د داعش یا اسلامي دولت ډلې یو لوړ پوړی غړی، چې د ترکیې حکومت یې په لټه کې و، د افغانستان او پاکستان په ګډه پوله کې د ګډو استخباراتي عملیاتو په ترڅ کې نیول شوی دی.
د ترکیې انادولو اژانس د راپور له مخې د دغه هېواد امنیتي ادارو د یکشنبې په ورځ د اوزګور التون په نوم د داعش د دغه غړي د نیولو اعلان وکړ.
التون، چې د ابو یاسر الترکي په نوم هم پیژندل کیږي، د داعش تر ټولو لوړپوړی ترک توکمی غړی یادیږي او د دې ډلې په ټولنیزو رسنیو او لوژستیکي شبکو کې یې مهم رول لوبولی دی.
د انادولو د راپور په اساس د ترکیې د ملي استخباراتو سازمان د التون فعالیتونه څارل او دا یې موندلې وه چې د داعش دغه غړي د اروپا او مرکزي اسیا څخه د افغانستان او پاکستان په سرحدي سیمو کې د داعش د جنګیالیو د ځای پر ځای کولو لپاره همغږي کوله.
د معلوماتو له تبادلې وروسته، د پاکستان استخباراتي اداره په افغانستان کې د التون د حضور او د پاکستان خاورې ته د هغه د ننوتلو څخه خبره کړای شوه.
تر همغږۍ وروسته، د ترکیې او پاکستان د استخباراتي ادارو لخوا په پوله کې د ګډو عملیاتو پر مهال التون ونیول شو او د نورو تحقیقاتو لپاره ترکیې ته ولیږدول شو.
د راپورونو له مخې هغه په ترکیه او اروپا کې د کنسرټونو او نورو عامه ځایونو باندې د بریدونو په پلانولو هم تورن دی.
