د امریکا ولسمشر د ناټو له غړو هېوادونو وغوښتل چې د ناټو د لګښتونو په منلو کې له امریکا سره اوږه ورکړي.
ولسمشر ټرمپ پرون په بروکسل کې د ناټو په نوې ودانۍ کې د وینا پرمهال د ناټو له نورو ۲۷ غړو هېوادونو وغوښتل چې د دې ټلوالې د تمویل په برخه کې خپله ونډه زیاته کړي.
دا په داسې حال کې ده چې د ناټو مشران د دې ټلوالې د راتلونکې او نورو نړیوالو مسایلو په اړه د بحث لپاره پرون په بروکسل کې راغونډ شوي وو.
ښاغلي ټرمپ چې د انتخاباتي کمپاین پر مهال ناټو اضافي بار او بې ګټې ټلواله بلله پرون وویل، که د ناټو ټول غړي د خپل کورني ناخالص تولید په سلو کې دوه د ناټو مالي لګښتونو ته ځانګړي کړي، نو دا ټلواله به تر پخوا زیاته غښتلې شي.
نوموړی وايي:
"د ناټو له ۲۸ غړو څخه ۲۳ یې تراوسه هغه ونډه چې باید وریې کړي او هغه لګښت چې باید د ځان د دفاع لپاره یې پرې کړي نه ورکوي. دا د امریکا د خلکو او مالیه ورکوونکو لپاره منصفانه نهده. اکثر دا هېوادونه له پخوانیو کلونو ډېر زیات پوروړي دي او هغه یې هم نهدي پرې کړي. په تېرو اتو کلونو کې متحد ایالاتو پر دفاعي چارو د ناټو د نورو ټولو غړو تر ونډې زیاتې پیسې لګولي دي. که پروسږکال د ناټو ټولو غړو، د خپل ناخالص ملي تولید په سلو کې یوازې دوه پر دفاعي برخه لګولي وای، اوس به موږ د ډله ییزې دفاع او د ناټو د نورو امکاناتو د تمویل لپاره ۱۱۹میلیارډه ډالر اضافي پیسې لرلې."
ولسمشر ټرمپ وویل، ناټو په راتلونکي کې باید د ترورېزم پر ضد مبارزې، د کډوالو ستونزې، د روسیې لهخوا پېښو ګواښونو او د ناټو د ختیځو او جنوبي پولو ساتنې ته پاملرنه زیاته کړي.
د ناټو د غړو هېوادونو مشرانو په دې هیله چې ښاغلي ټرمپ ته ثابته کړي چې د ترورېزم پرضد د مبارزې لپاره د ناټو موجودیت د توجیه وړ دی پرون په هنري ډیزاین جوړه شوې د ناټو د مرکزي قرارګاه نوې ودانۍ چې شاوخوا یو میلیارد ډالر لګښت پرې راغلی، پرانیستله.
د ناټو په سلو کې نژدې۷۰ برخه لګښت دا مهال امریکا ورکوي.
د ناټو غړو له دې مخکې ژمنه کړې وه چې خپل دفاعي لګښتونه به تر ۲۰۲۴ کال پورې د خپل ناخالص ملي تولید په سلو کې دوو ته لوړوي خو دا ژمنه یوازې بریتانیا، استونیا، یونان، پولنډ او متحدایالاتو عملي کړې ده.
