پهداسي حال کې چې د حزبالله د مشر حسن نصرالله له وژل کېدو وروسته په منځني ختیځ کې د کړکېچ د زیاتېدو په اړه اندېښنې څرګندیږي، د اسراییل صدراعظم د نصرالله وژنه په سیمه کې د "ځواک انډول" یا د قواوو د توازن لپاره یو ضروري ګام بولي.
اسراییل نن (یکشنبې) د لبنان په جنوب او ختیځ کې بمباریو ته دوام ورکړ، خو دا پهداسې حال کې ده چې د ځمکې د احتمالي یرغل او سیمهییزو پایلو په اړه نړیوال خبرداري زیات شوي دي.
د اسراییل صدارعظم بنیامین نتانیاهو وایي، د لبنان د حزبالله د مشر حسن نصرالله وژل "د راتلونکو کلونو لپاره په سیمه کې د ځواک انډول د بدلولو په خاطر یو ضروري ګام و."
متحدهایالتونه د ایران تر ملاتړ لاندې د لبنان حزبالله یوه تروریستی ډله بولي او اروپایي اتحاديه بیا د حزبالله پوځي څانګه تروریستي ګڼي.
په همدې حال کې د اسراییل پوځ نن (یکشنبې) اعلان وکړ چې د حزبالله یو بل مشر نبیل قاووق یې وژلی دی.
د اسراییل پوځ شیخ قاووق د حزبالله په مشرتابه شورا کې د استخباراتو او استخباراتو ضد امنیتي څانګې قوماندان بللی دی.
د اسراییل د پوځ په وینا، نبیل قاووق پرون ماښام (شنبه، د سپټمبر ۲۸) د بیروت د جنوب په ضاحیه سیمه کې د اسراییلي جنګي الوتکو په عملیاتو کې ووژل شو.
د اسراییل په وینا، قاووق "په مستقیم ډول د اسراییل د دولت او د هغه د اتباعو پر وړاندې د تروریستي عملیاتو په پلانولو کې ښکېل و."
حزبالله تر اوسه د هغه مړینه تایید کړې نهده.
۶۰ کلن نبیل قاووق د ۱۹۸۰ لسیزې په لومړیو کې له حزبالله سره یوځای شو او تل د حزبالله له مهمو شخصیتونو څخه و.
د قاووق د وژل کېدو خبر یوه ورځ وروسته لهدې چې د حزبالله د مشر حسن نصرالله د وژل کېدو خبر تایید شو، ورکړل شو.
حسن نصرالله له اوږدې مودې راهیسې د لبنان د حزبالله مشر و.
له بلې خوا تهران د ملګروملتونو د امنیت شورا د بېړنۍ غونډې غوښتنه کړې ده.
"ټول باید خبر وي چې وضعیت خورا چاودېدونکی دی او هر څه ممکن دي، حتی جګړه."عراقچي
د ایران د بهرنیو چارو وزیر عباس عراقچي په نیویارک کې فارس خبری اژانس ته ویلي: "ټول باید خبر وي چې وضعیت خورا چاودېدونکی دی او هر څه ممکن دي، حتی جګړه."
د ملګروملتونو د امنیت شورا دایمي غړو متحدهایالتونو او چین د تاوتریخوالي د کمېدو غوښتنه وکړه، پهداسې حال کې چې روسیې د سیمې لپاره د ناوړه او ډراماتیکو پایلو خبرداری ورکړ.
په بیروت کې د اسراییل په یوه لوی هوایي برید کې د حسن نصرالله د وژل کېدو له تایید وروسته د اسراییل صدراعظم بینامین نتنیاهو په خپله لومړۍ وینا کې د راتلونکو سختو ورځو خبرداری ورکړ.
نتانیاهو، حسن نصرالله پهدې تورن کړ چې ګڼشمېر اسراییلیان او د نورو هېوادونو سلګونه اتباع یې وژلي دي.
دا پهداسې حال کې ده چې په غزه کې د اسراییل جګړه یو کال ته نژدې شوې ده.
