د امریکا په متحدو ایالتونو کې د کرونا ویروس د نویو پېښو له زیاتېدو سره څو نور ایالتونه هم د بارونو، رستورانتونو او نور کاروبارونو د بیا پرانیستو له پرېکړې تر شا شول.
چارواکي شکایت کوي چې اکثره خلک د ماسک د اغوستو او ټولنیزې فاصلې د رعایتولو لارښوونې له پامه غورځوي.
د جانز هاپکنز پوهنتون د شمېرو له مخې په متحدو ایالاتو کې پرون د ۲۴ ساعتونو په ترڅ کې د کوویډ۱۹ ناروغۍ لږترلږه ۴۲ زره تازه پېښې ثبت شوي او له دې داسې ښکاري چې د کرونا ویروس تازه پېښې خورا په چټکۍ په زیاتېدو دي.
د امریکا د متحدو ایالتونو د ساري ناروغیو مخکښ متخصص ډاکتر انتوني فاوچي په دغه هېواد کې د کرونا ویروس د نویو پېښو د زیاتېدو په اړه اندېښنه وښوده.
دی چې د سپینې ماڼۍ له خوا د کرونا ویروس په وړاندې د مبارزې لپاره د ضربتي ډلې غړی دی وايي، نوې شمېرې په هغو ایالتونو کې ثبت شوي چې د دې ناروغۍ د مخنیوي مقررات یې بې وخته نرم کړل.
فاوچي به نن سې شنبه د مشرانو جرګې استماعیه غونډې ته په دې اړه چې ایا خلکو ته دې کارونو او ښوونځیو ته د تګ اجازه ورکړل شي که نه، معلومات ورکړي.
دی وايي، دوی باید دوې اوونۍ نور هم صبر کړی وای او بیا یې محدودیتونه لیرې کړي وای.
په امریکا کې د کرونا وایروس ډېری نوې پېښې د دغه هېواد په جنوبي او لوېدیځو ایالتونو کې ثبت شوي دي.
د اریزونا والي ډاګ دوسي بارونو، سینماګانو، جیمونو او د لامبو پارکونو ته سم د لاسه د ۳۰ ورځو لپاره د تړل کېدو امر کړی دی.
والي وروسته له هغې عکس العمل وښود چې تېره یکشنبه په دغه ایالت کې چارواکو د کرونا ویروس د ۳۸۵۸ نویو پېښو راپور ورکړ، چې دا په دغه ایالت کې په یوه ورځ د کرونا وایروس تر ټولو لوړ شمېر دی.
د اریزونا والي پرون وویل، اټکل دا دی چې دغه شمېر به راتلونکې اوونۍ تر دې هم زیات شي.
د فلوریډا او ټکزاس ایالتونو چارواکو سر له راتلونکې جمعې د ټولو تازه پرانیستل شویو بارونو د تړلو امر کړی، بلخوا د نیوجرسي والي فیل مرفي ویلي، هغسې چې په پام کې وه د دې اوونۍ په وروستیو کې به سرپټي خوړنځایونه بېرته نه پرانیستل کېږي.
پرون دوشنبه ډېری ایالتونو خپلو وګړو ته امر وکړ، چې په عامه ځایونو کې ماسکونه وکاروي، حال دا چې د مخکنیو پالیسیو له مخې د ماسک کارول اختیاري و.
د جانس هاپکنز پوهنتون د شمېرو له مخې، په نړۍ کې په کرونا ویروس د اخته کسانو شمېر تر لسو میلیونو اوښتی او تر پنځو لکو او ۴۰۰۰ ډېر کسان یې له کبله مړه شوي دي.
دغې وبا د نړۍ په سطحه د امریکا متحد ایالتونه سخت ځپلي، چې د دغه ویروس تر دوو میلیونو او شپږو لکو زیاتې پېښې په کې ثبت شوي او د مړو شمېر هم په کې تر یو لک او ۲۶۰۰۰ اوښتی دی.
د روغتیا نړیوال سازمان مشر ټیدروس اډهانوم ګیبریسوس پرون دوشنبه خبرداری ورکړ، چې د کرونا وبا به ژر ختمه نه شي.
نوموړي زیاته کړه نړۍ به په راتلونکو میاشتو کې هم لا ډېر زغم، حوصلې، تواضع او سخاوت ته اړتیا ولري.
