د کندز سیمهییز چارواکي وايي چې د دې ولایت په یو شمېر سیمو او ولسوالیو کې وسلهوالو طالبانو رونیز مرکزونه جوړ کړي او په دې مرکزونو کې کم عمر لرونکو ځوانانو ته پهکې د ځانوژونکو حملو، ماین جوړونې، د ترهګرۍ، سخت دریځۍ او نورو ترورېستي برېدونو په برخه کې زدکړې ورکوي.
که څه هم د کندز وضعیت ظاهراً ارامه بریښي، خو د دغه ولایت اوسېدونکي وايي چې په سیمه کې وسلهوالو طالبانو روزنیز مرکزونه جوړي کړي چې د خلکو په وینا، طالبان په کې تنکيو ځوانانو ته پوځي زده کړې ورکوي چې دا موضوع د سیمې د امنیت او د راتلونکي په اړه یې ژورې اندېښنې زېږولي دي.
د کندز امنیه قوماندان جنرال عبدالحمید حمیدي ازادي راډيو ته وویل چې د دې ولایت په چهاردرې، دشتارچې او امام صاحب ولسوالیو کې د وسلهوالو مخالفينو روزنیز مرکزونه موجود دي.
ښاغلی حمیدي زیاتوي چې په دې وروستیو کې د افغان هوايي ځواکونو د دې ولایت په دشتارچي ولسوالۍ کې د وسلهوالو مخالفينو دوه مهم مرکزونه لهمنځه وړي دي:
ښاغلي حمیدي وویل:
"دا یو حقیقت دی چې وسلهوالو مخالفینو په ځانوژونکو او نورو ترورېستي برېدونو کې له تنکیو ځوانانو کار اخلي او د دوی په لیکو کې موجود هم دي، ځکه طالبان خپلو اهدافونو ته د رسېدو په خاطر، له هر ډول وسیلې څخه کار اخلي."
ښاغلي حمیدي وویل چې له ماشومانو څخه په جګړه کې ګټه اخیستنه د انسانیت او بشریت خلاف کار دی.
امنیه قوماندان زیاته کړه چې دوی هڅې کوی، څو په دې ولایت کې د وسلهوالو مخالفینو ټول روزنیز مرکزونه لهمنځه یوسي.
په ورته وخت کې په کندز کې د سیمهییزو پولیسو یو تن قوماندان چې د نوم له ښودلو یې ډډه وکړه، ازادي راډيو ته په دې اړه وویل:
"دوی ته په جګړه کې په لوډسپیکرونو کې ترانې، تلاوت او تبیلغ اورول کېږي چې په جنګ که مخامخ ووژل شي، څه ثواب لري او چې له شا ووژل شي، څه ثواب لري او ډېری دغه ځوانان د ۱۵، ۱۶،۱۷ او ۱۸ کاله عمرلونکي دي."
خو د کندز په قلعۀزال ولسوالۍ کې د سیمهییزو پولیسو یو بل قوماندان بیا وايي چې د طالبانو ډېری روزنیز مرکزونه په چهاردرې او دشت ارچي ولسوالیو کې موجود دي.
دی وایي:
"د کندز په دشتارچي او چهاردرې ولسوالیو کې د طالبانو ترهګریز مرکزونه موجود دي او دې مرکزونو ته تنکي ځوانان جلب او جذبوي او موږ په جګړه کې یو کس ژوندی ونیو چې ډېر وړوکی ماشوم و."
بلخوا د کندز د ولایتي شورا رئیس امرالدین ولي بیا وايي چې لا هم په دې ولایت کې وسلهوالو مخالفین خپل ترورېستي روزنیز مرکزونه لري.
ښاغلي ولي زیاته کړه:
"دا د دولت ضعف ښکاره کوي چې تر اوسه پورې دوی په دې ولایت کې د طالبانو رونیز مرکزونه لهمنځه نه دي وړي، خو موږ په ارچې کې د د طالبانو د رونیز مرکز په اړه خبرې کوو، حال دا چې طالبان د کندز په مرکز پورې اړوندو سیمو کې هم خپل روزنیز مرکزونه لري."
د یادونې وړ ده، څه موده وړاندې په کندز ښار کې یو ماشوم چې د پولیسو لهخوا د ځانوژونکي حملې تر سره کولو په تور نېول شوی و، هغه وايي چې د کندز امام صاحب ولسوالۍ ته د دینې زدګړو په خاطر راغلی و، خو په مدرسه کې ده ته د ښوونکي لهخوا د ترورېستې برېدونو او ځانوژونکو حملو روزنه ورکړل شوې ده.
دغه ماشوم وایي:
"زه خپلو ورونو سره امام صاحب ولسوالۍ ته د دیني زدهکړو په خاطر راغلی وم، نو بیا مولوي ذکي راته روزنه راکوله او زما په ژبه یې پېچکاري را ولګوله او بیا یې زما په کچه د انتحاري حملې واسګټ را جوړ کړی و او مولوي ذکي راته وویل چې زه سبا تا انتحاري حملې ته بیایم او د پولیسو پر حوزې باندې انتحاري حمله وکړه او مړ به شي، لاړ به شې جنت ته، هلته ګلان او باغچې دي."
په ورته وخت کې د کندز د امام صاحب ولسوالۍ د سیمهييزې شورا یوه غړي سلطانخان بیا وايي چې اوس مهال د دې ولسوالۍ د ځنګل په سیمه کې وسلهوالو طالبانو او بهرنیو جنګیالیو د ترورېستې بریدونو مرکزونه جوړ کړي دي.
سلطانخان وویل:
"د امام صاحب ځنګل د طالبانو مرکز دی، په ځنګله کې طالبان خپل ځانوژونکي، ماین جوړوونکي او ترورېستان روزي، خو موږ تل خپل غږ اوچت کړی دی، خو هېچا هم زموږ غږ نهدې اورېدلی."
بلخوا د کندز د امنیې قوماندانۍ یوه جګ پوړي چارواکي چې د نوم له ښودلو یې ډډه وکړه، ازادي راډيو ته وویل چې اوس مهال د دې ولایت په دشتارچې او چهاردرې ولسوالیو کې وسلهوال طالبان خپل ترورېستي او ترهګریز مرکزونه لري او تنکي ځوانان جذبوي او هلته ورته د ځانوژونکو حملو، ماین جوړونې، ترهګري او سخت دریځي زده کوي چې دغه دوه ولسوالۍ د طالبانو له مهمو مرکزونو څخه شمېرل کېږي.
د سرچینې په وینا، د دې ولایت په یو شمېر نورو سیمو کې هم طالبان خپل روزنیز مرکزونه لري او تنکیو ځوانان ته پهکې ترورېستي زدکړې ورکول کېږي.
خو په همدې حال کې ذبیحالله مجاهد چې ځان د وسلهوالو طالبانو ویاند معرفي کوي، د کندز د سیمهییزو چارواکو دغه خبرې ردوي چې ګواکې وسلهوال طالبان په جګړو او نورو برېدونو کې له تنکیو ځوانانو ګټه اخلي.
نوموړی وايي چې دوی د هېواد په بېلابېلو ولایتونو کې خپل رونیز مرکزونه لري، خو هغه ځوانان چې عمرونه یې له ۲۰ کلونو کم وي، نو دوی په خپلو لېکو کې ورته د فعالیت اجازه نه ورکوي.
راپور: اجمل آرین
