د افغانستان د رسنیو کورنۍ د ۲۰۲۱کال لومړۍ ورځ په غور کې د یوه خبریال د مړینې په خبر پیل کړه.
د خبریالانو د ملاتړ ټولنو د بسم الله عادل پر وژل کېدو د غبرګون په ترڅ کې له خبریالانو غوښتي دي چې د درېیو ورځو لپاره دې د افغان حکومت له خوا خپاره شوي خبرونه نه خپروي.
د افغانستان د خبریالانو د دفاع کمېټې او کابل پرېس کلپ پرون جمعه د غبرګولي په ۱۲نېټه په یوه بیان کې دا غوښتنه کړې ده.
وسله والو د غور غږ راډیو مسئول مدیر "بسم الله عادل" وواژه
د خبریالانو د دفاع د کمېټې مشر عبدالمُعید هاشمي له ازادي راډیو سره په خبرو کې پر نړیواله ټولنه، ملګرو ملتونو او د بې پولې خبریالانو پر ټولنه غږ وکړ چې په افغانستان کې د خبریالانو د هدفي وژنو پر خلاف غږ اوچت کړي.
ښاغلي هاشمي زیاته کړه: "کابل پرېس کلپ او د ژورنالېستانو د دفاع کمېټه په ګډه له ټولو ژورنالېستانو او رسنیو غواړي چې د فشار د یوې وسیلې په توګه دې درې ورځې د دولت خبرونه نه خپروي، څو دولت د قاتلینو د نیولو، سزا ورکولو او د رسنیو د ژورنالېستانو د امنیت نیولو لپاره کوټلي ګامونه واخلي."
د غور غږ راډیو مسوول او خبریال بسم الله عادل په تېرو دوو میاشتو کې په افغانستان کې پر خبریالانو د هدفي حملو پنځم قرباني دی.
له ده مخکې د ازادي راډیو خبریال محمدالیاس داعي په هلمند کې، د طلوع ټلویزیون پخوانی ویاند یما سیاوش په کابل کې، د انعکاس ټلوېزیون خبریاله ملاله میوند په جلال اباد کې او خبریال رحمت الله نېکزاد په غزني کې ووژل شول.
په هلمند کې د ازادي راډیو خبریال الیاس داعي هم په هدفي وژنو کې ووژل شول
د عادل او نورو څلورو خبریالانو د وژنې مسوولیت تراوسه هېڅ یوې ډلې نه دی منلی.
د افغانستان د خبریالانو د دفاع د کمېټې مشر ښاغلی هاشمي وايي چې په تېرو پنځو کلونو کې د افغانستان د رسنیو کورنۍ خپل ۵۵ غړي له لاسه ورکړي دي.
د افغانستان د بشري حقونو خپلواک کمېسیون د دې وضعیت د دوام له کبله اندېښنه ښودلې. د دې کمېسیون مشرې شهرزاد اکبر تېر ماښام پر ټویټر ولیکل چې ۲۰۲۱ میلادي کال د دوو ملکي فعالانو یعنې په غور کې د یوه خبریال او په کابل کې د بغلان د یوه مدني فعال په ترور پیل شو.
First day of 2021 in Afghanistan. Two assassinations of civilians. A civil society activist from Baghlan in Kabul and a journalist in Ghor. Both young. Targeted killings is aiming to kill Afg’s spirit & take away the independent voices & the response is mostly indifference.
— Shaharzad Akbar (@ShaharzadAkbar) January 1, 2021
د مېرمن اکبر په وینا دا هدفي وژنې د دې لپاره کېږي چې د افغانانو روحیه مړه او خپلواک اوازونه غلي شي.
د افغانستان مشرانو جرګه په پام کې لري چې د یکشنبې په ورځ په خپله عمومي غونډه کې د خبریالانو د هدفي وژنو په اړه بحث وکړي.
په کابل کې د امریکا د سفارت سرپرست او شارژدافیر راس ویلسن هم د بسم الله عادل وژنه غندلې او په یوه بیان کې یې ویلي، د بیان پر ازادۍ او هغو کسانو حملې چې ټولنه له بدلونونو خبروي، بوږنوونکې دي او باید پای ته ورسېږي.
(1/2) Another Afghan journalist was killed today: Bismillah Adel Aimaq in Ghor province. Attacks on freedom of speech & those who seek to inform society are appalling & must end.
— Chargé d’Affaires Ross Wilson (@USAmbKabul) January 1, 2021
د پنځو افغان خبریالانو د وژنو په تړاو تراوسه هېڅوک نه نیول شوي او نه کوم چاته سزا ورکړل شوې.
د خبریالانو د حقونو مدافع ټولنې وايي، حکومت د رسنیو پر کار کوونکو د حملو د عاملانو په نیولو کې پاتې راغلی.
حکومت وايي، د وروستیو هدفي وژنو تر شا د طالبانو لاس دی، خو طالبان په دې حملو کې لاس لرل ردوي.