د طالبانو د دفاع وزارت سرپرست ملا محمد یعقوب مجاهد او د طالبانو د پوځ لوی درستیز قاري محمد فصیح الدین فطرت دوحې ته تللي او تمه ده هلته د دوحې د دفاعي صنایعو نړیوال نندارتون او کنفرانس کې ګډون وکړي.
د دوحې د دفاعي صنایعو نړیوال نندارتون چې د قطر د دفاع وزارت له خوا اداره کېږي؛ ویلي د بېلابېلو هېوادونو شاوخوا ۹۰ ځانګړي استازي د یاد نندارتون په اتمه دوره کې ګډون کوي.
دوی د طالبانو د دولت د استازیو د ګډون په اړه رسماً څه نه دي ویلي، خو د طالبانو دوه لوړپوړي چارواکي دې غونډې ته ورغلي.
د طالبانو د دفاع وزارت سرپرست په یوه خبرپاڼه کې ویلي چې د دفاع سرپرست وزیر مولوي محمد یعقوب مجاهد او د طالبانو د پوځ لوی درستیز قاري محمد فصیح الدین فطرت به د دوحې د دفاعي صنایعو په نندارتون کې ګډون وکړي.
د دوحې د دفاعي صنایعو نړیوال نندارتون کې د ۲۰۰ هېوادونو او دفاعي/پوځي شرکتونو د نندارې مرکزونه جوړیږي.
تمه ده په یوولسو سیمو کې دا لوی نندارتون پيل شي او په ترڅ کې به یې ۳۲ نړیوالې معاهدې لاسلیکې شي.
دغه نندارتون ته د لسو هېوادونو ۱۱ جنګي بېړۍ هم نندارې ته اېښودل کېږي.
د طالبانو د دفاع وزارت په اعلامیه کې نه دي ویل شوي چې د دوی لوړپوړي چارواکي د دوحې په نندارتون کې په کومو ځانګړیو برخو کې بحث او ګډون کوي؟
د طالبانو د دفاع وزارت د اعلامیې په اساس، تمه ده دا طالب چارواکي همداراز له قطري چارواکو سره د دوه اړخیزو اړیکو په پیاوړتیا هم خبرې وکړي.
د افغانستان د پخواني پوځ د کومانډو ځواکونو عمومي قومندان جنرال فرید احمدي ازادي راډیو سره په خبرو کې له ملایعقوب سره د قطري چارواکو د لیدنو پر مهال د ځینو پېښېدونکو مسایلو په اړه خپل نظر داسې شریک کړ:
" قطر به ټینګار وکړي چې د افغانستان لپاره د ملګرو ملتونو ځانګړی استازی ومنل شي. همداراز د ځینو ناتایید شویو رپوټونو په اساس احتمالاً د امریکا ځینې استازي په ټیټه کچه له ملا یعقوب سره خبرې وکړي ځکه د ناټو د پرمختللیو وسلو ټول سیسټم چې اوس د طالبانو په لاس کې دی ټول یې څار او ساتنې ته اړتیا لري هم د هوايي ځواک او هم د ځمکنۍ قوا محاربوي تخنیک. "
جنرال فرید بیا دا نیوکه وکړه چې طالبانو تېر دوه نیم کاله د نړیوالو قدرتونو له مخالفتونو د ځان په ګټه کار اخیستی او د نړیوالې ټولنې د غوښتنو او شرایطو په نه منلو سره یې یو ناسنجول شوی ګام اخیستی چې د ده په نظر دا به د طالبانو په تاوان تمامیږي.
د طالبانو د دفاع وزارت سرپرست د ۲۰۲۲ کال په جولای میاشت کې په خپل لومړني بهرني سفر کې قطر ته تللی و او هلته یې د قطر له امیر شېخ تمیم بن حمد آل ثاني سره لیدلي وو.
هغه وخت د قطر دولتي خبري اژانس لیکلي وو چې د قطر امیر په افغانستان کې د ثبات او پخلاینې لپاره د کار کولو په اهمیت ټینګار وکړ.
شېخ تمیم همداراز د افغانانو د حقونو د تامین یادونه هم کړې وه.
د طالبانو دفاع وزارت سرپرست تر دې لیدنې وروسته ویلي وو چې له قطري چارواکو یې د پوځ د تنخاوو، یونیفورم، د سرحدونو د ساتنې د تخنیکي وسایلو او وسایطو او روغتیايي چارو کې د مرستې غوښتنه وکړه.
قطر د سیمې او نړۍ له هغو هېوادونو دی چې له طالبانو سره نږدې اړیکې پالي او په لوړه کچه سره یې مذاکرې کړې دي.
د قطر صدراعظم محمد بن عبدالرحمن آل ثاني د ۲۰۲۳ کال په مې میاشت کې کندهار ته تللی و او هلته یې د طالبانو له رهبر ملا هیبت الله اخندزاده سره لیدلي وو.
رویټرز هغه وخت لیکلي وو چې دا سري/پټې خبرې له نړیوالې ټولنې سره د لانجمنو مساییلو پر هواري څرخېدې.
نړیواله ټولنه له طالبانو غواړي چې د افغانانو؛ په تېره بیا ښځو او لږکیو بشري حقونه رعایت کړي. د بېلګې په توګه: دوی د نجونو پر مخ د ښوونځیو او پوهنتونو په پرانیستلو ټینګار لري.
قطر له طالبانو سره نږدې اړیکې لري او د دې تر څنګ چې د طالبانو سیاسي دفتر له کلونو هلته فعاله دی او د لویدیځ او طالبانو تر منځ د یوه رابط رول لوبوي.
وروستی وار د فبروري په ۱۸مه او ۱۹مه دوحه کې د افغانستان اړوند د ملګرو ملتونو په کوربه توب یو نړیوال کنفرانس جوړ شو، خو طالبانو پکې ګډون نه و کړی.
