د روسیې د پټرولو په یوه زېرمه ځای کې د اوکراین د بې پیلوټه الوتکو له برید وروسته اور بل شوی دی.
د روسیې د کورسک سیمې په لوېدیځ کې د اوکراین پولې ته نژدې د پټرولو پر یوه زېرمه تون د بې پیلوټه الوتکو له دوو ګزارونو وروسته اور بل شوی دی.
د ازادي راډيو د خبر مرکزي څانګې لیکلي، دغه بې پیلوټه الوتکې چې د پټرولو پر زېرمه لګیدلي، د اوکراین اړوند وې، خو اوکرایني چارواکو لا تراوسه په دې اړه څه نه دي ویلي.
د کورسک سیمې والي رومن ستاروویت ویلي چې د نن سهار په دغو بریدونو کې د سون توکو یوه ډيپو سوځېدلې، خو په خبره یې د سر زیان چاته نه دی اوښتی.
د ازادي راډيو روسي څانګې د یوه ټیلګرام چېنل د تصویرونو په استناد لیکلي چې بې پیلوټه الوتکه د میخاییلوفسکي د کارخونې په قلمرو کې لګېدلې ده.
دا د روسېې له لویو کارخانو څخه ده د اوسپنې د کیندنې او پروسس چارې په کې مخته ځي.
د ۲۰۲۳م کال په لومړیو کې د روسیې دغه کارخانه د امریکا د بندیزونو په لېست کې شامله شوه.
راپور کې راغلي چې د بې پیلوټه الوتکې له لومړي ګزار دوه ساعته وروسته یوه بله بې پیلوټه الوتکه هم پر دغې کارخونې لګېدلې او دا دویم برید تایید شوی هم دی.
د روسیې دفاع وزارت ویلي چې نن سهار دوی درې بې پيلوټه الوتکې نسکورې کړي چې دوه یې د همدې کارخونې په سیمه او یوه بله په بلګورود سیمه کې.
پر اوکراین د روسیې له یرغل وروسته بې پيلوټه الوتکې په منظم ډول د روسیې پر فضا الوتنې کوي.
دغه الوتکې وخت نا وخت ویجاړۍ او مرګ ژوبله هم رامنځته کوي.
د روسیې دفاع وزارت دغه الوتکې د اوکراین بولي، خو کییف تر ډېره په دې راپورونو تبصره نه کوي.
په اوکراین کې د روسیې جګړه د تېرې فبرورۍ میاشتې په ۲۴مه دوه کلنه شوه، خو لا یې هم اور تازه دی او د پای ته رسېدو څرک یې نه ښکاري.