د افغانستان د مشرانو جرګې غړي د کابل زنبق څلور لاري ته څېرمه موټر بم حمله یوه پېچلې مسئله یادوي او ټينګار کوي چې باید په دې تړاو هر اړخېزې څېړنې وشي.
سناتور عبدالله قرلق د مشرانو جرګې د یکشنبې ورځې په عمومې غونډه کې وویل، داسې اسناد په لاس لري چې دغه موټر بم حمله په کابل کې د ایران سفارت له لوري پلان شوې وه.
نوموړي وویل:
"دا د ډېر غور وړ مسئله ده، کوم معلومات چې موږ لرو، دا حمله د پاکستان د استخباراتو لهخوا طرحه شوې ده، دا حمله د حقاني شبکې او ایران سفارت په مرسته تر سره شوې ده او باید پهدې اړه هر اړخېزې څېړنې وشي."
د چهارشنبې په ورځ د کابل ښار په زنبق څلورلاري کې موټر بم برید وشو چې د مسؤلینو په خبره، شااوخوا ۹۰ کسان په کې ووژل شول او ۴۰۰ نور ټپیان شول.
پاکستان په کراتو د افغانستان له خوا د تروریستانو په ملاتړ تورن شوی او دا مهال د نړۍ یو شمیر چارواکي په ځانګړي ډول امریکا هم ویلي چې تروریستان په دغه هېواده کې خوندي پټن ځایونه لري.
خو دا لومړی ځل دی چې د افغانستان د مشرانو جرګې لهخوا ایران د کابل په خونړۍ حمله کې تورن شوی.
یو شمېر سناتوران وايي، ایران تر دې وړاندې هم د افغانستان په ناامنیو په ځانګړي ډول وسلهوالو طالبانو ته د وسلو ورکولو او سوریې ته د افغانانو په لېږلو کې ښکېل و.
فضل الهادي مسلمیار د مشرانو جرګې د یکشنبې ورځې په عمومې جلسه کې وویل چې پاکستان او ایران پهدې هڅه کې دي چې په افغانستان کې د قومونو تر منځ نفاق او بېلوالی رامنځ ته کړي او حکومت باید د یادې پېښې عاملین معلوم کړي.
نوموړي وویل چې د کابل د چهارشنبې ورځې موټر بم چاودنه نه هېرېدونکې پېښه ده.
ښاغلي مسلمیار وویل:
"پرته له شکه، د کابل د چهارشنبې ورځې حمله ډېره خطرناکه وه، موږ د دغې پېښې د دقېقې پلټنې غوښتنه کوو، لکه څنګه چې سناتور قرلق وویل، د هغوی د معلوماتو له مخې پهدې پېښه کې د سفارتونو له کارت نه استفاده شوې ده، قرلق صیب د ایران نوم واخېسته، دا باید واضح شي، خو موږ باید خپل مسؤلیت پهدې برخه کې ادا کړو، امنیتي مسؤلین وغواړو او ترې پوښتنه وکړو."
خو یو شمير نور سناتوران بیا پر کشفي او استخباراتي ادارو انتقادونه کوي چې د ترورېستانو په پېژندلو کې پاتې راغلي دي.
مشرانو جرګې پرېکړه وکړه چې د چهارشنبې په ورځ به امنیتي او استخباراتي چارواکي د کابل د وروستۍ حملې په تړاو خپلې غونډې ته راوغواړي.
خو دا چې د کابل د وروستۍ خونړۍ حملې څېړنې چېرته رسېدلې دي او پهدې پېښه کې کوم هېواد لاس لري، د جمهوري ریاست مرستیال ویاند نجیب ازاد پدې اړه وویل:
"داسې شواهد تر اوسه افغان حکومت نهلري چې وښیې، د کابل د چهارشنبې ورځې په حمله کې دې د ایران سفارت لاس وي، خو پهدې اړه جدي څېړنې روانې دي."
په همدې حال کې د افغانستان ولسي جرګې هم د چهارشنبې ورځې د حملې په تړاو دوه فوقالعاده غونډې تر سره کړې دي.
د دغې جرګې دوهم مرستیال محمد نذیر احمدزي وویل چې د دغې جرګې غړو هم پهدې بحث وکړ چې هغه کسان باید محاکمه شي چې د کابل په وروستۍ خونړۍ حمله کې یې غفلت کړی.
خو تر اوسه په کابل کې د ایران سفارت د سناتورانو وروستیو تورورنو په اړه څه نهدي ویلي.
راپور: ناجیه ساپۍ
