په امریکا کې د افغانستان سفیر په دې باور دی چې د ترورېستانو د له منځه وړلو او په افغانستان کې د امنیت د ټېنګېدو لپاره باید د امریکا فشار پر پاکستان زیات شي.

حمد اله محب ازادي راډیو ته وویل:

"د سولې او امنیت لپاره پر پاکستان د امریکا فشار ضروري دی. دا د افغانستان د خلکو او حکومت غوښتنه ده. د دې ترڅنګ د متحده ایالتونو د خپلو اتباعو او نظامیانو د خوندیتوب او نړیوال امنیت لپاره هم دا ضروري ده."

په واشنګټن کې د افغانستان سفیرپه داسې وخت کې دا خبره کوي چې د شنبې په ورځ د امریکا بې پیلوټه الوتکو د پاکستان د خاورې دننه د طالبانو مشر ملا اختر محمد منصور وواژه او د پاکستان د کورنیو چارو وزیر چوهدري نثار علي خان ویل چې دا برید د نړیوال قانون خلاف و.

دا دوهم ځل دی چې امریکا د پاکستان د خاورې دننه مشخص هدف په نخښه کوي، تر دې مخکې یې په ۲۰۱۱ کال کې په ایبټ اباد کې د اسامه بن لادن پرضد عملیات کړي و چې هغه وخت هم اسلام اباد د امریکا حمله د پاکستان د مځکنۍ بشپړتیا پر ضد ګنلې وه.

البته امریکا په قبایلي سیمو کې وخت په وخت د بې پيلوټه الوتکو بریدونه کړې دي.

د فاریاب د فوټبال ټیم د لوبغاړي فرهاد عادل زندۍ شوی جسد په هرات ولایت کې موندل شوی دی.

د فاریاب د فوټبال ټیم ( سرسبز یاشلر) اعلان کړی چې پر هغه لومړی برید شوی او بیا یې جسد ځوړوند شوی دی.

په هرات کې د طالبانو چارواکو تر اوسه په دې اړه څه نه دي ویلي.

د افغانستان د فوټبال فدراسیون په فیسبوک کې په یوه پیغام کې فرهاد عادل د سرسبز یاشلر ټیم پخوانی لوبډلمشر یاد کړی او د هغه وژنه یې تایید کړې ده.

د فوټبالر د وژل کیدو په اړه نور جزئیات نه دي ورکړل شوي.

ټاکل شوې وه چې هغه د دوشنبې په ورځ د افغانستان د کورني فوټبال د اتلانو لیګ کې له خپل ټیم سره ملګری وي.

ایران پرون او وړمه ورځ ۲۹۲ افغان زندانیان افغانستان ته لیږدولي دي.

دا خبره په تهران کې د طالبانو د حکومت شارژدافیر ( د سفارت سرپرست) فضل محمد حقاني تېره شپه ناوخته( یکشنبه د لیندۍ دویمه) ازادۍ راډیو ته وکړه.

ایرانۍ رسنۍ وایي چې پر بېلابیلو جرمونو محکومو شویو دغو افغانانو په ایران کې د محکومیت دوره تیره کړې، خو د قانوني پړاوونو د بشپړولو لپاره د طالبانو د حکومت اړوندو ادارو ته معرفي شوي دي.

معلومه نه ده چې ایران کې دا مهال څه شمېر افغانان بندیان دي، خو طالب او ایراني چارواکو په دې وروستیو کې د بندیانو د تبادلې پروسه ګړندۍ کړې ده.

تیره اونۍ د ایران د بشري حقونو سازمان ازادۍ راډیو ته ویلي و چې د سږ میلادي کال له پيله ایران کې ۷۲ افغانان اعدام شوي چې په خبره یې د محکمې جریانونو یې عادلانه نه وو.

په ایران کې د افغانانو د محکومیت لاملونه تر ډیره د نشه یي توکو قاچاق او جنایي جرمونه دي.

د افغانستان د خبریالانو مرکز وایي، د ګردیز ملي ټلویزیون خپرونې د ژوندیو موجوداتو د انځورونو پر خپرولو د بندیز له کبله ودرېدې.

دغه مرکز نن یکشنبه ( د لیندۍ دویمه) په یوه خبرپاڼه کې ویلي چې د پکتیا ملي ټلویزیون خپرونې اوس راډیویي بڼې ته اوښتي دي.

د خبرپاڼې له مخې پکتیا ۲۳م ولایت دی چې د طالبانو د امرباالمعروف او نهې عن المنکر ادارې دغه بندیز په کې عملي کیږي.

د رسنیو د ملاتړ بېلابیلو سازمانونو پر دغو محدودونکو اقداماتو نیوکې کړي، خو د پام وړ کومه پایله یې نه ده ورکړې.

د طالبانو د حکومت رسمي سرچینو تراوسه پکتیا کې د تلویزیون د بندېدو په اړه څه نه دي ویلي، خو کابل کې د کابینې ګڼ شمېر غړي لا هم د خپلو ورځنیو چارو لپاره له ویډیویي راپورونه کار اخلي.

د طالبانو حکومت وایي، د پنځه سوه ټنه انارو، مڼو او توتانو یوه محموله چې ۲۵۰ زره ډالره ارزښت لري، ازبکستان ته صادره شوه.

د دغه حکومت مرستیال ویاند حمدالله فطرت پر خپله ایکس پاڼه لیکلي چې دغه محموله پرون شنبه د لیندۍ میاشتې په لومړۍ نیټه صادره او په وینا یې دغه لړۍ به دوام ولري.

بل لورته په بلخ کې د طالبانو د والي دفتر ویلي چې دغه محموله به لومړی د ازبکستان بازارونو او له هغه ځایه د منځنۍ اسیا نورو بازارونو ته لیږدول کیږي.

له پاکستان سره تر پوځي شخړو او لارو بندوالي وروسته، د طالبانو حکومت له سوداګرو وغوښتل چې صادراتو ته بدیلې لارې چارې ولټوي.

له یوې میاشتې زیاته موده وشوه چې پاکستان سره لارې د تګ راتګ او سوداګرۍ په مخ بندې دي.

په هرات کې د طالبانو چارواکي وایي چې لږ تر لږه ۱۰ تنه په یوه ترافیکي پيښه کې مړه شوي او ۱۲ نور ټپیان شوي دي.

ځینو کورنیو رسنیو ویلي چې پيښه نن سهار ( یکشنبه د لیندۍ دویمه) د هرات-کندهار پر لویه لاره د هرات د زاول ولسوالۍ اړوند سیمه کې شوې ده.

په زاول ولسوالۍ کې د امنیه قومندانۍ مرستیال یار محمد صادق ویلي، پیښه د یوه مسافروړونکي( ۳۰۲ بس) او فلانکوچ ترمنځ د ټکر له کبله شوې.

هغه ویلي، مسافر وړونکی بس له هراته کندهار او فلانکوچ له دایکندي هرات ته روان و چې سره ټکر شول.

د پيښې لامل تراوسه معلوم نه دی.

د روان کال په اسد میاشته کې د اسلام قلعه- هرات ترمنځ له ایرانه د ایستل شویو کډوالو یو بس له یوې لارۍ سره ټکر شو چې له ۷۰ ډېر کسان په کې مړه شول.

د طالبانو د حکومت د کرنې، اوبو لګولو او مالدارۍ وزارت د کرنې او مالدارۍ مرستیال وزیر مولوي صدراعظم عثماني د شنبې په ورځ په جشن کې وویل چې سږ کال په افغانستان کې په ۱۲۰۰۰ هکتاره ځمکه کې زعفران کرل شوي دي.

د وزارت لخوا په یوه خپره شوې اعلامیه کې، عثماني زیاته کړې چې ۴۱ ټنه زعفران تولید شوي دي، چې د تیرو کلونو په پرتله زیاتوالی ښیي.

له بلې خوا، د افغانستان د زعفرانو اتحادیې مشر حاجي ابراهیم عادل وايي چې تر اوسه پورې د زعفرانو په سکتور کې ۷۲ شرکتونه جوړ شوي او د دې محصول صادرات بهر ته دوام لري.

هغه وویل چې اتحادیه پلان لري چې په دې سکتور کې لس ملیونه ډالر پانګونه وکړي او ۸۰۰۰۰ کسانو ته دندې برابرې کړي.

دا په داسې حال کې ده چې د راپورونو له مخې، افغان زعفران په نړۍ کې غوره کیفیت لري.

د ایران صدا وسیما دولتي رسنۍ د دوغارون په پوله کې د سرحدي چارواکو له قوله ویلي چې دا لارۍ له نهو ترڅوارلس شپې کیږي چې ایران ته د ننوتلو په تمه دي.

د ایران سرحدي چارواکو ویلي چې د ایراني لاریو دریدل د طالبانو حکومت لخوا د لګول شويو محدودیتونو له امله دي.

خو د طالبانو حکومت تر اوسه په دې اړه تبصره نه ده کړې.

ایراني چارواکي وايي ، دوی اوس مهال یو پلان پلي کوي چې د دې ستونزې د حل لپاره د یوې ایراني لارۍ په بدل کې یوې افغان لارۍ ته د ننوتلو اجازه ورکړي.

دا په داسې حال کې ده چې د افغانستان او پاکستان ترمنځ د لارو د تړل کیدو له امله، د طالبانو حکومت او افغان سوداګر هڅه کوي چې د بدیل په توګه له ایران او منځنۍ آسیا هیوادونو څخه کار واخلي.

د افغانستان د فوټبال د اتلانو لیګ پنځم فصل د شنبې په ورځ په کابل کې پیل شو.

د فوټبال دفدراسیون اعلامیې وویل چې د ټورنمنټ په لومړۍ ورځ دوه لوبې ترسره شوې.

په لومړۍ لوبه کېچې د استقلال کابل او ابو مسلم فراه ترمنځ ترسره شوه، ابو مسلم فراه ۵-۰ وګټله.

په دویمه لوبه کې، خراسان فاریاب ، د جوانان پیروزی کابل ته ۲-۱ماتې ورکړه.

دا سیالي چې د ۱۰ غوره ټیمونو په منځ کې ترسره کیږي ، تیر کال یې اتلولي ابومسلم فراه ټیم ګټلې وه.

اریانا افغان هوايي شرکت وايي ډیر ژر به ۳ الوتکې چارتر و پیري.

ذبیح الله مجاهد د طالبانو د حکومت ویاند په خپله ایکسپاڼه کې د اریانا شرکت د چارواکو له قوله د اخبر خپور کړی دی او وايي چې دغه ځانګړې چارتر الوتکې د صادراتو په لیږد کې د اسانتیاو لپاره رانیول کیږي.

د اریانا د شرکت رئیس ملا بخت الرحمن شرافت ويلي چې دغه الوتکې به بوینګ یا ایربس ډوله وي او بیه به یې د ۲۵ تر۳۵ ملیون ډالر وي.

په افغانستان کې د طالبانو حکومت او سوداګرو د پاکستان لور ته د سوداګري لارو له تړل کیدو وروسته هوايي انتقالاتو او دمنځنۍ اسیا او ایران بدیلو تجارتي لارو ته مخه کړې ده.

یوه افغان تبعه، پرون (جمعه) د بریتانیا په یوه محکمه کې اعتراف وکړ چې پر یوې دوولس کلنې نجلۍ یې جنسیي تېری کړی دی.

احمد ملاخېل اقرار وکړ چې د جولای په میاشت کې یې د بریتانیا د انګلستان په مرکزي ښار ننیټن کې دا جرم کړی دی.

د رویټرز خبري اژانس د راپور له مخې، ملاخېل تر دې وړاندې په دې اړه تور رد کړی و، خو پرون یې خپله ادعا بېرته واخیسته.

ملاخېل محکمې ته له یوه بل کس سره، چې محمد کبیر نومېږي او له ده سره د جرم په ترسره کولو کې مرسته کړې وه، حاضر شو.

محمد کبیر هم پخوا په دې قضیه کې لاس لرل رد کړي وو.

د دوی بله محاکمه به د جنورۍ په ۱۲ مه وي.

په بریتانیا او نورو اروپايي هیوادونو کې د افغان پناه غوښتونکو له لوري پر له پسې جرمونه سبب شوي چې ګڼ هیوادونه په ځانګړي ډول افغانانو ته د پناه ورکولو شرایط سخت کړي.