او خپلو اهدافو پسې کرځي.
راپور: اجمل ارین
