د افغانستان په رسنیو کې د "ژونديو موجوداتو" د انځورونو د خپرېدو د مخنیوي په تړاو د طالبانو حکومت هڅو د ډېرو رسنیو د مسوولينو او خبریالانو جدي اندېښنې راپارولي دي.
د یوشمېر تصویري رسنیو مسوولینو چې د موضوع د حساسیت له امله یې نهغوښتل نومونه او غږ یې په راپور کې خپور شي، د سهشنبې په ورځ له ازادي راډیو سره په خبرو کې د طالبانو د حکومت د دې اقدام په غبرګون کې د اندېښنو په څرګندولو سره دا د تصويري رسنيو د دروازو د تړل کېدو په اړه يو خبرداری وباله.
"محدودیتونه په ډېرېدو دي او زموږ کار له ډېرو ستونزو سره مخ دی.يو خبريال
يوشمېر خبريالان هم دغه اقدام پر خبريالانو او د رسنيو پر ازادۍ يو بل برید بولي او وايي، دا بنديز به د سلګونه خبريالانو او د رسنيو د کارکوونکو د وزګاره کېدو لامل شي.
د افغانستان په شمال کې د یوه خصوصي ټلوېزیون خبریال چې ویډیويي رپوټونه جوړوي او د موضوع د حساسیت له امله نهغواړي نوم یې په راپور کې واخیستل شي، ازادي راډیو ته وویل: "محدودیتونه په ډېرېدو دي او زموږ کار له ډېرو ستونزو سره مخ دی. ډېری د رسنیو کارکوونکي د دغو محدودیتونو له امله له خپلو دندو وزګاره کېږي، زموږ غوښتنه دا ده چې د اسلامي امارت مسوولین دا قوانین کم کړي، څو خلک وکولی شي په رسنیو کې کار وکړي او د خپل ژوند د پرمخ وړلو لپاره یوه مړۍ ډودۍ پیدا کړي او همدارنګه خلک له پېښو خبر شي چې څه روان دي."
په افغانستان کې يوشمېر ښځينه خبريالانې چې له ډېرو نورو بنديزونو سره هم مخ دي او د ټلوېزيون پر پرده له بشپړ حجاب او ماسک سره راڅرګندېږي وايي چې، د طالبانو حکومت دغه اقدام خواشينې کړې دي.
د دغو خبريالانو له ډلې يوه هم فریبا ده چې، ازادي راډیو ته يې وویل: "موږ فکر کاوه چې په افغانستان کې مرغان او نور حیوانات د افغان ښځو په پرتله زیاتې ازادۍ لري، خو نن ورځ وینو چې طالبان ان په حیواناتو هم رحم نهکوي او د دوی د انځورونو خپرولو لپاره قانون او محدودیتونه وضع کوي، کوم طالبانو چې په ښځو رحم نهکوي موږ ترې هيڅ تمه نهلرو."
په همدې حال کې، د طالبانو د امر بالمعروف او نهي عنالمنکر وزارت ویاند سیفالاسلام خیبر ویلي چې، دوی به په تدریجي ډول په ټول افغانستان کې د ژوندي موجوداتو د انځورونو د خپرولو د بنديز قانون عملي کړي.
نوموړي تازه فرانسې خبري اژانس ته ویلي، په ځینو ولایتونو کې د دا شان انځورونو د خپرولو د مخنیوي هڅې پیل شوې دي.
طالبانو مخکې تر دې په میدان وردګ، تخار او کندهار ولایتونو کې له ژونديو موجوداتو د انځور اخیستلو او عکاسۍ باندې بندیز وضع کړى و.
