د کندز د ولایتي شورا غړي وايي، د "پامیر ۱" په نوم ژمني تصفیوي عملیاتو سستوالي اندېښمن کړي او وايي، په دې عملیاتو کې تر اوسه پورې هېڅ پرمختګ نهدی شوی.
یاد وکیلان د دې ولایت سیمهییز چارواکي په بېکفایتۍ تورنوي او زیاتوي چې د "پامیر ۱" په عملیاتو کې هېڅ پرمختګ نهدی شوی.
دوی وايي، د دې عملیاتو له کبله په لسګونه کورنۍ په دې ژمي کې له خپلو سیمو څخه بېځایه شوي دي.
د کندز د ولایتي شورا غړي صفیالله امیري له ازادي راډيو سره په خبرو کې وویل:
"سیمهییز چارواکي وايي چې زموږ عملیات دوام لري، خو په دې عملیاتو کې د دولت تر کنټرول لاندې سیمو کې هېڅ بدلون نهدی راغلی او پرمختګ نهلیدل کېږي، اما په دې عملیاتو کې وسلهوالو طالبانو پرمختګ کړی دی."
څه باندې یوه اوونۍ شوې چې په کندز کې افغان ګډو ځواکونو د وسلهوالو مخالفینو د ځپلو په هدف د "پامیر ۱" تر نوم لاندې ژمني عملیات پیل کړي او جریان لري، خو د دې ولایت اوسېدونکي وايي چې لاهم امنیتي ګواښونه پر خپل ځای دي.
په ورته وخت کې د ولایتي شورا یوه غړې فوزیه یفتلي بیا وايي چې د دغو عملیاتو له کبله په دې ژمي کې لسګونه کورنۍ له خپلو سیمو څخه بېځایه شوي دي.
مېرمن یفتلي زیاتوي:
"په دې روانو عملیاتو کې هېڅ پرمختګ نهدی شوی، ځکه دولتي ځواکونه په خپلو ځایونو کې دي، موږ له جګ پوړو دولتي چارواکو څخه غواړو، څو ډېر ژر د وسلهوالو مخالفینو تر کنټرول لاندې سیمې تصفیه کړي چې بېځایه شوي خلک بېرته خپلو سیمو ته ولاړ شي."
بلخوا د کندز امنیه قوماندان جنرال عبدالحمید حمیدي بیا وايي، د عملیاتو په پیل کې دلته نهو او تازه د دې ولایت د امنیه قوماندان په توګه مقرر شوی دی، خو زیاتوي چې په روانو عملیاتو کې دولتي ځواکونه ښه لاسته راوړنې لري.
نوموړي زیاته کړه:
"موږ یو شمېر سیمې له دښمن څخه تصفیه کړي دي او موږ د پلان له مخې په تصفیه شويو سیمو کې تحکیمات کوو او اوسمهال زموږ ځواکونه پر تحکیماتو بوخت دي او لاهم عملیات په سیمې کې جریان لري."
په همدې حال کې د کندز ښار اړوند د بُز کندهاري، د عربانو، حضرت سلطان، التي ګُنبد، آلچین همدارنګه د نورو سیمو خلک بیا وايي، د دغو روانو پوځي عملیاتو له کبله په لسګونه کورنۍ په دې ژمې کې له خپلو سیمو څخه بېځایه شوي دي او یو شمېر خلک زیانمن شوي هم دي.
د دغو سیمو اوسېدونکي له دولت څخه غواړي چې ژر تر ژره دغه تصفیوي عملیات پای ته ورسوي، څو بېځایه شوي خلک بېرته خپلو کورونو ته ولاړ شي.
راپور: اجمل ارین
