په پېښور کې د مدني ټولنې او یو شمېر سیاسي ګوندونو غړو پرون شنبه د افغانستان له خلکو سره د یووالي څرګندولو او د ترورېزم د غندلو لپاره مظاهره وکړه.
هغوی په کابل کې د وروستیو خونړیو پېښو د قربانیانو د درناوي لپاره شمعې بلې کړې وې او پر نړیواله ټولنه یې غږ وکړ چې په سیمه کې د ترورېزم د ختمولو لپاره عمل وکړي.
د پاکستان د عوامي نشنل ګوند د ځوانانو د چارو مشرې پلوشې عباس تیره شپه له ازادي راډیو سره په مرکه کې وویل چې د دې سوله ییز اعتراض هدف په سیمه کې روان وضعیت ته د دواړو هېوادونو د حکومتونو او نړیوالې ټولنې پام اړول وو.
پلوشه عباس وايي:
"موږ افغانستان کې د وروستیو حملو خلاف چې د روژې په میاشت وشوې، مظاهره وکړه. موږ دا ویل چې له خپلو افغان خویندو او وروڼو سره پهدې غم کې شریک یو. موږ له ټولې دنیا دا غوښتنه وکړه چې امن غواړو، زموږ په سیمه کې چې څه روان دي، د دې ترهګرۍ خلاف موږ غږ پورته کړ. د پېښور پښتانه، لر او بر له افغانانو سره پهدې سخته شېبه کې شریک ولاړ دي."
پلوشې عباس زیاته کړه چې په پېښور کې په پرونۍ مظاهره کې د افغانستان او پاکستان له حکومتونو غوښتنه وشوه چې د امنیت ټینګولو لپاره جدي خبرې وکړي څو د دواړو هېوادونو راتلونکي نسلونه د ترورېزم قرباني نهشي.
د چهارشنبې په ورځ د کابل پر "ذنبق" څلور لاري په درنه چاودنه کې تر ۵۰۰ زیات کسان ووژل او زخمیان شول.
تر دې پېښې وروسته، د فرانسې حکومت له افغانانو سره د خواخوږۍ لپاره د ایفل برج برق ګل کړ او د اسټرالیا د پارلمان غړو د خپلې غونډې په پېل کې یوه دقیقه چوپتیا غوره کړه.
په کابل کې د جمعې په ورځ په مظاهره کې هم د تشدد له امله هم څلور تنه ووژل او تر ۱۵ زیات زخمیان شوي ول.
د افغانستان عامې روغتیا وزارت وايي چې پرون شنبه د افغانستان د مشرانو جرګې د لومړي مرستیال د زوی د جنازې پر مراسمو په حمله کې هم اووه تنه وژل شوي او ۱۱۹ تنه زخمیان شوي دي.
د ایران دولتي خبري اژانس "ایسنا" وايي چې د مشهد خلکو هم د شنبې په ورځ له افغانانو سره د خواخوږي لپاره غونډه کړې وه.
د مشهد یو شمېر خلک او هلته مېشت افغان کډوال د افغانستان د "سرقونسلګرۍ" د ودانۍ مخې ته را غونډ شوي وو او په کابل کې د وروستیو حملو د قربانیانو د درناوي لپاره یې شمعې بلې کړې وې.
د افغانستان د حکومت دواړو مشرانو، د ملګروملتونو اود عفوې نړیوال سازمان، د امریکا متحدو ایالاتو او د افغانستان د ګاونډیو هېوادونو په ګډون د نړیوالې ټولنې بېلابېلو غړو د تشدد دا لړۍ غندلې او له افغانانو سره یې خواخوږي کړې ده.
