د نفوس له پلوه د نړۍ د دوهم ستر هېواد خلک قرنطین شول.
یو میلیارد او ۳۰۰ میلیونه هندیان د ۲۱ ورځو په مخه د کرونا ویروس د خپرېدو د مخنیوي لپاره د تېرې شپې له ۱۲ بجو قرنطین شوي دي.
د هند صدراعظم نرېندرا مودي پرون دغه اعلان وکړ او د خپل هېواد له ټولو خلکو یې وغوښتل چې په کورونو کې پاتې شي.
دا د نړۍ په یوه هېواد کې د کرونا ویروس د خپرېدو د مخنیوي لپاره تر ټولو ستر قرنطین دی.
صدراعظم مودي پرون ناوخته په یوې ټلوېزیوني وینا کې وویل، د نن شپې له ۱۲ بجو وروسته دې د هند ټول خلک په خپلو کورونو کې ایسار شي.
هغه زیاته کړه: "د هندوستان د خوندیتوب لپاره، ستاسو د خوندیتوب لپاره ستاسو د دوستانو د خوندیتوب لپاره نن له ۱۲ بجو وروسته له کورونو پر وتلو بشپړ بندیز لګول شوی دی."
ده زیاته کړه چې دا پرېکړهیې د روغتیایي متخصصانو د لارښوونو له مخې کړې ده څو د کرونا ویروس د خپرېدو مخنیوی وشي.
مودي بیا وویل: "که په دغو ۲۱ ورځو کې اصول سم مراعات نهکړو هېواد به مو ۲۱ کاله شاته پاتې شي او په دې ډول به ډېرې کورنۍ د تل لپاره تباه شي، نو د ۲۱ ورځو لپاره له کورونو وتل هېر کړئ."
د هند صدراعظم بیا وویل چې حکومت دوه میلیارده ډالر د هند د روغتیایي زېربنا لپاره ځانګړې کړي دي.
د مودي دا اعلان د دې باعث شو چې پرون تر ناوخته ډېر هندیان د غذایي موادو د اخیستو لپاره تر ډېرو په بازارونو کې پاتې شي، خو مودي وویل چې د سودا اخیستو پر مهال وارخطا نهشئ او ایالتي دولتونه به د اړتیا وړ موادو په چمتووالي کې له خلکو سره همکاري کوي.
د هند د کورنیو چارو وزارت په یوې خبرپاڼه کې بیا څرګنده کړې ده چې د خوراکي موادو دکانونه، درملتونونه، بانکونه او د تېلو ټانکونه به پرانیستې وي.
هغه دولتي بنسټونه چې ښاري خدمات وړاندې کوي هغه به هم عادي فعالیت کوي.
د صدراعظم مودي تر اعلان پورې یعنې تېره شپه تر ناوخته په هند کې ۵۰۸ کسان په کرونا ویروس اخته وو او د دې ناروغۍ تلفات ۱۰ تنو ته رسېدل.
صدراعظم مودي وویل، یوه وړه تېروتنه ښایي په دې حساسه مرحله کې چې کرونا ویروس خپور شوی دی هند د اور په شغلو کې ایسار کړي.
