د افغانستان دوه ملي لوبډلې په یوه ورځ د دوو ګاونډیو هېوادونو ایران او پاکستان د ملي ټیمونو پر وړاندې سیالۍ ترسره کوي.
د افغانستان د کرکټ ملي لوبډله به نن جمعه د اګست په ۲۹مه د درې اړخیزو سیالیو په لړ کې خپله لومړۍ لوبه د پاکستان د کرکټ ملي لوبډلې سره د متحده عربي اماراتو په شارجه لوبغالي کې د کابل پر وخت د ماښام په ۷:۳۰ بجو کوي.
د افغانستان د کرکټ بورډ ویاند سید نسیم سادات د دغو سیالیو په اړه ازادي راډيو ته وویل"د افغانستان د کرکټ ملي لوبډله په درې اړخیزو سیالیو کې چې د افغانستان، متحده عربي اماراتو او پاکستان ملي ټیمونه په کې برخه اخلي، لوبه کوي، دا سریز نن پیلېږي، چې لومړۍ لوبه د افغانستان او پاکستان ترمنځ ده، زموږ ملي لوبډله د دغو سیالیو لپاره کاملاً چمتو ده، دا سیالي شل اوریزې دي ،موږ تمه لرو چې لومړۍ لوبه به د افغانستان په ګټه پای ته ورسیږي."
ښاغلي سادات زیاته کړه چې د افغانستان د کرکټ ملي لوبډلې لوبغاړو لس ورځې په کابل کې په تمریناتي کمپ کې تمرینونه کړي او د اګست په ۱۹مه له تګ وروسته یې د یوې اونۍ لپاره په متحده عربي اماراتو کې په تمریناتي کمپ کې تمرینونه کړي دي.
دغه درې اړخیزه سیالۍ چې د متحده عربي اماراتو په کوربه توب ترسره کېږي، د اسیا جام سیالیو ته چې راتلونکې میاشت پیلېږي، د لوبډلو د چمتوکېدو یوه برخه ده.
د افغانستان د کرکټ بورډ د معلوماتو له مخې، د دغو سیالیو دوه مخکښې لوبډلې به د سپټمبر په اوومه نېټه په فاینل کې سره ولوبېږي.
په ورته وخت کې د افغانستان د فوټبال ملي لوبډله هم نن د تاجکستان په حصار ښار کې د «کافا ۲۰۲۵ ملتونو جام» په سیالیو کې د ایران د فوټبال له ملي لوبډلې سره مخ کېږي.
د افغانستان د فوټبال فدراسیون د چارواکو په خبره، د افغانستان او ایران ترمنځ لوبه نن جمعه د کابل پر وخت مازدیګر ۴:۳۰ بجې د تاجکستان په کوربه توب د حصار په ښار کې پیل شوه.
د دغه فدراسیون دنشراتو برخې مسوول او ویاند مصطفی هاشمي د ایران پر وړاندې د افغانستان د فوټبال ملي لوبډلې د لومړۍ لوبې په اړه ازادي راډيو ته وویل"د افغانستان د فوټبال ملي لوبډله نن د ایران د ملي لوبډلې پر وړاندې د «د ۲۰۲۵ کال د کافا ملتونو جام» په سیالیو کې خپله لوبه کوي،په دې سیالیو کې د افغانستان د فوټبال د ملي لوبډلې د ګډون اصلي موخه د لوبغاړو چمتو کول، د تجربې ترلاسه کول او د اسیا جام د غوراوي سیالیو راتلونکو سیالیو ته چې د پاکستان پر وړاندې ترسره کیږي، چمتووالی ښودل شوې ده."
د افغانستان د فوټبال ملي لوبډله د ایران، تاجکستان او هند له ملي ټیمونو سره د کافا د «ب» ګروپ کې ده او د افغانستان د فوټبال فدراسیون د چارواکو په خبره، د دې هېواد راتلونکې فوټبال سیالۍ به د سپټمبر په لومړۍ نېټه له تاجکستان سره او د سپټمبر په ۴مه له هند سره وي.
په ورته وخت کې د افغانستان د کرېکټ او فوټبال لوبډلو یو شمېر مینه والو د ایران او پاکستان د ملي ټیمونو پر وړاندې د دغو سیالیو په پیلېدو خوښي څرګنده کړې او هیله لري چې د افغانستان ملي ټیمونه به د دغو هېوادونو د ملي ټیمونو په وړاندې بریال خپله کړي.
د ننګرهار ولایت اوسیدونکي او د کرکټ مینه وال شفیق الله ازادي راډیو ته وویل"دا چې نن په متحده عربي اماراتو کې د پاکستان پر وړاندې زموږ د ملي لوبډلې لوبه ترسره کیږي، ان شاءالله چې زموږ د لوبډلې مورال پیاوړی شوی او زموږ لوبډله اوس له هند وروسته په اسیا کې دوهمه درجه لوبډله ده، موږ هیله من یو، چې پاکستان ته په اسانۍ ماتې ورکړي او افغانستان ته به سیریز وګټي."
د کابل ښار اوسیدونکی او د فوټبال مینه وال فیصل هم د ایران په وړاندې د افغانستان د فوټبال د ملي لوبډلې د بریا لپاره ورته هیله لري:
“په داسې حال کې چې افغانستان کې زموږ د ټیمونو پر وړاندې محدودیتونه شته، خو دا د ویاړ خبره ده چې زموږ لوبغاړي په بهر کې سیالۍ کوي او موږ دعا کوو چې د ایران په وړاندې په بریا سره فاینل ته ورسیږي."
د افغانستان د کرکټ او فوټبال ملي لوبډلو لوبغاړي په داسې حال کې د ګاونډیو هېوادونو پر وړاندې د لوبو ډګر ته ځي چې طالبانو پر افغانستان تر بیا واکمنېدو وروسته، پر ځینو ورزشي لوبو لکه ازادو سیالیو (ام ام اې) او بندیزونه لګېدلو او د افغانستان له ورزشي له برخې یې د نجونو ټیمونه په بشپړه توګه لرې کړي دي.