ایراني رسنۍ او د طالبانو یو ویاند رویټرز خبري تایید کړه چې د افغانستان او ایران ترمنځ پر پوله نیمروز سرحدي سیمه کې یو طالب او دوه ایراني سرتېري وژل شوي دي.
د شنبې په ورځ د افغانستان او ایران په ګډه پوله د طالب او ایراني ځواکونو ترمنځ نښته وشوه.
د ایرنا دولتي خبري اژانس د ایران د پولیسو د قومندان د مرستیال په حواله ویلي، نن سهار لس بجې طالب ځواکونو د افغانستان له لوري د ایران پر پولیسو ډزې وکړې.
دا په داسې حال کې ده چې د ایران تسنیم اژانس د راپور پر بنسټ، په دې نښته کې سپکې او درنې وسلې کارول شوي دي.
د ایران د پولیسو د قومندان مرستیال ادعا کړې چې ایراني ځواکونو په سیستان او بلوچستان ولایتونو کې 'پرېکنده' ځواب ویلی دی.
په عین حال کې د تسنیم خبري اژانس د طالبانو او ایراني پوله ساتو ځواکونو ترمنځ د نښتې د پای ته رسېدو خبر ورکړی دی.
د دواړو هېوادونو د دفاع وزارتونو چارواکو د جګړې د پای ته رسولو لپاره خبرې کړي دي.
په هغو ویډیوګانو کې چې په ټولنیزو رسنیو کې خپرې شوي، د دواړو لورو ترمنځ د ډزو تبادله ښيي.
خو دا ویډیوګانې په خپلواکه توګه نه دي تایید شوي.
دا په داسې حال کې ده چې نن د طالبانو د بهرنیو چارو سرپرست وزیر امیر خان متقي په کابل د ایران له سفیر حسن کاظمي قمي سره هم کتلي دي.
تر اوسه د نښتې علت معلوم نه دی او طالبانو او ایراني چارواکو هم تر اوسه د دغې نښتې په اړه څه نه دي ویلي.
که څه هم د کابل او تهران ترمنځ ډيپلوماټیکې اړیکې شته، خو ایران د طالبانو حکومت په رسیمت نه دی پېژندلی.
د دواړو هېوادونو پر ګډه پوله نښتې داسې مهال دي چې په دې وروستیو کې د طالبانو او ایراني چارواکو ترمنځ د هلمند د اوبو پر سر اړیکې خړې پړې شوي دي.
