د افغانستان د کرکټ د ملي لوبډلې یو مشهور مينهوال او ملاتړی حاجي رضا خان د چنګاښ د میاشتې په ۱۳مه د ورپېښې ناروغۍ له امله مړ شو.
حاجي رضا خان چې په رضا خان کاکا مشهور و، په دې وروستیو کې ناروغ او په روغتون کې بستر و.
خان د افغانستان د کرکټ د ملي لوبډلې یو له سرسختو مینهوالو څخه و چې تل به د افغانستان د کرکټ ملي لوبډلې په کورنیو او بهرنیو سیالیو کې د افغانستان د درې رنګه بیرغ سره راڅرګندېده او د کرکټ د ملي لوبډلې لوبغاړي به یې هڅول.
نوموړى د افغانستان د دودیزو جامو په اغوستو او د افغانستان د درې رنګه ملي بیرغ له امله چې تل به په لوبو کې ورسره وو د کرکټ د ډېرو مينهوالو زړونه تر لاسه کړي وو.
د افغانستان کرکټ بورډ په خپله فېسبوکپاڼه لیکلي چې د افغانستان د کرکټ بورډ، د دغه بورډ ټول کارکوونکي او لوبغاړي د حاجي رضا خان چې ټولو به له ډېرې مينې ورته رضا خان کاکا ويلې، په مړینه ژور خواشیني دي.
د افغانستان د کرکټ بورډ پخواني مشر نسیم دانش هم په خپله فېسبوکپاڼه د رضا خان کاکا پر مړینه خواشیني څرګنده کړې او ویلي یې دي چې هغه له کرکټ سره ځانګړې مینه درلوده.
د پخواني جمهوري نظام پر مهال د ننګرهار پخواني والي ضياالحق امرخېل هم پر خپله فېسبوکپاڼه د نوموړي پر مړينه خواشيني څرګنده کړې ده.
امرخېل لیکلي: "رضا خان کاکا د افغانستان له بریا سره دومره لېوالتیا درلوده چې په ټولو سیالیو کې به یې له سپینې ږیرې سره ګډون کاوه او د کرکټ د لوبغاړو روحيه به يې لوړه ساتله."
د افغانستان د ازادو سياليو وتلي لوبغاړي احمد ولي هوتک او د ټولنیزو رسنیو ګڼو نورو کارونکو هم د رضا خان کاکا پر مړینه سخته خواشیني څرګنده کړې ده.
د افغانستان د کرکټ ملي لوبډلې یو شمېر مینهوالو هم د نوموړي پر مړینې خپه دي.
د غزني ولایت اوسېدونکي احمد شاکر ازادي راډیو ته وویل: "هغه په رښتیا د افغانستان د کرکټ د ملي لوبډلې له لوبغاړو سره ډېره مینه درلوده. د کرکټ په سیالیو کې د رضا خان کاکا شتون ټولو لوبغاړو ته روحیه ورکوله، خدای دې وبخښي او جنتونه یې ځاى موږ ډېر پرې خفه شوو."
د کابل اوسېدونکي سمیعالله وویل: "کله چې رضا خان کاکا د افغانستان بیرغ سره میدان ته ته، د افغانستان د کرکټ ملي لوبډله یې ډېره وهڅوله، د کاکا رضا خان او د کرکټ د نورو مینهوالو هڅونو له امله د افغانستان کرکټ لوبې وګټلې، په ټوله کې کاکا رضا د افغانستان د کرکټ په مینهوالو کې يوه اغېزمنه څېره وه."
د ازادي راډیو خبریال هڅه وکړه چې د حاجي رضا خان له کورنۍ سره هم خبرې وکړي، خو بریالی نه شو.
نوموړی د پکتیا ولایت اوسېدونکی و.
د افغانستان کرکټ بورډ تېره ورځ په خپله رسمي فېسبوکپاڼه کې د نوموړي د ناروغۍ اعلان وکړ او له ټولو افغان کرکټ مینهوالو یې وغوښتل چې د هغه د رغېدو لپاره دعا وکړي، خو کرکټ بورډ د چهارشنبې په ورځ د نوموړي د مړینې خبر ورکړ.