د ګارډین په راپور کې د مینا په حواله ویلي شوي، " فکر مې کوه چې د پناه غوښتنه به مې ومنل شي، زه داسې یوه افغانه ښځه یم چې له لودیزو هېوادونو سره مې په افغانستان کې کار کړی دی، د پناه د غوښتنې رد کیدل مې راته شوک و، اوس هره ورځ راسره دا ویره وي چې ښايي بیرته مې افغانستان ته ستنه کړي، دلته په بریټانیا کې د یو عادي ژوند کول راته بیخي د یو خوب او خیال په څیر دي، واقعا له روحي او رواني پلوه ځوریږم".
فکر مې کوه چې د پناه غوښتنه به مې ومنل شي، زه داسې یوه افغانه ښځه یم چې له لودیزو هېوادونو سره مې په افغانستان کې کار کړی دی، د پناه د غوښتنې رد کیدل مې راته شوک ومینا
پر افغانستان د طالبانو له بیا واکمنیدو راهیسې د ښځو د حقونو ډیر شمیر فعالانې د اروپا په ګډون امریکا او هېوادونو ته کډوالې شوې.
دا راپور په داسې حال کې خپریږي، چې پر افغانستان واکمنو طالبانو د بشري حقونو کمیسیون او د ښځو وزارت لغوه کړي دي.
دغو دوو نهادونو په تیر جمهوریت کې د ښځو پر وړاندې د تاواتریخوالي او د ښځو اړونده مسایلو ته رسیدګي کوله.
ګارډین وړاندې د مینا په حواله ویلي، " کله مې چې په افغانستان کې د لودیز له ملاتړه برخمنو پروژو کې کار کوه، په امنیتي چارو کې مې زده کړه ترلاسه کړې وې، په دې پوهیدم چې که چیرته له انفجار یا اختطاف سره مخ شم، څه باید وکړم".
وړاندې د مینا په ټکو راغلي، " هره ورځ داسې وه چې یو څو قدمه به له انفجاره لرې وم، کله به چې له امنیتي پوستو تیریدم زړه به مې لړزیده، هر سهار به مې له خپلې کورنۍ سره خدای پاماني کوله چې ښايي همدا مو وروستۍ دیدن وي، یو شمیر همکاران مې بیخي ورک شول".
د ګارډین د راپور له مخې، له دې وړاندې د بریټانیا د کورنیو چارو وزارت په معمولا ډول د هغوو ښځو د پناه غوښتنې منلي چې د منیا په څیر يې د زده کړو او ورته پروژو سره کار کړی وو چې د لودیز له خوا يې ملاتړ کیده.
خو د شمیرو له مخې د ۲۰۲۴ کال په وروستیو درېو میاشتو کې بریټانیا د ۲۶ افغان ښځو د پناه غوښتنې رد کړي دي.
د شمیرو له مخې د ۲۰۲۴ کال په وروستیو درېو میاشتو کې بریټانیا د ۲۶ افغان ښځو د پناه غوښتنې رد کړي دي
د ګارډین په راپور کې وړاندې راغلي، په همدې موده کې د دوه زره افغان پناه غوښتونکو د پناه غوښتنې رد شوي چې د ۲۰۲۳ کال پرتله زیاتوالی ښيۍ.
بریټانیايې تېر کال کې یوازې ۴۸ افغان پناهغوښتونکو ته منفي ځواب ورکړل شوی وو.
د بشري حقونو د څار سازمان وايي، په افغانستان کې د ښځو او نجونو د حقونو وضعیت خورا خراب شوی او د دوی پر وړاندې امنیتي ګواښونه ډېر شوي دي.
خو د مینا دقضیې یو مسوول مامور وايي، " دا معلومه شوې چې تاسې"مینا" افغانستان ته په ستنیدو سره له کوم ګواښ او خطر سره نه مخ کیږۍ".
د ګارډین راپور وايي، د برتانيې د کورنیو چارو وزارت د مینا د قضیې په ځواب کې ویلي، "دوی د انفرادي قضیو په اړه تبصره نه کوي".
خو جېمي بل چې د ډنکن لویس حقوقي بنسټ غړی او د مينا مدافع وکیل دی وايي، د وروستیو درېیو میاشتو په ترڅ کې د ۲۶ افغانو ښځو د پناه غوښتنې ردېدل یو تکان ورکوونکی عمل دی.
هغه د مینـا د قضیې پرېکړه خواشینوونکې بللې او زیاته کړې یې ده چې برتانيه باید له دې ډول کسانو څخه پر ملاتړ ویاړي.
هغه ویلي، د مینـا د پناه غوښتنې ردول ټولو هغو کسانو ته سپکاوی دی چې په افغانستان کې یې د لوېدیځو ارزښتونو څخه دفاع کړې ده.
