د امریکا د بهرنیو چارو وزیر مایک پامپیو ویلي چې هېواد يې په شمالي قطب کې خپل حضور پراخوي.
مایک پامپیو پرون په فنلند کې د شمالي قطب شورا ته په وینا کې وویل، په شمالي قطب کې د امریکا د حضور له پراخولو څخه هدف په طبیعي منابعو غني دغې سیمه کې د روسيې او چین د تهاجمي چلند څارل دي.
نوموړي وویل، شمالي قطب د زور ښودلو او سیالۍ په حوزه بدل شوی دی.
د امریکا د بهرنیو چارو وزیر په شمالي قطب کې د روسيې د رول د پراخېدو په اړه اندېښنه څرګنده کړه او ویېویل:
"له دې هېڅڅوک سترګې نهپټوي چې روسیه په شمالي قطب کې د پام وړ ګټې لري، موږ پوهېږو چې روسیه یوازنی هېواد نهدی چې غیر قانوني ادعاوې لري."
مایک پامپیو په شمالي قطب کې د چین رول ته هم اشاره وکړه.
چین دغلته د څارونکي رول لري، خو دا رول د شمالي قطب د هېوادونو حاکمیت ته د چین په درناوي پورې تړلی دی.
امریکا غواړي چې چین په همدې شرط په شمالي قطب کې مسؤلانه عمل وکړي، خو په دې سیمه کې د خپلو اهدافو په اړه د چین وینا او عمل شکونه پیدا کړي دي.
د شمالي قطب شورا اته غړي لري چې؛
- متحده ایالات
- روسیه
- کاناډا
- ډنمارک
- فنلند
- ایسلند
- ناروې
- سویډن
هېوادونه دي.
دغهراز د دې سیمې پخواني خلک هم په دې شورا کې برخه لري.
په اقلیم کې د بدلون له امله د شمالي قطب واورې ورو ورو اوبه کېږي او د دې سیمې طبیعي پېښو ته لاسرسی ورځ تر بلې پراخېږي.
شمالي قطب د تېلو، طبیعي ګازو او د معدني موادو د لویو ذخیرو په لرلو غني سیمه ده.
د چین په شمول د نړۍ قدرتونو او د سیمې هېوادونو اوس شمالي قطب ته پاملرنه زیاته کړې ده.
روسيې په شمالي قطب کې خپل حضور زیات کړی دی او دغلتهيې پانګونه هم کړې ده.
روسيې په شمالي قطب کې خپل سمندري ځواکونه عصري کړي او پوځي اډهيې هم پرانيستې ده.
د متحده ایالاتو د بهرنیو چارو وزیر ویلي دي چې په شمالي قطب کې د روسيې هر ګام ځانګړې پاملرنې ته اړتیا لري، ځکه د مایک پامپیو په وینا، موږ پوهېږو چې د ځمکو د لاندې کولو په اړه د روسيې فکر په تاوتریخوالي هم بدلېدای شي.
مایک پامپیو په دې لړ کې د اوکراین د ختیځ شخړې ته اشاره کړې ده، چېرته چې د روسيې په ملاتړ بېلتون غوښتونکي د اوکراین له حکومتي ځواکونو سره جنګېږي.