د بلخ پخوانی والي عطا محمد نور چې نن د چهارشنبې په ورځ «۱۳۹۶ کال د مرغومې ۱۲» یې په مزارشریف ښار کې د خپلو پلویانو یوې غونډې ته خبرې کول وویل چې د جمعیت ګوند او حکومت ترمنځ د خبرو لومړنی پړاو ترسره شوی دی.
د نوموړي په خبره که د حکومت او جمعیت ګوند ترمنځ خبرو نتیجه ورنهکړه، نو خپل پلویان به مدني نافرمانیو ته راوبولي.
ښاغلي نور همدا راز په دې برخه کې ځینو نورو انتخابونو ته هم اشاره لرله.
دی وايي:
"د تفاهم او مذاکرې وړاندیز شوی دی، لومړنې خبرې پرون وشوې وګورو چې نتیجه یې څه راوځي، موږ تفاهم خوښوو که داسې ونهشول بیا په تاسو غږ کوم چې مدني حرکتونه او قوي مدني نافرمانۍ ترسره کړئ؛ که دا هم ونهشول، بیا سلا مشوره کوو چې نور انتخابونه څه کیدای شي."
د جمعیت اسلامي ګوند یوه سرچینه چې نه غواړي نوم یې یاد شي وايي چې د تېرې ورځې په خبرو کې صلاحالدین رباني، ستار مراد، محي الدین مهدي د جمعیت اسلامي له لوري او د مالیې وزیر اکلیل حکیمي، د ملي امنیت رئیس معصوم ستانکزی، د ملي امنیت سلاکار حنیف اتمر او د ولسمشر د دفتر رئیس عبدالسلام رحیمي د حکومت له لوري په خبرو کې حاضر وو.
حکومت او په ځانګړي توګه جمهوري ریاست د خبرو د پيل په اړه څه نهدي ویلي.
د دغه خبرو د پیل په اړه دا څرګندونې په داسې حال کې مطرح کېږي چې تېره ورځ د بلخ پخواني والي عطا محمد نور په مزارشریف ښار کې یوې غونډې د خبرو پر مهال ادعا وکړه چې د ملي امنیت شورا او د ملي امنیت ریاست د وزیر اکبر خان په ۱۵م سړک کې غېرې مسؤلو او اوباشو کسانو ته د دې لپاره وسلې وېشي چې د بلخ امنیت خراب کړي.
نوموړي همدا راز خبرداری ورکړ چې دغه کسان به له هېڅ ډول مشورې پرته وځپي.
د افغانستان د ملي امنیت شورا دفتر د ښاغلي عطا محمد نور دغه څرګندونې رد کړې او د یوې اعلامیې په خپرولو سره یې ویلي چې په یاد شوي ادرس کې د ملي امنیت شورا کوم میلمستون نهلري او وړاندې شوي معلومات هم بې بنسټه دي.
له بلېخوا د بلخ د نوي والي انجنیر محمد داوود ویاند وايي، هغه ځای چې د وزیر اکبرخان په ۱۵م سړک کې دی او عطا محمد نور یې په اړه ویلي دي د بلخ د نوي والي دفتر دی.
د بلخ نوی والي انجنیر محمد داوود
رحمت الله فطرت له ازادي راډیو سره په خبرو کې ویلي چې په دغه دفتر کې هېڅ ډول وسلې نهدي وېشل شوي، بلکې د والي ساتونکو ته قانوني امکانات ورکړل شوي دي.
ښاغلی فطرت همدا راز د عطا محمد نور څرګندونې د نقاق اچولو یو بڼه ګڼي او وايي چې د بلخ د ولایت په څوکۍ د نوموړي پاتې کېدل د خلکو او حکومت په ګټه نهدي.
دی وايي:
"موږ مکرراً غوښتنه کوو چې هغوی «عطامحمد نور» د جمعیت اسلامي د رهبرۍ چې د دغه ګوند اجرائیه رئیس هم دی، لاړ شي او ښاغلي داوود ته چې د دغه سیاسي ګوند غړی دی او د نوموړي د امر لاندې به وي موقع ورکړي چې بلخ ته لاړ شي او د حکومت په چوکاټ کې خپل فعالیت پیل کړي او دا به د خلکو په ګټه وي او همدا راز هغه سوئ تفاهم چې رامنځته شوي له همدې لارې ښايي حل شي."
انجنیر محمد داوود دوه اوونۍ وړاندې د عطا محمد نور د استعفا تر منظورۍ وروسته د ولسمشر محمد اشرف غني له لوري د بلخ د والي په توګه وټاکل شو.
د بلخ د نوي والي ویاند رحمتالله فطرت وايي، بلخ ته د انجنیر داوود په ورتګ به د دغه ولایت امنیت خراب نهشي.
د نوموړي په خبره د بلخ نوی والي د دغه ولایت د امنیت لپاره ښې برنامې لري.
راپور: محمد حدیث پردېس