د متحده ایالاتو د پوځ د مرکزي قوماندې مشر او د پاکستان د پوځ لوی درستیز د افغانستان د وضعیت، له ترورېزم سره د مبارزې او د واشنګټن او اسلام ابا ترمنځ د اړیکو په اړه خبرې کړي دي.
د امریکا د پوځ د مرکزي قوماندې مشر وايي، متحده ایالات به په یو اړخیز ډول د پاکستان پر خاوره اهداف په نښه نه کړي.
جوزف ووتل
جنرال جوزیف ووټل دا خبره د پاکستان د پوځ له مشر جنرال قمر جاوید باجوه سره په یوه وروستۍ ټلیفونې تماس کې کړې ده.
لوېدیځو خبرې اژانسونو پرون د پاکستان د پوځ د ویاند اصف غفور له قوله ولیکل چې د دې هېواد د پوځ مشر دغه لوړ رتبه امریکايي قوماندان ته ډاډ ورکړی دی چې پاکستان پر خپله خاوره د هغو وسله والو پر ضد لا دمخه عملیات پیل کړي دي چې په افغانستان کې بریدونه کوي.
نوموړي ټینګار کړی دی چې پاکستان به د افغانستان د سولې لپاره له هر ډول نوښت ملاتړ ته دوام ورکړي.
جنرال قمر جاوید باجوه
جنرال قمر باجوه ویلي دي چې پاکستان د هغو ډلو په اړه چې د پاکستان له خاورې په افغانستان کې د خپل فعالیت لپاره ګټه اخلي د واشنګټن له اندېښنو خبر دی او اسلام اباد به د امریکا له مالي مرستې پرته هم د ترورېزم پر ضد مبارزې ته دوام ورکړي.
د پاکستان د پوځ مشر ویلي، د هېواد په اړه يې د امریکا د وروستیو بیانونو له امله د پاکستان ولس داسې احساس کوي چې ګواکې د لسیزو له هکماریو وروسته واشنګټن ورسره خیانت کړی دی.
دا بیانونه یوه اوونۍ وروسته له هغې ورکول کېږې چې امریکا پاکستان ته د سلګونو میلیونو ډالرو پوځې مرسته وځنډوله او پاکستان يې تورن کړ چې پر خپله خاوره د تروریستي ډلو پر ضد ګامونه نه اخلې.
د امریکا او پاکستان ترمنځ اړیکو بحران وروسته له هغې تر بل هر تېر وخت زیات شو چې ولسمشر ډونالد ټرمپ د نوي کال په خپل لومړي ټویټ کې پاکستان تورن کړ چې د ۳۳ میلیارډه ډالرو مرستې په بدل کې يې امریکا ته یوازې فریب ورکړی او دروغ يې ورته ویلي دي.
The United States has foolishly given Pakistan more than 33 billion dollars in aid over the last 15 years, and they have given us nothing but lies & deceit, thinking of our leaders as fools. They give safe haven to the terrorists we hunt in Afghanistan, with little help. No more!
— Donald J. Trump (@realDonaldTrump) January 1, 2018
د پاکستان د پوځ ویاند لوېدیځو خبرې اژانسونو ته ویلې چې د امریکا د پوځ د مرکزي قوماندې مشر او د پاکستان د پوځ لوی درستیز د دواړو هېوادونو ترمنځ د همکاریو پر اړتیا ټینګار کړی دی.