په کندهار کې د ګرینګیچ، الو، البوخاره او الوچو باغ لرونکي وايي چې د دوی د مېوو حاصل ښه دی، خو بازار نه لري.
په دې ولایت کې دا مهال د تازه مېوو د راټولولو وخت دی، خو باغ لرونکي شکایت کوي چې د پاکستان لهخوا د لوړې تعرفې له امله خپلې مېوې بهر ته نه شي صادرولی او په کور دننه هم په مناسبه بیه نه پلورل کېږي.
د کندهار ارغنداب ولسوالۍ یو باغ لرونکی بسمالله جان وايي، په تېرو کلونو کې به یې مېوې پاکستان ته صادرولې، خو سږ کال د پاکستان لهخوا د ګمرکي تعرفې لوړېدو له امله دوی اړ شوي چې خپل حاصلات یوازې په کور دننه په ټیټه بیه وپلوري.
بسم الله جان زیاتوي: "حاصل مو ښه دی، خو بازارونه یې خراب دي، خرڅېږي نه، د پاکستان لار بنده ده او ټکس یې ډېر لوړ دی، که مېوې هلته واستوو، زموږ لپاره هېڅ ګټه نه کوي."
په کندهار کې د مېوو د حاصلاتو د پخېدو سره سم، یو شمېر بېکاره ځوانانو ته په باغونو کې د کار زمینه برابرېږي چې د خپلو کورنیو اقتصادي اړتیاوي پوره کوي.
د ارغنداب ولسوالۍ په باغونو کې بوخت دوه کارګران احمدولي او سردار ولي وایي، د مېوو د ټیټې بیې له امله یې ورځنۍ مزدورۍ هم اغېزمنې شوې دي.
احمدولي وايي: "موږ په دوبۍ کې د پلم او ګرینګیچو په راټولولو بوخت یوو، دا زموږ لپاره یوه خواري ده چې د اولادونو د روزي لپاره یوه ګوله ډوډۍ پیدا کړو، شپږ زره افغانۍ راکوي، خو په ژمي کې بیا بې کاره یوو."
سردار ولي وایي: "دلته چې سهار شپږ بجې راځو، پلم راټولوو، بیا یې کارټنونو ته اچوو، او بیا یې موټر ته باروو او کابل ته یې استوو."
سږ کال د باغ لرونکو لپاره یوازې د پاکستان لوړه ګمرکي تعرفه ستونزه نه ده، بلکې د کندهار په اقلیمي وضعیت کې د بدلونونو له امله هم زیانونه ورته اوښتي دي.
بې وخته بارانونو د مېوو په حاصل منفي اغېز کړی چې له امله یې د مېوو حاصل کم شوی دی.
د طالبانو د حکومت د کندهار کرني او مالدارۍ ریاست مسوولان د پاکستان لهخوا د لوړي ګمرکي تعرفې د ستونزې په غبرګون کې وایي چې د حکومت په کچه چارواکې بوخت دي څو د پاکستان د لوړې ګمرکي تعرفي ستونزه حل کړي.
پاکستان هر کال د افغانستان د تاز مېوو د فصل په رسیدو سره سرحدي او ګمرکي ستونزې جوړوي چې له امله یې افغان باغ لرونکو او سوداګرو ته زیات زیان رسېږي.
سوداګر او باغ لرونکي وايي، که د تازه مېوو لپاره سړې خونې جوړې شي، نو دوی به له زیانونو وژغورل شي او په دې توګه به وتوانېږي چې خپلې مېوې په مناسب وخت او مناسبه بیه وپلوري.
