د شمالي ولایت بغلان په پلخمري ښار کې د شیعهګانو پر یو جومات د طالبانو حکومت د سیمهییزو سرچینو په حواله انتحاري حملې، چې د جمعې د لمانځه پر مهال شوې، خلکو ته مرګ ژوبله هم اړولې ده.
د دغه ولایت لپاره د طالبانو حکومت امنیه قومنداني وايي چې دا پېښه د بغلان ولایت پلخمري ښار د سیلو په لومړي سرک کې په امام زمان جومات کې د جمعې د لمانځه پر مهال شوې ده.
دغې قومندانۍ په یوه اعلامیه کې چې یوه کاپي یې ازادي راډیو ته هم رالېږلې ویلي چې دې انتحاري حملې ٧ کسه شیعه لمونځ کوونکي وژلي او ۱۵ نور یې ټپیان کړي دي.
د پلخمرۍ په روغتون کې یوې سرچیني چې د امنیتي دلایلو له امله یې ونه غوښتل په راپور کې یې نوم خپور شي ازادي راډيو ته وویل چې د پېښې له ځایه روغتون ته نږدې ۳۰ جسدونه وروړل شوي دي.
یو شمېر نورو رسنیو په دې پېښه کې د نږدې پنځوس کسانو د ټپي کېدو خبرونه خپاره کړي دي.
عینې شاهدانو ویلي چې پېښه نن د جمعې د لمانځه پرمهال د پلخمري د سیلو په لومړي سړک کې د امام زمان په جومات کې شوې.
د خالد په نوم د پېښې یو عیني شاهد وویل: "چاودنه په تکیه خانه کې دننه وشوه. تلفات یې خورا زیات دي. حمله انتحاري وه. یو شمېر ټپیان انتقال شوي دي او نور ټپیان لاهم راباسي."
د دغه ولایت لپاره د طالبانو حکومت امنیه قومنداني وايي، د پېښې په اړه نورې څېړنې هم روانې دي.
د دې چاودنې مسوولیت تراوسه کومې ډلې نه دی منلی.
خو له دې وړاندې په افغانستان کې په شیعه وګړو د ګڼو خونړیو بریدونو مسولیت داعش خراسان څانګی منلی دی، هغه چې طالبانو یې په وار پر وړاندې د عملیاتو او د ځپلو خبره کړې، خو د امریکا د متحده ایالاتو او ملګرو ملتونو په ګډون د نړۍ ګڼو هېوادونو یې په افغانستان کې د موجودیت په اړه اندېښنه ښودلې او دا د نړۍ د امنیت لپاره یې ګواښ بللې ده.
د روان کال د اګسټ په ۲۵مه د ملګرو ملتونو د سرمنشي مرستیال ویلادیمیر وورونکوف د ملګرو ملتونو امنیت شورا ته په خپل راپور کې وویل، د داعش وسله والو په ګډون په افغانستان کې ۲۰ ترهګرې ډلې فعالې دي.
هغه دا هم وویل چې همدا اوس په دې هېواد کې د داعش ډلې د وسلهوالو او د هغوۍ د کورنیو شمېر له ۴زرو تر ۶ زرو کسانو رسېږي.
