د دوشنبې په ورځ تر غرمې مخکې سپينبولدک ته څېرمه د چمن ښار په بازار کې چاودنه وشوه چې ګڼ شمېر کسانيې ټپيان کړل.
د چمن د پوليسو په وينا چاودنه د ښار پر بوغره سړک د پوليسو يوه موټر ته نېږدې وشوه چې د يوه پوليس مشر او څلورو پوليس عسکرو په شموليې ۱۵ تنه ټپيان کړل.
پوليس وايي، په ټپيانو کې د کلا عبدالله ضلعې د پوليسو ځايي مشر ساجد خان مومند هم شامل و چې د چاودنې هدف و او سمدستي له نورو ټپيانو سره د چمن ښار روغتون ته يووړل شو، خو د سختو ټپونو له املهيې ساه ورکړه.
چارواکي وايي، په چاودنه کې د ټپي شويو نورو دوو پوليسو په شمول د نورو څو تنو حالت هم مرګونى دى چې د درملنې لپاره کوټې ته راوړل کېږي او احتمال شته چې د مړو شمېر زيات شي.
د چمن د پوليسو چارواکو سمدستي له رسنيو سره په خبرو کې دا د ريموټ کنټرول چاودنه وبلله، خو وروستهيې وويل چې دا يو ځانوژونکى بريد و او د پېښې پر ځاى يې د ځانوژونکي د بدن ټوټې موندلې دي.
دوی وايي، ځانوژونکى بريدګر په موټرسايکل سپور و، کله چې د پوليسو مشر موټر ورته راورسېد، نو ده ځان ته انفجار ورکړ.
د دې چاودنې مسؤليت تر اوسه کومې وسلهوالې ډلې نهدى منلى، خو په دې وروستيو کې چې پر پاکستاني امنيتي ځواکونو او پوليسو باندې کوم بريدونه شوي دي، مسؤليتيې اکثر جماعتالاحرار ډلې يا لښکرِ جنګويالعالمي ډلې پر غاړه اخيستى دى.
د پاکستان صدراعظم نوازشريف، د داخله چارو مرکزي وزير چوهدري نثارعلي خان او د بلوچستان د کورنيو چارو وزير سرفراز بګټي دا چاودنه په کلکه غندلې او د وژل شوي پوليس مشر له کورنۍ سرهيې خواخوږي څرګنده کړې ده.
د يادونې وړ ده چې د چمن تر چاودنې وروسته په کوټه او پښين سيمو کې هم امنيت ټينګ شوى او امنيتي ادارو ته امر شوى چې پر لويو لارو کلکه څارنه پيل کړي.
راپور: بارکوال مياخېل