ازادي راډیو د هنر سالار بنسټ په همکارۍ د نشه یي توکو د زیانونو،کښت او قاچاق په اړه د خلکو د پوهاوي د کچې لوړولو په موخه په ۷ ولایتونو کې د دیوالي نقاشیو لړۍ پیل کړې.
دغه کمپاین تر اوسه د کابل په ګډون ننګرهار، هرات، کندهار، هلمند، بلخ او بدخشان ولایتونو کې بشپړې شوې او ژر به په نیمروز ولایت کې هم ترسره شي.
د ټولو ولایتونو اوسیدونکو له ازادي راډیو سره په مرکو کې د زهرو کاروان خپرونې له مسؤلینو او هنرسالار بنسټ نه مننه وکړه چې د خلکو د پوهاوي په موخه یې دغه لړۍ پیل کړې.
دوی وايي، دغه دیوالي نقاشۍ د نشه يي توکو د زیانونو او د کوکنارو پرځای د بدیل کښت لپاره د بزګرانو د هڅونې غوره لار ده.
نیمروز ولایت به هم ډېر ژر د دغه نقاشیو کوربه وي او وروسته به د دغې لړۍ وروستۍ نقاشۍ هم په کابل کې وي او په دې سره به د نقاشیو دا کمپاین پای ته ورسېږي.
ددې راپور غږیزه بڼه ددې تړوني له لارې هم اوریدلی شئ:
