د جوزجان ولایتي چارواکي وايي چې داعش یا د اسلامي دولت وسلهوالو سخت دریځو په دغه ولایت کې د نړیوال سره صلیب ۶ کارکوونکي وژلي دي.
د جوزجان والي الحاج مولوي لطفالله عزیزي ازادي راډیو ته وویل چې دا پېښه نن چهارشنبه د جوزجان ولایت په قوشتپې ولسوالۍ کې وشوه.
دی وايي:
"نن سهار شااوخوا لس بجې د چخمه چقور په نوم سیمه کې چې قوشتپې ولسوالۍ ته نېږدې ده او د جوزجان ولایت له مرکزه تقریباً شپېته کېلو متره لیرې ده، داعشیانو دا کسان ووژل."
د جوزجان والي ښاغلي عزیزي همداراز وویل چې د سره صلیب ۵ مأمورین او ۳ موټر چلوونکي سیمې ته تللي و چې د سیمې اوسېدونکو ته د څارویو خوراک توزېع کړي خو هلته د داعش ډلې د مسؤل قاري حکمت کسانو د دې کمېټې شپږ کارکوونکي سم له واره وویشتل او دوه تنه نور یې له ځان سره یووړل.
د سره صلیب د نړیوالې کمېټې ویاند توماس ګلاس هم تائید کړه چې د دوی ۶ کارکوونکي وژل شوي او دوه نور کارکوونکي له حملې وروسته بېدرکه شوي دي.
د جوزجان والي وايي چې د سره صلیب د وژل شویو کارکوونکو مړي د سپین ږېرو په هڅه د ولایت مرکز ته انتقال شوي دي.
داعش وسلهوالو تر دا مهاله په جوزجان کې د سره صلیب د وژل شویو کارکوونکو په اړه څه نهدي ویلي.
