د هلکانو لهخوا د ناسمو کلیمو استعمالول، تعقیبول، لاس اچونه او ان پر مخ د تېزابو شیندل هغه ځورونې دي چې په کابل ښار کې د ښوونځیو نجونې زدهکونکې ورڅخه شکایت کوي.
دغو نجونو د دوشنبې په ورځ ازادي راډیو ته وویل چې دې ستونزو ښوونځيو ته د دوی تګ ستونزمن کړی او ډېری وخت د همدې ستونزو له کبله دوی اړ شي چې ښوونځي ته د کورنۍ له یوه غړي سره ولاړې شي.
په کابل ښار کې د درېیم مکروریان د الفتح لیسې د دولسم ټولګي زدهکونکې نیلاب وایي چې کله نا کله د یو شمېر پولیسو لهخوا هم ځورول کېږي.
نوموړې وايي:
"په اوس وخت کې هلکان ډېرې نجونې ځوروي، د ښوونځيو خوا کې ولاړ وي هره نجلۍ چې یې تر نظر لاندې وي تر کورهیې رسوي، ستونزهیې ورته جوړه کړې وي او ان اخطار ورکوي چې تا وهم او اختطاف کوم دې او پر مخ دې تېزاب شیندم، یو وار مې وغوښتل چې پولیسو ته شکایت وکړم پولیس خپله راته سترګه ووهله، یو وار مخکې هم د پولیسو رنجر ولاړ و او ډېره بده خبرهیې راته وکړه، موږ خپل شکایت چا ته وکړو پولیس خپله موږ ته ستونزې جوړوي."
د دغو زدهکوونکو له ډلې څخه یوه بله زدهکوونکې هم وایي چې کوڅه ډبه هلکانو د ښوونځیو په خوا کې کمین نیولی وي او نجونو ته سپکې سپورې وايي.
دا وايي:
"زما نوم ماه جبین دی، د اووم ټولګي زدهکوونکې یم دلته هلکان ولاړ وي یو شمېر یې ان سپکې سپورې نجونو ته کوي او ډېر بد رد وایي."
دا په داسې حال کې ده چې موده مخکې د کوڅه ډبو هلکانو لهخوا د ښځو او نجونو د ځورونې د مخنیوي په خاطر پولیسو ته د احوال رسولو یو اپلېکېشن هم د امریکا متحده ایالاتو د پرمختیایي ادرې لهخوا ډېزان او ګټې اخیستلو ته وړاندې شوی و.
خو دغه اپلېکېشن په پرمختللو ټیلیفونونو کې د استعمال وړ دی او ترڅنګیې ښځینه زدهکوونکې ښوونځیو ته د ټیلیفون وړلو اجازه هم نهلري نو له همدې کبله د یاد اپلېکېشن څخه دغه زدهکونکې د ځورونې پر مهال ګټه نهشي اخېستلی.
په کوڅو کې د خلکو لهخوا د نجونو ځورول او لفظي شخړې یوازې هغه ستونزې نهدي چې په افغانستان کې نجونې ورسره مخ دي، بلکې د معلوماتو له مخې کورني تاوتریخوالی، ناسمې تبعیضي رویې او د زدهکړو څخه محرومېدل هغه ستونزې دي چې په افغانستان کې ښځینه ورسره مخ دي.
د چارو شنونکي په دې باور دي چې بېروزګاري، بېسوادي، ناسم باورونه او عاملینو ته جزا نهورکول د دې لامل شوي چې دغه ناسم چلند او د کورونو بهر د نجونو ځورولو ناوړه پدیده عامه شي او ورځ تر بلې پرمختګ وکړي.
په ورته وخت کې د کورنیو چارو وزارت مرستیال ویاند نجیبالله دانش وایي، پولیسو ته دنده سپارل شوې چې هغه کسان کوم چې ښځې او نجونې ځوروي ویېنیسي.
ښاغلي دانش زیاته کړه:
"هغه ښځې چې ښوونځي ته ځي او په کوڅو کې چې څوکیې ځوروي، موږ روزانه له ۱۰ څخه تر ۱۵ پېښې لرو چې د کابل پولیس دوی پېژني او نیسي یې، ټولو پولیسو ته دنده سپارل شوې، هغه کسان چې خلک باالخصوص ښځې ځوروي هغوی ونیسي."
دغه ښځینه زدهکوونکي په دې ټینګار کوي که حکومت په کوڅو او د ښوونځیو شاوخوا د دغو کوڅه ډبو هلکانو مخه ونهنیسي، دا کار به د دې لامل شي چې کورنۍ پر دوی قیودات ډېر کړي او ښايي په یو شمېر مواردو کې د دوی د زدهکړو مخه هم ونیسي.
دا په داسې حال کې ده چې په افغانستان کې د ښځو چارو وزارت د ښځو په وړاندې د تاوتریخوالي د مخنيوي په خاطر په ټول افغانستان کې یو ۱۶ ورځني کمپاین هم پیل کړی دی.
راپور: سباوون کاکړ