د افغانستان ولسمشر محمد اشرف غني نن سې شنبه سهار د هند نوې ډېلي ته ورسېد.
د جمهوري ریاست مرستیال ویاند، نجیب ازاد تېره شپه ازادي راډیو ته وویل چې ولسمشر به د هند له صدراعظم نرېندرا مودي سره پر مهمو سیمهييزو مسئلو خبرې وکړي.
ښاغلي ازاد زیاته کړه:
"جمهور رئیس به هلته له نرېندرا مودي، د هندوستان له جمهور رئیس رام نات کووېند او د بهرنیو چارو له وزیرې سوشما سواراج سره ځانګړي ملاقاتونه ولري. په دې ملاقاتونو کې به پر دوه اړخیزو تعهداتو چې مخکې د دواړو هېوادونو ترمنځ شوي، خبرې وشي. په دې خبرو کې به د دواړو هېوادونو ترمنځ پر تجارت، امنیت او نورو سیمهییزو مسئلو، یعنې په افغانستان او سیمه کې د ترهګرۍ پر ضد په مبارزه نظرونه تبادله شي."
د ښاغلي ازاد په وینا، هند ته د جمهور رئیس دا سفر د نرېندرا مودي په بلنه پلان شوی دی.
د هندي مطبوعاتو په حواله، د هند صدراعظم به له ولسمشر اشرف غني سره چې د سیمې په کچه، د نوې ډېلي له مهمو ستراتېژیکو شریکانو دی، پر دوه اړخیزو اړیکو او سیمهييز امنیت په جزئیاتو خبرې وکړي.
انډیا ټوډې ورځپاڼې لیکلي چې ولسمشر غني به همداراز په نوې ډېلي کې د وېوېک انندا نړیوال بنسټ یوې غونډې ته وینا وکړي.
د هند د خارجه چارو وزارت خبرپاڼه وايي، ولسمشر غني به د خارجه چارو له وزیرې سوشما سواراج سره د هند او افغانستان ترمنځ د "پراختیا نوی شراکت" پر پروګرام، د سولې پر هڅو، سیمهییز امنیت، له ترورېزم سره پر مبارزه، ثبات او پراختیايي پروژو هم خبرې وکړي.
ولسمشر غني به همداراز په نوي ډېلي کې د وېوېک انندا نړیوال بنسټ یوې غونډې ته وینا وکړي.
هند ته د ښاغلي غني سفر په داسې وخت کې کېږي چې څو ورځې مخکې د صدراعظم نرېندرا مودي د ملي امنیت سلاکار کابل ته تللی و.
د افغانستان د ملي وحدت حکومت اجرائیه رئیس عبدالله عبدالله او د بهرنیو چارو وزیر صلاحالدین رباني هم نوې ډېلي ته سفرونه وکړل.
سره له دې چې د جمهوري ریاست سرچینې سیمې ته د امریکا د بهرنیو چارو د وزیر رکس ټېلرسن سفر هند ته د ولسمشر غني له سفر سره په ارتباط کې نهګڼي، خو هند ته د ولسمشر غني تر سفر لنډ وخت وروسته به د امریکا د بهرنیو چارو وزیر هم هند ته ولاړ شي.
رکس ټېلرسن به هم له هندي چارواکو سره د افغانستان پر سوله خبرې وکړي او د امریکا د حکومت د نوې ستراتېژۍ پر اساس به بیا له هنده وغواړي چې په افغانستان کې د اقتصادي پروژو په مټ په هغه هېواد کې له سولې او ثبات سره مرسته وکړي.
هند په وروستیو ۱۶ کلونو کې له افغانستان سره د تقریباً درې میلیارده ډالرو مرسته کړې ده.
