د افغانستان د سرحدونو، قومونو او قبایلو چارو وزارت وايي، پاکستان اوس اساسي ټکي ته متوجې شوی او هغه دا چې وروڼه، قومونه په کرښو او اغزن سیم نهشي بېلېدی.
د دغه وزارت مرستیال ننګیالي قلاتوال د سې شنبې په ورځ له ازادي راډیو سره په خبرو کې د ډیورند کرښې په اړه د پاکستان د تحریک انصاف ګوند د وروستیو څرګندونو هرکلی وکړ.
ښاغلي قلاتوال زیاته کړه:
"کومې څرګندونې چې عمران خان کړي، موږ د ده د خبرو هرکلی کوو، دوی په ډېر اساس وخت کې دې ټکي ته متوجې شول په داسې حال کې چې د دوو هېوادونو روابط ښه نهدي، هیله لرو چې دا ډول څرګندونې د دواړو هېوادونو پر اړیکو ښه اغېز وکړي."
عمران خان له امریکا غږ اشنا راډیو سره په تازه مرکه کې ویلي، د افغانستان او پاکستان ترمنځ د دوامداره اړیکو د خوندي ساتلو په هدف ازاده سوداګري او پرانیستي سرحدونه ضروري دي، ځکه د ده په خبره افغانستان په وچې پورې تړلی او د پاکستان بندرونو ته اړ دی.
عمران خان وایي، د ډیورند کرښې په اوږدو کې د اغزن تار پر ځای په کار ده چې د دواړو هېوادونو ترمنځ ازاده سوداګري او پرانیستی سرحد موجود وي.
دا په داسې حال کې ده چې د راپورونو له مخې پاکستان څه موده وړاندې د ډیورند په ۲۶۰۰ کېلو متره اوږدې کرښې د اغزن سیم لګولو کار پیل کړی دی.
د افغانستان د سرحدونو، قومونو او قبایلو چارو وزارت وايي، د پاکستان دا اقدام د کرښې دواړو غاړو ته د پرتو قومونو له کلک مخالفت سره مخ شوی چې د دوی په وینا اوسیې په ځینو ځایونو کې کار درول شوی.
کابل د ډیورند کرښه چې په ١٨٩٣ میلادي کال کې په هند کې د بریتانیې په استعماري دوره کې ایستل شوې وه، نهمني.
بلخوا د افغانستان د ولسي جرګې یو شمېر غړي دغو څرګندونو ته د شک په سترګه ګوري وايي چې عمران خان په راتلونکو انتخاباتو کې د پښتنو د ملاتړ خپلولو په هدف دا شان څرګندونې کوي.
د دغې جرګې غړي نادر خان کټوازي ازادي راډیو ته وویل، عمران خان په دې خبرو سره غواړي په راتلونکو انتخاباتو کې د افغان حکومت پام هم ځان ته واړوي.
دی وايي:
"عمران خان د راتلونکو انتخاباتو لپاره دا ډول څرګندونې کوي چې په پاکستان کې د پښتنو نظر د ځان لپاره ښه کړي او افغان حکومت ته داسې جوته کړي چې عمران خان د افغانانو په ګټه خبره کړې ده، اوس داسې څه امکان نهلري، ځکه په پاکستان کې د عمران خان خبره څوک نهاوري او نه د پاکستان په پوځیانو باندې د هغه خبرې کوم اغېز لري."
په ورته وخت کې د افغانستان د مشرانو جرګې دوهم مرستیال وايي چې د افغانستان په اړه د پاکستان سیاست او پالېسي د هغه هېواد د پوځ په لاس کې ده.
اصف صدیقي ازادي راډیو ته وویل، هېڅکله به هم د ډیورند کرښې په اړه د پاکستان د مرکزي حکومت پالېسي بدله نهشي او نه به له افغانستان سره ازاد تګ راتګ ته اجازه ورکړي.
راپور: رحمتالله افغان
