امریکا د ایران د سپاه پاسداران انقلاب اسلامي ځواکونه د بهرنیو ترورېستي سازمانونو په لېست کې شامل کړل.
دا لومړی ځل دی چې واشنګټن د یوه هېواد یو پوځي ارګان په دغه لېست کې شاملوي.
د امریکا ولسمشر ډونالد ترمپ وویل چې دا پرېکړهیې ځکه کړې چې د ایران اعمال له نورو هېوادونو سره لوی توپیر لري.
د امریکا د بهرنیو چارو وزیر هم وویل چې د پرېکړې هدف دا دی چې په ایران باندې فشارونو ته زور ورکړل شي او د ځینو هغو مالي منابعو مخه ونیول شي چې ګمان کېږي، د ترورېزم او وسلهوالو فعالیتونو د تمویل لپارهیې کاروي.
په تور لېست کې د پاسدارانو شمولیت به په دغو ځواکونو چې د ایران د وسلهوالو قواوو یوه برخه ده، هم اقتصادي او هم نور اغېز ولري، د پاسدارانو د چارواکو سفر به محدود کړي او په هغو مؤسسو به چې په دوی پورې ارتباط لري، هم بندیزونه ولګول شي.
کارپوهان وايي چې د واشنګټن دغه اقدام د امریکايي او ایراني ځواکونو د نښتو خطر رامنځته کوي.
ولې پاسداران په تور لېست کی شامل کړای شو؟
دغه ځواک په ۱۹۷۹ کال کې د ایران تر انقلاب وروسته د دې لپاره تأسیس شو چې اسلامي رژیم او ارمانونهیې د کورنیو او بهرنیو ګواښونو په وړاندې وساتي.
سپاه پاسداران د ایران د ستر مشر ایتالله خامنهاي تر مستقیم امر لاندې دي او وروسته له دې چې نوموړي په ۱۹۸۹ کال کې واک ترلاسه کړ، د دغو ځواکونو نفوذ او تأثیر هم پراخ شوی دی.
سپاه پاسداران په هېواد کې دننه د اسلامي قوانینو په نافذولو او د مخالفینو په ځپلو کې لاس لري.
راپورونه وايي چې د پاسدارانو استخباراتي څانګې په دې وروستیو کې یو شمېر ایراني امریکایان او د چاپېریال ساتونکي نیولي دي.
پاسداران چې د ایران د حکومت یو پیاوړی ارګان دی، د امریکا ولسمشر ځکه په تور لېست کې شامل کړ چې په تهران باندې فشار ته زور ورکړي.
واشنګټن دغه ګام د خپل هغه سخت دریځ په ترځ کې اوچتوي چې د ایران په وړاندې یې خپل کړی او پیل کې یې ځان د ایران او د نړۍ د شپږو لویو قدرتونو د اټمي توافق څخه وویست او په دغه هېواد یې بندیزونو ته بیا مخه کړه چې په نتیجه کې یې ښکاري چې د ایران اقتصاد او مالي سکټور ته سخت زیانونه رسېدلي دي.
سره له دې چې امریکایي چارواکي وایي، د دغو فشارونو هدف دا دی چې ایران خبرو ته کېنوي، خو ځیني نور یې د ایران د رژیم د تغییر لپاره یو کمپاین ګڼي.
اریان طباطبایي د راند کارپورېشن کارپوه وايي، په تور لېست کې د سپاه پاسداران په شمولیت سره به د تهران لپاره ګرانه وي چې خبرو ته کېني.
نوموړی وایي چې امریکا په ایران باندې د فشار پراخ کمپاین ته مخه کړې چې په نتیجه کې بهیې یا د ایران رژیم خپل چلند په بشپړه توګه بدل کړي او یا بهیې پرځېدو ته لاره هواره شي.
سپاه پاسداران د ایران په اقتصاد کې هم مهمه ونډه لري.
د ایران د توغندیو پروګراميې هم په لاس کې دی.
دا تېره میاشتیې د امریکایي چارواکو په وینا، په سیمه کې د وسلو د سیالۍ ګواښ رامنځته کړ.
دغه ځواک چې له سلو زرو تر یو نیم سل زرو پورې غړي لري، د سوریې په جګړه کې د بشارالاسد د رژیم ملاتړ کوي او ګمان کېږي چې په عراق، افغانستان، لبنان او یمن کې هم د امریکا د ګټو ضد عملیات لري.
د سوریې د رژیم د ملاتړ لپارهیې د فاطمیون او زینبیون د لښکرو په جوړولو زرګونه افغانان او پاکستانیان استخدام کړي دي.
په تور لېست کې د سپاه پاسداران شمولیت له ایران سره سوداګري نوره هم ستونزمنه کوي.
خو د دې لپاره چې ایران لا دمخه تر اقتصادي بندیزونو لاندې دی، نو تور لېست کې د سپاه شمولیت به د کارپوهانو په وینا دومره لوی تأثیر ونهلري.
ښاغلی طباطبایي وایي چې د ترورېستانو په لېست کې د سپاه شاملول تر ډېره بریده یو سیاسي او سمبولیک اقدام دی او د اقتصاد په عملي ډګر کې به دومره زیات تأثیر ونهلري.
نوموړی زیاتوي چې د امریکا هدف دا دی چې د پاسدارانو بهرني عملیات ستونزمن او دننه په هېواد کې یې هم مشروعیت زیانمن کړي.
د امریکا د دغه اقدام ځیني منتقدین چې د امریکا د پوځ او استخباراتو یو شمېر چارواکي هم پهکې شامل دي، وايي چې پاسداران ترورېست ګڼل، کېدای شي چې امریکایي عسکر او استخباراتي مأمورین له خطر سره مخامخ کړي.
ایران د امریکا د دغه اقدام په وړاندې په سیمه کې امریکایي ځواکونه ترورېستان او د ترورېزم ملاتړي اعلان کړل.